വാഷിങ്ടണ്‍ ഡിസി: കാപ്പിറ്റോള്‍ ബില്‍ഡിംഗില്‍ നടന്ന അക്രമാസക്തമായ മാര്‍ച്ചിനെ പ്രതിരോധിക്കാന്‍ ശ്രമിച്ച പോലീസ് ഓഫീസര്‍ ജനുവരി 9 ന് ആത്മഹത്യചെയ്തതായി കാപ്പിറ്റോള്‍ പോലീസ് വെളിപ്പെടുത്തി. കാപ്പിറ്റോള്‍ പോലീസ് സര്‍വീസില്‍ 15 വര്‍ഷത്തെ സേവനമനുഷ്ടിച്ച ഓഫീസര്‍ ഹൊവാര്‍ഡ് ബി ലീബേന്‍ഗൂഡ് (51) ആണ് മരിച്ചത്. മരണകാരണം പോലീസ് പുറത്തുവിട്ടിട്ടില്ല.
2005-ലാണ് സെനറ്റ് ഡിവിഷനിലേക്ക് ഈ ഓഫീസറെ നിയമിച്ചത്. മുന്‍ സെനറ്റ് സാര്‍ജന്റിന്റെ മകനാണ് ഹൊവാര്‍ഡ്. ജനുവരി 6-ന് നടന്ന സംഭവവുമായി ബന്ധപ്പെട്ടാണോ മരണമെന്നും വ്യക്തമല്ല. ജനുവരി 6-ന് നടന്ന സംഭവത്തില്‍ ഒരു പോലീസ് ഓഫീസര്‍ ഉള്‍പ്പെടെ അഞ്ചുപേര്‍ നേരത്തെ മരിച്ചിരുന്നു.
കാപ്പിറ്റോളില്‍ നടന്ന അനിഷ്ടസംഭവങ്ങളെത്തുടര്‍ന്ന് നിരവധി ആരോപണങ്ങള്‍ ഉയര്‍ന്ന കാപ്പിറ്റോള്‍ പോലീസിന് ഈ ഓഫീസറുടെ മരണം വലിയ ആഘാതമുണ്ടാക്കിയിരിക്കുകയാണ്.
കോണ്‍ഗ്രസ് അംഗങ്ങളുടെ ജീവന്‍ സംരക്ഷിക്കുന്നതിന് സഹപ്രവര്‍ത്തകരോടൊപ്പം പോരാടിയ ഓഫീസറുടെ വിയോഗം കാപ്പിറ്റോള്‍ പോലീസിനെ നിരാശയിലാഴ്ത്തി. ഓഫീസറുടെ കുടുംബാംഗങ്ങളെ അനുശോചനം അറിയിക്കുകയും ചെയ്തു.
വാര്‍ത്തയും ഫോട്ടോയും : പി.പി.ചെറിയാന്‍
