15 February 2021, 09:13 AM IST

1 min read

Read later

തെരുവുനായയെ റോഡിലൂടെ കെട്ടിവലിക്കുന്നു

കട്ടപ്പന: തെരുവുനായയെ തല്ലിച്ചതച്ചശേഷം കയറുകെട്ടി റോഡിലൂടെ കെട്ടിവലിച്ചു. കട്ടപ്പന കൈരളി ജങ്ഷനില്‍ ഞായറാഴ്ച വൈകീട്ടായിരുന്നു സംഭവം. കൈരളി ജങ്ഷന്‍ മാണ്ടിയില്‍ ഷാബു (51)വാണ് മിണ്ടാപ്രാണിയോട് ക്രൂരത കാണിച്ചത്. നായയെ കെട്ടിവലിക്കുന്ന ദൃശ്യങ്ങള്‍ സമൂഹമാധ്യമങ്ങളിലും പ്രചരിച്ചു.

ഷാബു നായയെ കെട്ടിവലിക്കുന്നതുകണ്ട സിദ്ധാര്‍ത്ഥ് എന്ന യുവാവാണ് ദൃശ്യം മൊബൈലില്‍ പകര്‍ത്തിയത്. ഇക്കാര്യം നാട്ടുകാരെയും അറിയിച്ചു. നായയെ ഷാബു വടികൊണ്ട് അടിച്ചശേഷം കയറുകൊണ്ട് കെട്ടി റോഡിലൂടെ വലിക്കുകയായിരുന്നുവെന്ന് കണ്ടുനിന്നവര്‍ പറഞ്ഞു. റോഡിലൂടെ 20 മീറ്ററോളം ഇയാള്‍ നായയെ കെട്ടിവലിച്ചു. സാരമായി പരിക്കേറ്റ നായയെ പ്രാഥമിക ശുശ്രൂഷ നല്‍കിയ ശേഷം, ഏറ്റെടുക്കാന്‍ സന്നദ്ധരായ യുവാക്കളുടെ സംരക്ഷണത്തില്‍ വിട്ടു.

തന്നെ ആക്രമിക്കാന്‍ശ്രമിച്ച നായയെ സ്വയരക്ഷയ്ക്കായി കുടുക്കിട്ട് പിടിക്കുകയായിരുന്നുവെന്ന് ഷാബു പറയുന്നു. പ്രദേശവാസികള്‍ വിവരം അറിയിച്ചതിനെ തുടര്‍ന്ന് സ്ഥലത്തെത്തിയ കട്ടപ്പന പോലീസ് ഷാബുവിനെ അറസ്റ്റ് ചെയ്തു. മൃഗങ്ങളോടുള്ള ക്രൂരത തടയല്‍ അടക്കമുള്ള വകുപ്പുകള്‍ പ്രകാരമാണ് അറസ്റ്റ് ചെയ്തത്.

ഡിസംബര്‍ 12-ന് നെടുമ്പാശേരി അത്താണിക്ക് സമീപം നായയെ കാറില്‍ കെട്ടിയിട്ട് റോഡിലൂടെ വലിച്ചിഴച്ചത് വലിയ വിവാദമായിരുന്നു.