അര്‍ക്കന്‍സാസ്: അര്‍ക്കന്‍സാസ് സംസ്ഥാനത്തിലെ എല്ലാവരും ട്രംപ് വാക്‌സിന്‍ സ്വീകരിക്കണമെന്ന അഭ്യര്‍ത്ഥനയുമായി മൂന്‍ വൈറ്റ് ഹൗസ് പ്രസ് സെക്രട്ടറി സാറാ ഹക്കമ്പി.

മാസങ്ങള്‍ക്കുമുമ്പ് തന്നെ ഞാന്‍ ട്രംപ് വാക്‌സിന്‍ സ്വീകരിച്ചതായി ഞായറാഴ്ച നടത്തിയ വാര്‍ത്താസമ്മേളനത്തില്‍ സാറാ അവകാശപ്പെട്ടു.

അര്‍ക്കന്‍സാസ് സംസ്ഥാനത്തില്‍ 36 ശതമാനം മാത്രമാണ് ഇതുവരെ പൂര്‍ണമായും വാക്‌സിന്‍ സ്വീകരിച്ചിട്ടുള്ളത്. 11.34 ശതമാനമാണ് ഇപ്പോള്‍ ഇവിടെ പോസിറ്റീവ് റേറ്റ് എന്ന് ജോണ്‍സ് ഹോപ്കിന്‍സ് പഠന റിപ്പോര്‍ട്ടില്‍ ഫറയുന്നു.

ട്രംപിന്റെ വാക്‌സിനെ ദുര്‍വ്യാഖ്യാനം ചെയ്യുന്ന പ്രസിഡന്റ് ബൈഡന്‍, കമലഹാരിസ്, ആന്റി ഫൗച്ചി എന്നിവരെ സാറ ഹക്കമ്പി നിശിതമായി വിമര്‍ശിച്ചു ട്രംപാണ് വാക്‌സിന്‍ കണ്ടെത്താന്‍ മുന്‍കൈ എടുത്തതും അതിന് ആവശ്യമായ യുദ്ധകാലാടിസ്ഥാനത്തിലുള്ള നിര്‍ദേശങ്ങള്‍ നല്‍കിയതെന്നും സാറാ പറഞ്ഞു.

അര്‍ക്കന്‍സാസ് ഗവര്‍ണര്‍ സ്ഥാനത്തേക്ക് ട്രംപിന്റെ അനുഗ്രഹാശിസ്സുകളോടെയാണ് സാറാ ഹക്കമ്പി മത്സരരംഗത്തെത്തിയിരിക്കുന്നത്. അര്‍ക്കന്‍സാസിലെ കോവിഡ് മരണവും ആശുപത്രിയില്‍ പ്രവേശിപ്പിക്കുന്നവരുടെ എണ്ണവും വര്‍ധിക്കുന്നത് വാക്‌സിനേറ്റ് ചെയ്യാത്തതിനാലാണെന്നും ഇവര്‍ പറഞ്ഞു. പൗരന്മാരുടെ സുരക്ഷിതത്വത്തിനു വാക്‌സിനേഷന്‍ സ്വീകരിക്കണമെന്നും ഇവര്‍ നിര്‍ദേശിച്ചു. ട്രംപിന്റെ വാക്‌സിന്‍ കോവിഡിനെതിരെ ഫലപ്രദമാണെന്നും ഇവര്‍ ചൂണ്ടിക്കാട്ടി.

വാര്‍ത്തയും ഫോട്ടോയും : പി.പി.ചെറിയാന്‍