ഡാലസ്: ഡാലസ് ഫോര്‍ട്ട്വര്‍ത്ത് മലയാളി യുവാക്കളുടെ നേതൃത്വത്തില്‍ നേപ്പാളി റഫ്യൂജി ക്യാമ്പില്‍ ക്രിസ്മസിനോടനുബന്ധിച്ച് സമ്മാന പാക്കറ്റുകള്‍ വിതരണം നടത്തി.
ക്രിസ്മസ് ഈവില്‍ നടന്ന വിതരണത്തിന് നേതൃത്വം നല്‍കിയത് ഇവിടെ ജനിച്ചു വളര്‍ന്ന രണ്ടാംതലമുറയില്‍പ്പെട്ട ആല്‍വിന്‍ ഫിലിപ്പ്, പി.ജെ. ജോണ്‍, ബിബി മാത്യു, സോണി കുന്നംപുറത്ത് എന്നിവര്‍ ഉള്‍പ്പെടുന്ന ടീമാണ്.
മുന്നൂറോളം ക്രിസ്മസ് സമ്മാനങ്ങള്‍ അടങ്ങിയ പാക്കറ്റുകളാണ് ഇവര്‍ വിതരണം ചെയ്തത്. ആദ്യമായാണ് ഇങ്ങനെ ഒരു പരിപാടി സംഘടിപ്പിക്കുന്നതെന്ന് പ്രോഗ്രാം കോര്‍ഡിനേറ്ററായ ആല്‍വിന്‍ .ഫിലിപ്പ് പറഞ്ഞു. വരുംവര്‍ഷങ്ങളില്‍ വിപുലമായ രീതിയില്‍ കൂടുതല്‍ പേര്‍ക്ക് സമ്മാന പാക്കറ്റുകള്‍ വിതരണം ചെയ്യുന്നതിനുള്ള ക്രമീകരണങ്ങള്‍ ചെയ്യുമെന്ന് ആല്‍വിന്‍ പറഞ്ഞു. സണ്ണിവെയ്ല്‍, മസ്‌കിറ്റ് എന്നീ സിറ്റികളില്‍ നിന്നുള്ള ഈ യുവാക്കളുടെ പ്രവര്‍ത്തനത്തെ അഭിനന്ദിച്ചു.
വാര്‍ത്ത അയച്ചത് : പി.പി. ചെറിയാന്‍
