ന്യൂയോര്‍ക്ക്: ആയിരക്കണക്കിന് കുടിയേറ്റക്കാര്‍ക്ക് തങ്ങളുടെ മക്കളുടെ ഭാവിയെക്കുറിച്ചുള്ള ആശങ്ക ഒഴിവാക്കി ന്യൂയോര്‍ക്ക് ഫെഡറല്‍ ജഡ്ജി നിക്കളസ് ഗറൗഫീസ് ഉത്തരവ്.
അമേരിക്കയിലേക്ക് കുടിയേറിയ മാതാപിതാക്കളോടൊപ്പം എത്തിച്ചേര്‍ന്ന കുട്ടികള്‍ക്ക് ഒബാമ ഭരണകൂടം നല്‍കിയിരുന്ന പരിരക്ഷ പൂര്‍ണമായും പുനഃസ്ഥാപിക്കുന്നുവെന്നാണ് വെള്ളിയാഴ്ച ന്യൂയോര്‍ക്ക് ഫെഡറല്‍ ജഡ്ജിയുടെ ഉത്തരവില്‍ വ്യക്തമാക്കിയിരിക്കുന്നത്.
കുട്ടികള്‍ക്ക് അമേരിക്കന്‍ തുടര്‍ വിദ്യാഭ്യാസത്തിനും തൊഴിലെടുക്കുന്നതിന് ഒബാമ ഭരണകൂടം കൊണ്ടുവന്ന ഡിഫേര്‍സ് ആക്ഷന്‍ ഫോര്‍ ചൈല്‍ഡ് ഹുഡ് അറൈവല്‍സ് നിയമം അസ്ഥിരപ്പെടുത്തുന്നതിന് ട്രംപ് ഭരണകൂടം നടപടികള്‍ സ്വീകരിച്ചിരുന്നു. 2017 ലായിരുന്നു ഈ ആക്ട് ഒബാമ നടപ്പിലാക്കിയത്.
2017 ജൂലായില്‍ ഡിപ്പാര്‍ട്ട്‌മെന്റ് ഹോംലാന്റ് സെക്യൂരിറ്റി ആക്ടിങ് സെക്രട്ടറി ചാഡ് വുള്‍ഫ് ഡിഎസിഎ സസ്‌പെന്റ് ചെയ്തത് പൂര്‍ണമായും പുനഃസ്ഥാപിക്കുന്നുവെന്ന് ആറുപേജുള്ള ഉത്തരവില്‍ ജഡ്ജി ചൂണ്ടിക്കാട്ടി. ചാഡ് വുള്‍ഫിന് ഇങ്ങനെ ഒരു ഉത്തരവ് ഇറക്കാനുള്ള അധികാരമില്ലെന്ന് വിധിയില്‍ പറയുന്നു.
വെബ്‌സൈറ്റില്‍ ഉത്തരവിന്റെ പൂര്‍ണരൂപം ഡിസംബര്‍ 7 ന് പൊതുജനങ്ങള്‍ക്ക് കാണുംവിധം പരസ്യപ്പെടുത്തണമെന്നും പുതിയ അപേക്ഷകള്‍ സ്വീകരിച്ചുതുടങ്ങണമെന്നും പഴയതുപോലെ രണ്ടുവര്‍ഷത്തെ വര്‍ക് പെര്‍മിറ്റ് പുതുക്കി നല്‍കണമെന്നും ഉത്തരവില്‍ നിര്‍ദേശിച്ചിട്ടുണ്ട്.
വാര്‍ത്തയും ഫോട്ടോയും : പി.പി.ചെറിയാന്‍
