ചാള്‍സ്റ്റണ്‍: രണ്ടുദിവസം മുമ്പ് മുഖത്ത് വെടിയേറ്റ് ചികിത്സയിലായിരുന്ന വെസ്റ്റ് വെര്‍ജീനിയ പോലീസ് ഓഫീസര്‍ കേസി ജോണ്‍സണ്‍ (28) മരിച്ചതായി നവംബര്‍ 3 ന് സിറ്റി ഓഫ് ചാള്‍സ്റ്റണ്‍ പുറത്തിറക്കിയ പത്രക്കുറിപ്പില്‍ അറിയിച്ചു.
പാര്‍ക്കിങ്ങിനെക്കുറിച്ച് ലഭിച്ച പരാതി അന്വേഷിക്കുന്നതിനിടയിലാണ് ജോഷ്വ ഫിലിപ്പ് (33) എന്ന പ്രതി കേസിയുടെ മുഖത്തേക്ക് നിറയൊഴിച്ചത്. ഗുരുതരമായി പരിക്കേറ്റ കേസിയെ ആശുപത്രിയില്‍ പ്രവേശിപ്പിച്ചിരിക്കുകയായിരുന്നു.
2017 ല്‍ സര്‍വീസില്‍ ചേര്‍ന്ന കേസി 2019 ലാണ് പെട്രോള്‍ ഓഫീസറായി ചാര്‍ജ്ജെടുത്തത്.
തന്റേതല്ലാത്ത പാര്‍ക്കിങ് ലോട്ടില്‍ പാര്‍ക്ക് ചെയ്തതിനെക്കുറിച്ച് ലഭിച്ച പരാതി അന്വേഷിക്കുന്നതിനാണ് വനിതാ ഓഫീസര്‍ സ്ഥലത്തെത്തിയത്. പിന്നീട് ഇരുവരും തമ്മില്‍ തര്‍ക്കിക്കുകയും ഫിലിപ്പ് തന്റെ കൈവശമുണ്ടായിരുന്ന റിവോള്‍വര്‍ ഉപയോഗിച്ച് വെടിവെക്കുകയുമായിരുന്നു. കേസിയും തിരിച്ചു വെടിയുതിര്‍ത്തു. വെടിയേറ്റ പ്രതിയും ചികിത്സയിലാണ്.
2020 ജനുവരിയില്‍ ഫയര്‍ആം കൈവശം വെച്ചതിന് ഫിലിപ്പ് അറസ്റ്റിലായിരുന്നു. സംഭവം നടക്കുമ്പോള്‍ ജാമ്യത്തിലിറങ്ങിയതായിരുന്നു.
സിറ്റിയിലെ പൗരന്മാരുടെ സുരക്ഷക്ക് മുന്‍ഗണന നല്‍കിയിരുന്ന ധീരയും സേവനസന്നദ്ധതയുമുള്ള ഓഫീസറായിരുന്നു കേസി എന്ന് ചാള്‍സ്റ്റണ്‍ പോലീസ് ചീഫ് ടൈക്കി ഹണ്ട് പറഞ്ഞു.
വാര്‍ത്തയും ഫോട്ടോയും : പി.പി.ചെറിയാന്‍
