വാഷിങ്ടണ്‍: അമേരിക്കന്‍ സാമ്രാജ്യത്തെ അക്ഷരാര്‍ത്ഥത്തില്‍ വിറപ്പിച്ച കോവിഡ് മഹാമാരിയെ തുടര്‍ന്ന് ജീവന്‍ നഷ്ടപ്പെട്ടവരുടെ സംഖ്യ ഫെബ്രുവരി 21 ന് 5 ലക്ഷം കവിഞ്ഞതായി പുതിയ റിപ്പോര്‍ട്ടുകള്‍ സൂചിപ്പിക്കുന്നു. രണ്ടാം ലോകമഹായുദ്ധകാലത്ത് ജീവന്‍ ബലിയര്‍പ്പിക്കേണ്ടി വന്ന അമേരിക്കന്‍ ജനതയുടെ ഇരട്ടിയോളമാണ് മഹാമാരിയില്‍ പൊലിഞ്ഞത്. യു.എസ്. ഡിപ്പാര്‍ട്ട്‌മെന്റ് ഓഫ് വെറ്ററന്‍സ് അഫയേഴ്‌സിന്റെ കണക്കനുസരിച്ച് രണ്ടാം ലോകമഹായുദ്ധത്തില്‍ 291557 പേരാണ് കൊല്ലപ്പെട്ടത്.
അമേരിക്കയിലെ കോവിഡ് മരണം 5 ലക്ഷം കവിഞ്ഞതോടെ വൈറ്റ് ഹൗസില്‍ പ്രത്യേക വിജില്‍ തിങ്കളാഴ്ച സംഘടിപ്പിക്കുമെന്ന് പ്രസിഡന്റ് ബൈഡന്‍ പറഞ്ഞു. അതോടൊപ്പം മൗനാചരണവും ഉണ്ടായിരിക്കുെന്ന് വൈറ്റ് ഹൗസ് അറിയിച്ചു.
മാസങ്ങള്‍ക്കുമുമ്പുതന്നെ ഫെബ്രുവരി അവസാനത്തോടെ അമേരിക്കയിലെ കോവിഡ്19 മരണം 7 ലക്ഷത്തിലെത്തുമെന്ന് പ്രവചിക്കപ്പെട്ടിരുന്നു.
കോവിഡ്19 പ്രതിരോധ പ്രവര്‍ത്തനങ്ങള്‍ക്ക് നേതൃത്വം നല്‍കുന്ന ഡോ.ഫൗസി അമേരിക്കന്‍ ജനതക്ക് മുന്നറിയിപ്പ് നല്‍കിയിരിക്കുന്നത് 2022 വരെ എല്ലാവരും മാസ്‌കും സോഷ്യല്‍ ഡിസ്റ്റന്‍സിംഗും പാലിക്കേണ്ടി വരുമെന്നാണ്.
അമേരിക്കയില്‍ കോവിഡ്19 സ്ഥിരീകരിച്ച് ഒരു വര്‍ഷത്തിനുള്ളില്‍ അരമില്യണ്‍ ജനതയെ നഷ്ടപ്പെട്ടുവെന്നത് രാജ്യത്ത് താങ്ങാവുന്നതിലേറെ നഷ്ടമാണ് വരുത്തിവെച്ചിരിക്കുന്നത്. അമേരിക്കയില്‍ ഇതുവരെ രോഗം സ്ഥിരീകിരച്ചവരുടെ എണ്ണം 28206650 ആയി ഉയര്‍ന്നു.
വാര്‍ത്തും ഫോട്ടോയും : പി.പി.ചെറിയാന്‍
