പത്തനംതിട്ട : കോവിഡ്-19 പ്രതിരോധ പ്രവർത്തനങ്ങളെ താളംതെറ്റിക്കുന്നവർക്കെതിരേ നടപടി ശക്തമാക്കി പോലീസ്. അഡീഷണൽ എസ്.പി. എ.യു.സുനിൽകുമാറിനാണ് ചുമതല. കഴിഞ്ഞ ദിവസം ജില്ലയിൽ 35 കേസുകളിലായി 29പേരെ അറസ്റ്റ് ചെയ്യുകയും മാസ്‌ക് ധരിക്കാത്തതിന് 141പേർക്ക് നോട്ടീസ് നൽകുകയും ചെയ്തു.
കോവിഡ് ബാധിതരെ സംബന്ധിച്ച വിവരശേഖരണം, ഹോം ക്വാറന്റീനിൽ കഴിയുന്നവരുടെ നിരീക്ഷണം, പോസിറ്റീവ് ആയവരുമായി സമ്പർക്കത്തിൽ വന്നവരുടെ ലിസ്റ്റ് തയാറാക്കൽ എന്നിവയുടെ ചുമതലയാണ് അഡിഷണൽ എസ്.പി.യെ ഏൽപ്പിച്ചിരിക്കുന്നത്. സമ്പർക്കത്തിലായവരെ ക്വാറന്റീൻ കേന്ദ്രത്തിലേക്ക് മാറ്റാനും ക്വാറന്റീൻ ലംഘനങ്ങൾ തടയാനും ആശുപത്രികളിൽ കഴിയുന്നവർ കടന്നുകളയുന്നതു തടയുന്നതിനും പോലീസിന് ചുമതലയുണ്ട്. സമ്പർക്കവിലക്ക് ശ്രദ്ധയിൽപെട്ടാൽ ജനങ്ങൾ പോലീസിനെ അറിയിക്കണം. കണ്ടെയ്‌ൻമെന്റ് മേഖലയ്ക്ക് പുറത്ത്‌ പ്രവർത്തനാനുമതി ലഭിച്ച ജിംനേഷ്യം, യോഗാ പോലെയുള്ള കേന്ദ്രങ്ങളുടെ പ്രവർത്തനം, ശുചിത്വ സുരക്ഷാ മാനദണ്ഡങ്ങൾ പാലിച്ചേ നടത്തുന്നുള്ളൂ എന്നുമുറപ്പാക്കും.
