മെല്‍ബണ്‍: ഓസ്‌ട്രേലിയയില്‍ ഇന്ത്യന്‍ വംശജനായ ബസ് ഡ്രൈവറെ ജീവനോടെ തീകൊളുത്തി കൊന്നു. ഓസ്‌ട്രേലിയയിലെ ബ്രിസ്‌ബെയ്‌നിലാണ് സംഭവം. യാത്രക്കാര്‍ നോക്കിനില്‍ക്കെയാണ് മന്‍മീത് അലിഷറെന്ന (29) ആളെയാണ്‌ കൊലപ്പെടുത്തിയത്. 

യാത്രക്കാര്‍ കയറ്റാനായി വാഹനം നിര്‍ത്തിയ സമയത്തായിരുന്നു ആക്രമണമെന്ന് പോലീസ് പറഞ്ഞു. കൊലപാതകിയെന്ന് സംശയിക്കുന്ന ആളെ തൊട്ടടുത്ത ബസ് സ്റ്റോപ്പില്‍ നിന്നും പോലീസ് പിടികൂടി. എന്നാല്‍ കൊലപാതകത്തിന്റെ കാരണമെന്താണെന്ന് വ്യക്തമായിട്ടില്ല.

മന്‍മീത് ആക്രമിക്കപ്പെടുന്ന സമയത്ത് ബസില്‍ യാത്രക്കാരും ഉണ്ടായിരുന്നു. ഇവരെ ഉടന്‍തന്നെ രക്ഷാവാതിലിലൂടെ പുറത്തെത്തിച്ചു. പുക ശ്വസിച്ചതിനെ തുടര്‍ന്ന് ശ്വാസ തടസം നേരിട്ട ഏതാനുംപേരെ ആശുപത്രിയില്‍ പ്രവേശിപ്പിക്കുകയും ചെയ്തു. 

ഓസ്‌ട്രേലിയയിലെ പഞ്ചാബികള്‍ക്കിടയില്‍ അറിയപ്പെടുന്ന ഗായകന്‍ കൂടിയായിരുന്നു മന്‍മീത് അലിഷറെന്ന് റിപ്പോര്‍ട്ടുകള്‍ പറയുന്നു.