ഓസ്റ്റിന്‍: ടെക്‌സാസിലെ വ്യവസായ ശാലകളിലോ മറ്റ് സ്ഥാപനങ്ങളിലോ ജീവനക്കാരെ കോവിഡ് വാക്‌സിന് നിര്‍ബന്ധിക്കുന്നത് വിലക്കി ഗവര്‍ണര്‍ ഗ്രേഗ് ഏബര്‍ട്ട് ഒക്ടോബര്‍ 11 ന് എക്‌സിക്യൂട്ടീവ് ഉത്തരവ് പുറത്തിറക്കി. സ്വകാര്യ സ്ഥാപനങ്ങളും ഈ ഉത്തരവ് ബാധകമാണ്. 

മതവിശ്വാസത്തിന്റെ പേരിലോ ആരോഗ്യകാരണങ്ങളാലോ കോവിഡ് വാക്‌സിന്‍ സ്വീകരിക്കാത്തവരെ അതിന് നിര്‍ബന്ധിക്കുന്നത് കര്‍ശനമായി നിരോധിക്കുന്നതാണ് പുതിയ ഉത്തരവ്.

ബിസിനസ് സ്ഥാപനങ്ങളില്‍ ആളുകളെ നിയന്ത്രിക്കുന്നതിന് അവര്‍ തന്നെ തീരുമാനിച്ചാല്‍ അതിനെ എതിര്‍ക്കുകയില്ലെന്നും കോവിഡ് വാക്‌സിന്‍ സുരക്ഷിതത്വവും പ്രയോജനകരവുമാണെന്നും എന്നാല്‍ അത് സ്വീകരിക്കുന്നതിന് ആരെയും നിര്‍ബന്ധിക്കരുതെന്നും അങ്ങിനെയുള്ള പരാതി ലഭിച്ചാല്‍ 1000 ഡോളര്‍ വരെ പിഴ ഈടാക്കുമെന്നും ഉത്തരവില്‍ വ്യക്തമാക്കിയിട്ടുണ്ട്. 

കഴിഞ്ഞ ജൂണില്‍ വാക്‌സിന്‍ പാസ് പോര്‍ട്ട് ആവശ്യപ്പെടുന്നത് നിരോധിക്കുന്ന എക്‌സിക്യൂട്ടീവ് ഉത്തരവും ഗവര്‍ണര്‍ ഒപ്പുവെച്ചിരുന്നു.

ഈയിടെ പ്രസിദ്ധീകരിച്ച കോവിഡ് കേസുകള്‍ വര്‍ധിക്കുന്ന സംസ്ഥാനങ്ങളില്‍ ടെക്‌സാസ് ഉള്‍പ്പെട്ടിട്ടില്ലെന്നുള്ളത് കോവിഡ് കേസുകള്‍ സാവകാശം ഇവിടെ കുറഞ്ഞുവരുന്നുവെന്നുള്ളതിന് തെളിവാണെന്ന് ചൂണ്ടിക്കാണിക്കപ്പെട്ടു. യു.എസ്സിലെ 45 സംസ്ഥാനങ്ങളില്‍ കോവിഡ് കേസുകള്‍ ശരാശരി ദിനം പ്രതി കുറഞ്ഞുവരുന്നുവെന്ന് ഡോ.ആന്റണി ഫൗച്ചി ഞായറാഴ്ച ഒരു പ്രസ്താവനയില്‍ പറഞ്ഞിരുന്നു.

വാര്‍ത്തയും ഫോട്ടോയും :പി.പി.ചെറിയാന്‍