ന്യൂയോര്‍ക്ക്:   ഐക്യരാഷ്ട്ര സഭാ പൊതുസഭയിൽ പാകിസ്താനെതിരെ ആഞ്ഞടിച്ച് വിദേശകാര്യ മന്ത്രി സുഷമാ സ്വരാജ്.

കശ്മീര്‍ ഇന്ത്യയുടെ അവിഭാജ്യ ഘടകമാണ്. അത് എന്നും അങ്ങനെ തന്നെയായിരിക്കുമെന്നും കശ്മീര്‍ എന്ന സ്വപ്നം പാകിസ്താന്‍ ഉപേക്ഷിക്കണമെന്നും സുഷമാ സ്വരാജ് വ്യക്തമാക്കി.

സുഷമാ സ്വരാജിന്റെ പ്രസംഗത്തിൽ നിന്ന്

  • മാനവികതയ്ക്കെതിരായ ഏറ്റവും വലിയ ഭീഷണിയാണ് ഭീകരവാദം. ഭീകരവാദത്തിനെതിരെ നിലകൊള്ളാത്തവരെ ഒറ്റപ്പെടുത്തണം​

 

  • ഭീകരതയ്ക്കതിരെ ലോകം ഒന്നിച്ച് പ്രവര്‍ത്തിക്കണം. ആരാണ് ഭീകരരെ സംരക്ഷിക്കുന്നതെന്ന് എല്ലാവര്‍ക്കുമറിയാം. ആരാണ് ഭീകരര്‍ക്ക് ധനസഹായം നല്‍കുന്നത്? ഇതേ ചോദ്യമാണ് അഫ്ഗാനിസ്ഥാനും ഇതേ വേദിയില്‍ കുറച്ച് ദിവസങ്ങള്‍ക്ക് മുമ്പ് ഉയര്‍ത്തിയത്.

 

  • മുന്‍വിധികളില്ലാതെ കഴിഞ്ഞ രണ്ട് വര്‍ഷം ഇന്ത്യ പാകിസ്താനുമായി സൗഹാര്‍ദത്തിന് ശ്രമിച്ചു.

 

  • പാകിസ്താന്‍ പ്രധാനമന്ത്രിക്ക് ഞങ്ങള്‍ ഈദ് ആശംസകള്‍ അയച്ചു, ക്രിക്കറ്റ് ടീമിന് വിജയാശംസകള്‍ നേര്‍ന്നു, അദ്ദേഹത്തിന് നല്ല ആരോഗ്യവും നന്മയും നേര്‍ന്നു.

 

  • എന്നാല്‍ ഞങ്ങള്‍ക്ക് എന്താണ് തിരിച്ച് കിട്ടിയത്. പഠാന്‍കോട്ടും ബഹാദൂര്‍ അലിയും ഉറിയും. ഇന്ത്യയുടെ കസ്റ്റഡിയിലുള്ള തീവ്രവാദിയാണ് ബഹാദൂര്‍ അലി. അയാളുടെ മൊഴി അതിര്‍ത്തി കടന്നുള്ള പാക് തീവ്രവാദത്തിന്റെ ജീവിക്കുന്ന തെളിവാണ്.

 

  • ഭീകരര്‍ക്ക് അഭയം നല്‍കുന്നവരെ നമ്മള്‍ക്ക് തിരിച്ചറിയേണ്ടതുണ്ട്. അവര്‍ക്ക് എങ്ങനെയാണ് അതിന് സാധിക്കുന്നത്. ഭീകരതെയെ വേരോടെ പിഴുതെറിയണം.  

 

  • ചില്ലുമേടകളില്‍ ഇരിക്കുന്നവര്‍ മറ്റുള്ളവര്‍ക്ക് നേരെ കല്ലെറിയരുതെന്ന് നവാസ് ഷെരീഫിനെ പേരെടുത്ത് പറയാതെ സുഷമ വിമര്‍ശിച്ചു.

 

  • ഭീകരവാദത്തിന്റെ വിത്ത് വിതയ്ക്കുന്നവര്‍ക്ക് മോശം വിളവാണ് ലഭിക്കാന്‍ പോകുന്നത്. സാത്താന്റെ ഈ വിത്ത് ഇന്ന് ഒരു ഭീകരസത്വമായി മാറി.

 

  • ഭീകരവാദികളെ ശിക്ഷിക്കാന്‍ അന്താരാഷ്ട്ര കൂട്ടായ്മ ആവശ്യമാണ്.

 

  • ഇന്ത്യ ചര്‍ച്ചകള്‍ക്ക് മുന്‍കൂട്ടി തീരുമാനിച്ച ഉപാധികളുമായാണ് വരുന്നതെന്നാണ് പാക് പ്രധാനമന്ത്രി ഇവിടെ ആരോപിച്ചത്.എന്നാല്‍ എന്താണ് ആ ഉപാധികളെന്ന് അദ്ദേഹം വ്യക്തമാക്കണം.

 

  • മറ്റുള്ളവര്‍ മനുഷ്യാവകാശ ധ്വംസനങ്ങള്‍ നടത്തുന്നവര്‍ ബലൂചിസ്താന്‍ ഉള്‍പ്പെടെയുള്ള സ്വന്തം രാജ്യത്ത് എന്താണ് നടത്തുന്നതെന്ന് കാണണം.

 

  • തീവ്രവാദത്തിന് പിന്നില്‍ ആരാണെന്നും ആരാണ് അതില്‍ നിന്ന് നേട്ടമുണ്ടാക്കുന്നതെന്നും അറിയേണ്ടതുണ്ട്. തീവ്രവാദികള്‍ക്ക് ബാങ്കുകളോ ആയുധ ഫാക്ടറികളോ ഇല്ല. അപ്പോള്‍ ആരാണ് അവര്‍ക്ക് ആയുധങ്ങളും സങ്കേതങ്ങളും നല്‍കുന്നത്

 

  • വ്യക്തികളേയോ രാജ്യങ്ങളേയോ മാത്രമല്ല ഇപ്പോള്‍ ഭീകരവാദം ബാധിക്കുന്നത്. അത് മനുഷ്യകുലത്തിനെതിരെയുള്ള കുറ്റകൃത്യമാണ്.

 

  • കാബൂള്‍, ധാക്ക, ഇസ്താംബൂള്‍, മൊഗാദിഷു, ബ്രസല്‍സ്, ബാങ്കോക്ക്, പാരീസ്, പഠാന്‍കോട്ട്, ഉറി എന്നിങ്ങനെ ഈ വര്‍ഷമുണ്ടായ ഭീകരാക്രമണങ്ങളും സിറിയയിലേയും ഇറാഖിലേയും നിത്യേനയുള്ള ആക്രമണങ്ങളും ഈ ദുഷ്ട ശക്തികളെ ഇതുവരേയും നശിപ്പിക്കാനായില്ല എന്നുള്ളതിന്റെ തെളിവാണ്.