ന്യൂയോര്‍ക്ക്: ന്യൂയോര്‍ക്കില്‍ കോവിഡ് ബാധിച്ചു മരിച്ചവരുടെ നൂറുകണക്കിന് മൃതദേഹങ്ങള്‍ ഇപ്പോഴും വലിയ ഫ്രീസര്‍ ട്രക്കുകളില്‍ ന്യൂയോര്‍ക്ക് സിറ്റിയില്‍ സൂക്ഷിച്ചരിക്കുന്നതായി സിറ്റി അധികൃതര്‍ അറിയിച്ചു. ഏപ്രില്‍ മാസത്തിനുശേഷം മരിച്ചവരുടെ 650 മൃതദേഹങ്ങളാണ് യഥാര്‍ത്ഥ അവകാശികളെ കണ്ടെത്താന്‍ കഴിയാതെയും സംസ്‌കാര ചിലവുകള്‍ക്ക് പണം കണ്ടെത്താന്‍ കഴിയാതെയും ട്രക്കുകളില്‍ സൂക്ഷിച്ചിരിക്കുന്നത്. കൊറോണ വൈറസ് വ്യാപകമായതോടെ മരിച്ചവരുടെ ശരീരങ്ങള്‍ കണ്ടെത്താന്‍ കഴിയാതെയും ട്രക്കുകളില്‍ സൂക്ഷിച്ചിരിക്കുന്നു. കൊറോണ വൈറസ് വ്യാപകമായതോടെ മരിച്ചവരുടെ ശരീരങ്ങള്‍ വേണ്ടതുപോലെ സൂക്ഷിക്കുന്നതിനാവശ്യമായ സജ്ജീകരണങ്ങള്‍ ഇല്ലെന്ന് ചീഫ് മെഡിക്കല്‍ എക്‌സാമിനേഴ്‌സ് ഓഫീസും അറിയിച്ചു.
നൂറുകണക്കിന് ശരീരങ്ങള്‍ ഇതിനകം ഹാര്‍ട്ട് ഐലന്‍ഡില്‍ സംസ്‌കരിച്ചതായി മേയര്‍ ബില്‍ ഡി ബ്ലാസിയൊ അറിയിച്ചു.
പാന്‍ഡമിക് പൂര്‍ണമായും വിട്ടുമാറുന്നതുവരെ സ്റ്റോറേജ് ഫെസിലിറ്റികളില്‍ തന്നെ മൃതദേഹങ്ങള്‍ സൂക്ഷിക്കുന്നതിനുള്ള ക്രമീകരണങ്ങള്‍ ചെയ്തിട്ടുണ്ടെന്നും മേയര്‍ പറയുന്നു.
ന്യൂയോര്‍ക്കില്‍ മാത്രം കഴിഞ്ഞ ഏപ്രില്‍ 1 ന് 1941 മരണമാണ് സംഭവിച്ചത്.
ഹാര്‍ട്ട് ഐലന്‍ഡില്‍ കൂട്ടമായി മൃതദേഹങ്ങള്‍ അടക്കം ചെയ്തു എന്ന വാര്‍ത്ത വന്നതോടെ ഇനിയും ഇത്തരം സംഭവങ്ങള്‍ ആവര്‍ത്തിക്കാതിരിക്കുന്നതിന് നടപടികള്‍ സ്വീകരിക്കുമെന്നും മേയര്‍ ഉറപ്പുനല്‍കി.
മൃതദേഹം ദഹിപ്പിക്കുന്നതിനുള്ള ചെലവ് ഏറ്റവും കുറഞ്ഞത് 6500 ഡോളറാണെന്ന് ന്യൂയോര്‍ക്ക് സ്‌റ്റേറ്റ് ഫ്യൂണറല്‍ ഡയറക്ടേഴ്‌സ് അസോസിയേഷന്‍ പറയുന്നു. നവംബര്‍ 23 വരെ ന്യൂയോര്‍ക്കില്‍ 278956 കോവിഡ് ബാധിതരും 19537 മരണവും സംഭവിച്ചിട്ടുണ്ട്.
വാര്‍ത്തയും ഫോട്ടോയും : പി.പി.ചെറിയാന്‍
