വാഷിങ്ടണ്‍: അമേരിക്കയുടെ എഫ് 16 യുദ്ധവിമാനങ്ങള്‍ പാകിസ്താന് നല്‍കുന്നതില്‍ സബ്‌സിഡി നല്‍കില്ലെന്ന് അമേരിക്ക. അമേരിക്കയുടെ പണമുപയോഗിച്ച് പാകിസ്താന് യുദ്ധവിമാനങ്ങള്‍ വാങ്ങുന്നതിനെതിരെ നേരത്തെ വലിയ വിമര്‍ശമുയര്‍ന്നിരുന്നു. അമേരിക്കന്‍ സെനെറ്റില്‍ ഈ വിഷയം ചര്‍ച്ചയായതോടെയാണ് സര്‍ക്കാര്‍ നിലപാട് വ്യക്തമാക്കിയത്.
പാകിസ്താന് തങ്ങളുടെ ദേശീയ ഫണ്ട് ഉപയേഗിച്ച് പ്രതിരോധ ആവശ്യങ്ങള്‍ നിറവേറ്റണമെന്ന് അമേരിക്ക ആവശ്യപ്പെട്ടു. 700 മില്യണ്‍ അമേരിക്കന്‍ ഡോളറിനാണ് എട്ട് യുദ്ധവിമാനങ്ങള്‍ വില്‍ക്കാന്‍ തീരുമാനിച്ചിരുന്നത്. ഇന്ത്യ ഇതിനെ ശക്തമായി എതിര്‍ത്തിരുന്നു.
അമേരിക്കന്‍ നിയമ നിര്‍മാണ സഭയിലെ അംഗങ്ങള്‍ ബോബ് കോര്‍ക്കറുടെ നേതൃത്വത്തില്‍ യുദ്ധവിമാന കച്ചവടത്തെ ശക്തമായി എതിര്‍ത്തിരുന്നു. പാകിസ്താന് തീവ്രവാദത്തെ കാര്യക്ഷമമായി കൈകാര്യംചെയ്യുന്നില്ലെന്ന് അവര്‍ ആരോപിച്ചു.
