.jpg?$p=8a7b7b1&f=16x10&w=856&q=0.8)
.
ഡാലസ്: ഡെമോക്രാറ്റിക് പാര്‍ട്ടി ടെക്‌സാസ് അധ്യക്ഷനായി ഗില്‍ബര്‍ട്ടോ ഹിനൊയോസ വീണ്ടും തിരഞ്ഞെടുക്കപ്പെട്ടു. ഡെമോക്രാറ്റിക് പാര്‍ട്ടി സംസ്ഥാന സമ്മേളനം രണ്ടു ദിവസമായി ഡാലസില്‍ നടക്കുകയായിരുന്നു. ജൂലായ് 16 നായിരുന്നു തിരഞ്ഞെടുപ്പ്, കെ ബെയ്‌ലി ഹച്ചിസണ്‍ കണ്‍വെന്‍ഷന്‍ സെന്ററിലായിരുന്നു സമ്മേളനത്തിന് വേദി ഒരുക്കിയിരുന്നത്.
2012 മുതല്‍ സംസ്ഥാന അധ്യക്ഷനായി തുടരുന്നതിനാല്‍ പുതിയൊരാള്‍ തിരഞ്ഞെടുക്കപ്പെടണമെന്ന നേതാക്കളുടെ താത്പര്യം പരിഗണിക്കാതെയാണ് ഡെലിഗേറ്റുകള്‍ വീണ്ടും സംസ്ഥാന അധ്യക്ഷ പദം ഗില്‍ബര്‍ട്ടൊയെ ഏല്പിച്ചത്. രണ്ടാം റൗണ്ട് വോട്ടെടുപ്പിലാണ് ഗില്‍ബര്‍ട്ടൊയുടെ വിജയം ഉറപ്പിച്ചത്.
ശനിയാഴ്ച തിരഞ്ഞെടുപ്പില്‍ 58 ശതമാനം ഡെലിഗേറ്റുകള്‍ ഗില്‍ബര്‍ട്ടൊക്ക് അനുകൂലമായി വോട്ടുചെയ്തപ്പോള്‍ എതിരാളി കിം ദാല്‍സന് 40 ശതമാനം വോട്ടുകള്‍ മാത്രമാണ് നേടാന്‍ കഴിഞ്ഞത്.
കാമറോണ്‍ കൗണ്ടി മുന്‍ ജഡ്ജിയായിരുന്ന ഗില്‍ബര്‍ട്ടൊ സംസ്ഥാനം മുഴുവന്‍ സഞ്ചരിച്ച് ഡെമോക്രാറ്റിക് പാര്‍ട്ടിയെ ശക്തിപ്പെടുത്തുന്നതിന് നേതൃത്വം നല്‍കിയിരുന്നു.
ഈ വര്‍ഷം ടെക്‌സാസില്‍ നടക്കുന്ന ഗവര്‍ണര്‍ തിരഞ്ഞെടുപ്പില്‍ പാര്‍ട്ടി സ്ഥാനാര്‍ത്ഥി ബെറ്റൊ ഒ റൂര്‍ക്കെയുടെ വിജയം ഉറപ്പിക്കേണ്ട ഉത്തരവാദിത്വം കൂടി പുതിയ പ്രസിഡന്റില്‍ നിക്ഷിപ്തമാണ്. നിലവിലുള്ള ഗവര്‍ണര്‍ ഗ്രേഗ് ഏബര്‍ട്ടിന് കനത്ത വെല്ലുവിളിയാണ് ബെറ്റോ ഇത്തവണ ഉയര്‍ത്തിയിരിക്കുന്നത്.
വാര്‍ത്തയും ഫോട്ടോയും : പി.പി.ചെറിയാന്‍
.jpg?$p=6a12f4a&f=1x1&w=100&q=0.8)
വാര്‍ത്തകളോടു പ്രതികരിക്കുന്നവര്‍ അശ്ലീലവും അസഭ്യവും നിയമവിരുദ്ധവും അപകീര്‍ത്തികരവും സ്പര്‍ധ വളര്‍ത്തുന്നതുമായ പരാമര്‍ശങ്ങള്‍ ഒഴിവാക്കുക. വ്യക്തിപരമായ അധിക്ഷേപങ്ങള്‍ പാടില്ല. ഇത്തരം അഭിപ്രായങ്ങള്‍ സൈബര്‍ നിയമപ്രകാരം ശിക്ഷാര്‍ഹമാണ്. വായനക്കാരുടെ അഭിപ്രായങ്ങള്‍ വായനക്കാരുടേതു മാത്രമാണ്, മാതൃഭൂമിയുടേതല്ല. ദയവായി മലയാളത്തിലോ ഇംഗ്ലീഷിലോ മാത്രം അഭിപ്രായം എഴുതുക. മംഗ്ലീഷ് ഒഴിവാക്കുക..