ഡാലസ്: അടുത്ത ദിവസങ്ങളില്‍ ഡാലസ് കൗണ്ടിയില്‍ കോവിഡ്19 കേസുകള്‍ സാവകാശം വര്‍ധിച്ചുവരുന്ന സാഹചര്യത്തില്‍ നിലവിലുള്ള യെല്ലോ അലര്‍ട്ട് ഏറ്റവും വലിയ അലര്‍ട്ടിന്റെ രണ്ടാം സ്ഥാനത്തുള്ള ഓറഞ്ച് അലര്‍ട്ടിലേക്ക് മാറുന്നതായി ജൂലായ് 23 ന് വൈകീട്ട് ഡാലസ് കൗണ്ടി ജഡ്ജി ക്ലെ ജങ്കിന്‍സ് അറിയിച്ചു.

ജനങ്ങള്‍ കൂടുതല്‍ ഗൗരവത്തോടെ കോവിഡ്19 നെ കാണണമെന്നും ജഡ്ജി അഭ്യര്‍ത്ഥിച്ചു. കഴിഞ്ഞ ദിവസം ഹൂസ്റ്റണ്‍ ഹാരിസ് കൗണ്ടിയിലും ഓറഞ്ച് അലര്‍ട്ട് പ്രഖ്യാപിച്ചിരുന്നു. ഇതുവരെ വാക്‌സിനേറ്റ് ചെയ്യാത്തവര്‍ കൂടുതല്‍ ജാഗ്രത പുലര്‍ത്തണം. മാത്രമല്ല വാക്‌സിനേഷന്‍ സ്വീകരിക്കണമെന്നും ജഡ്ജി അറിയിച്ചു.

അനാവശ്യമായ യാത്രകള്‍ ഒഴിവാക്കണം, കടയില്‍ നിന്നും ഡ്രൈവ് ത്രൂവിലൂടെ സാധനങ്ങള്‍ വാങ്ങിക്കണം, ആഘോഷങ്ങളില്‍ നിന്നും ഒഴിവായിരിക്കണം,  കഴിയുമെങ്കില്‍ മതപരമായ ചടങ്ങുകളില്‍ നിന്നും വലിയ കൂട്ടങ്ങളില്‍ നിന്നും ഒഴിവാക്കണമെന്നും ജഡ്ജി അഭ്യര്‍ത്ഥിച്ചു. ഡാലസ് കൗണ്ടിയില്‍ വെള്ളിയാഴ്ച 434 പുതിയ കേസുകള്‍ സ്ഥിരീകരിക്കുകയും 292 പേരെ ആശുപത്രിയില്‍ പ്രവേശിപ്പിക്കുകയും ചെയ്തിട്ടുണ്ട്.

ഡാലസ് കൗണ്ടിയില്‍ ഇതുവരെ 49.08 ശതമാനം പൂര്‍ണമായും വാക്‌സിനേറ്റ് ചെയ്തിട്ടുണ്ട്. പകുതിയിലധികം പേര്‍ക്ക് കൂടി വാക്‌സിനേഷന്‍ നല്‍കേണ്ടതുണ്ട്. അതിനുള്ള സൗകര്യങ്ങള്‍ പ്രയോജനപ്പെടുത്തി കോവിഡ്19, ഡെല്‍റ്റ വേരിയന്റ് എന്നിവയെ പ്രതിരോധിക്കേണ്ടതാണെന്നും ജഡ്ജി പറഞ്ഞു.

വാര്‍ത്തയും ഫോട്ടോയും : പി.പി.ചെറിയാന്‍