പുതുച്ചേരി : രാജിവെച്ച പുതുച്ചേരി പൊതുമരാമത്ത് മന്ത്രിയും മുതിർന്ന കോൺഗ്രസ് നേതാവുമായ എ. നമശിവായം ബി.ജെ.പി.യിൽ ചേർന്നതായി സൂചന. ഇതുസംബന്ധിച്ച ഔദ്യോഗിക അറിയിപ്പ് ബി.ജെ.പി. നേതൃത്വം പുറത്തുവിട്ടിട്ടില്ല. നമശിവായവുമായി ബന്ധപ്പെട്ട വൃത്തങ്ങളും ഇത് സ്ഥിരീകരിച്ചിട്ടില്ല.
നമശിവായം ബുധനാഴ്ച ഡൽഹിയിൽ എത്തി ബി.ജെ.പി. കേന്ദ്ര നേതൃത്വവുമായി കണ്ടുവെന്നാണ് നിലവിലെ വിവരം. 31-ന് പുതുച്ചേരിയിൽ നടക്കുന്ന ബി.ജെ.പി. സമ്മേളനത്തിൽ കേന്ദ്രനേതാക്കൾ പങ്കെടുക്കുന്നുണ്ട്. ഇതിൽ നമശിവായം പാർട്ടിയിൽ ചേർന്ന കാര്യം ഔദ്യോഗികമായി പ്രഖ്യാപിക്കാനാണ് സാധ്യത. അതേസമയം, നമശിവായത്തിന്റെ മണ്ഡലമായ വില്യന്നൂരിൽ അദ്ദേഹത്തിന്റെ അണികളിൽ പലരും കോൺഗ്രസ് വിട്ടതായി സൂചനയുണ്ട്.
പാർട്ടി വിരുദ്ധ പ്രവർത്തനത്തിന്റെ പേരിൽ ഇതിനകം 20-ഓളം കോൺഗ്രസ് പ്രവർത്തകരെ പുറത്താക്കിയിട്ടുണ്ട്. അവർ നമശിവായത്തോടൊപ്പം ബി.ജെ.പി.യിൽ ചേരുമെന്നാണ് സൂചന.
നമശിവായത്തോടൊപ്പം ഒസുഡു മണ്ഡലത്തിലെ എം.എൽ.എ.യായ ദീപാഞ്ജനും കഴിഞ്ഞദിവസം രാജിവെച്ചിരുന്നു.
