വിയന്ന: ഓസ്ട്രിയയിലെ ലോക്ക്ഡൗണ്‍ ഫെബ്രുവരി 7 വരെ തുടരും. ഇപ്പോഴത്തെ സ്ഥിതി കണക്കിലെടുത്താല്‍ ഇനിയും രണ്ടോ മൂന്നോ ബുദ്ധിമുട്ടുള്ള മാസങ്ങളാണ് മുന്നിലുള്ളതെന്നു ചാന്‍സലര്‍ സെബാസ്റ്റ്യന്‍ കുര്‍ത്സ് വാര്‍ത്തസമ്മേളനത്തില്‍ അറിയിച്ചു.

ലോക്ക്ഡൗണ്‍ നീട്ടിയതോടൊപ്പം ചില കര്‍ശനമായ നിയമങ്ങളും പാലിക്കേണ്ടതുണ്ട്. ജനുവരി 25 മുതല്‍ സാധാരണ വായയും മൂക്കും മൂടിയുള്ള മാസ്‌ക്കുകള്‍ക്കു പകരം എഫ്എഫ്പി 2 മാസ്‌കുകള്‍ ഷോപ്പിങ്ങിനും, ജോലിസ്ഥലത്തും പൊതുഗതാഗതത്തിലും നിര്‍ബന്ധമാക്കി. ഒരു മീറ്ററിന് പകരം മറ്റുള്ളവരില്‍ നിന്ന് രണ്ട് മീറ്റര്‍ ദൂരം അകലം പാലിക്കാനും തീരുമാനമായിട്ടുണ്ട്. ഹോട്ടല്‍, ടൂറിസം മേഖല ഫെബ്രുവരിയിലും പൂര്‍ണ്ണമായി പ്രവര്‍ത്തിക്കില്ല. മറ്റു വ്യാപാര സ്ഥാപനങ്ങള്‍ ഫെബ്രുവരി എട്ടിന് വീണ്ടും തുറക്കാന്‍ അനുവാദമുണ്ട്.

സെമസ്റ്റര്‍ അവസാനിക്കുന്നതുവരെ സ്‌കൂളുകള്‍ ഹോം സ്‌കൂളിങ് തുടരണമെന്ന് നിര്‍ദ്ദേശമുണ്ട്. അതേസമയം ഫെബ്രുവരിയിലുള്ള സ്‌കൂള്‍ അവധി ഒരാഴ്ചകൂടി നീട്ടി. സ്‌കൂള്‍ തുടര്‍ച്ചയായി അടച്ചിടാനുള്ള നീക്കവും സര്‍ക്കാര്‍ നടത്തുന്നുണ്ട്. എക്സിറ്റ് നിയന്ത്രണങ്ങള്‍ നിലവിലുള്ളതുപോലെ തുടരും. ഹോം ഓഫീസ് തുടരുന്നതിനുള്ള ശുപാര്‍ശയും സര്‍ക്കാര്‍ മുന്നോട്ടുവച്ചിട്ടുണ്ട്. ഫെബ്രുവരി അവസാനം വരെ പൊതുപരിപാടികള്‍ അനുവദനീയമല്ല.

ഓസ്ട്രിയയില്‍ 1,267 പേര്‍ക്ക് പുതിയ വൈറസ് ബാധ രേഖപ്പെടുത്തിയപ്പോള്‍ 29 മരണങ്ങളും റിപ്പോര്‍ട്ട് ചെയ്തു. 68,000 പ്രതിരോധ കുത്തിവയ്പ്പുകള്‍ വെള്ളിയാഴ്ച വൈകുന്നേരത്തോടെ നടത്തിയിരുന്നു. വിയന്നയിലെ മെഡിക്കല്‍ സര്‍വകലാശാല നടത്തിയ 83 പോസിറ്റീവ് പിസിആര്‍ ടെസ്റ്റുകളുടെ സാമ്പിള്‍ വിശകലനത്തില്‍ 17 ശതമാനം രൂപാന്തരം പ്രാപിച്ച പുതിയ വൈറസ് രാജ്യത്ത് കണ്ടെത്തിയതായി റിപ്പോര്‍ട്ടുണ്ട്. 

വാര്‍ത്ത അയച്ചത്: ജോബി ആന്റണി