ശ്രീനിവാസന്‍ വധം: ഒളിവിലുള്ള പ്രതിക്ക് എല്ലാമാസവും പണമെത്തി, അക്കൗണ്ടുകള്‍ മരവിപ്പിച്ചു, Sreenivasan murder case financial assistance bank account

17 July 2022, 08:09 AM IST

ഡല്‍ഹി ബോഗല്‍ലൈനിലെ ബാങ്കിലുള്ള എസ്.ഡി.പി.ഐ. കേന്ദ്രകമ്മിറ്റിയുടെ അക്കൗണ്ടില്‍നിന്നാണ് എല്ലാ മാസവും അവസാനത്തെ ആഴ്ചയില്‍ അബ്ദുള്‍റഷീദിന് 13,200 രൂപ വീതം അയച്ചുകൊടുത്തിരുന്നതെന്ന് പോലീസ് പറയുന്നു.

ശ്രീനിവാസൻ/ അക്രമി സംഘം എത്തുന്നതിന്റെ സിസിടിവി ദൃശ്യങ്ങളിൽ നിന്ന്

പാലക്കാട്: ആര്‍.എസ്.എസ്. മുന്‍ പ്രചാരകന്‍ ശ്രീനിവാസനെ കൊലപ്പെടുത്തിയ കേസിലെ മുഖ്യപ്രതി ഒളിവിലുള്ള പട്ടാമ്പി ഞാങ്ങാട്ടിരി കിഴക്കേക്കരവീട്ടില്‍ അബ്ദുള്‍റഷീദിന്റെ (32) ബാങ്ക് അക്കൗണ്ടിലേക്ക് എസ്.ഡി.പി.ഐ.യുടെ ഡല്‍ഹി ഓഫീസില്‍നിന്ന് എല്ലാമാസവും പണം എത്തിയിരുന്നതായി അന്വേഷണസംഘം കണ്ടെത്തി. ശ്രീനിവാസന്‍ വധത്തിന് അടുത്തദിവസവും പണമെത്തിയിരുന്നതായി ബാങ്ക് അക്കൗണ്ട് രേഖകള്‍ വ്യക്തമാക്കുന്നു. പോലീസ് നല്‍കിയ അപേക്ഷയെത്തുടര്‍ന്ന് ബന്ധപ്പെട്ട അക്കൗണ്ടുകള്‍ മരവിപ്പിച്ചു.

കേസിലെ 11-ാം പ്രതിയാണ് പോപ്പുലര്‍ഫ്രണ്ട് പട്ടാമ്പി ഏരിയാ സെക്രട്ടറിയായ അബ്ദുള്‍ റഷീദ്. ഡല്‍ഹി ബോഗല്‍ലൈനിലെ ബാങ്കിലുള്ള എസ്.ഡി.പി.ഐ. കേന്ദ്രകമ്മിറ്റിയുടെ അക്കൗണ്ടില്‍നിന്നാണ് എല്ലാ മാസവും അവസാനത്തെ ആഴ്ചയില്‍ അബ്ദുള്‍റഷീദിന് 13,200 രൂപ വീതം അയച്ചുകൊടുത്തിരുന്നതെന്ന് പോലീസ് പറയുന്നു. പട്ടാമ്പിയിലുള്ള റഷീദിന്റെ ബാങ്ക് അക്കൗണ്ടിലേക്കാണ് പണം ലഭിച്ചിരുന്നത്.

ഏപ്രില്‍ 16-നാണ് ശ്രീനിവാസന്‍ കൊല്ലപ്പെടുന്നത്. അന്ന് ബി.ജെ.പി. ഓഫീസിന് മുന്നിലൂടെ കൊലയാളിസംഘത്തിന് വഴിതെളിച്ച് കടന്നുപോയ ചുവന്നകാര്‍ ഓടിച്ചിരുന്നത് അബ്ദുള്‍ റഷീദായിരുന്നു. ഇയാളുടെ അക്കൗണ്ടിലേക്ക് 19-ാം തീയതി 13,200 രൂപ വന്നതായി പോലീസ് കണ്ടെത്തി. അക്കൗണ്ടിലേക്ക് മൂന്ന് വ്യക്തികളും തുക അയച്ചിട്ടുണ്ട്. ഇതില്‍ ഒരാള്‍ 15,000 രൂപയാണ് നല്‍കിയെതന്നും പോലീസ് കണ്ടെത്തി. കൃത്യംനടന്ന് മൂന്ന് ദിവസത്തിനുള്ളില്‍ തന്നെ പണമെത്തിയത് കൊലയാളികള്‍ക്ക് സാമ്പത്തികസഹായം ചെയ്യുകയെന്ന ഉദ്ദേശ്യത്തോടെയാണെന്ന് പോലീസ് വിലയിരുത്തുന്നു. ജില്ലാ ആശുപത്രിക്ക് സമീപത്തുനടന്ന ചര്‍ച്ചയ്ക്കിടെ കൊലപാതകം ആസൂത്രണംചെയ്തതും കൊലയാളികളെ നിശ്ചയിച്ചതും വാഹന-സാമ്പത്തിക സഹായങ്ങള്‍ ഏര്‍പ്പെടുത്തിയതും റഷീദാണെന്ന് പോലീസ് പറഞ്ഞു.

Content Highlights: Sreenivasan murder case financial assistance bank account

ഇത് പരസ്യ ഫീച്ചറാണ്. മാതൃഭൂമി.കോം ഈ പരസ്യത്തിലെ അവകാശവാദങ്ങളെ ഏറ്റെടുക്കുന്നില്ല. പരസ്യത്തിൽ ഉന്നയിക്കുന്ന അവകാശവാദങ്ങൾക്ക് ഉപോദ്ബലകമായ വസ്തുതകൾ പരസ്യദാതാക്കളുമായി ബന്ധപ്പെട്ട് പരിശോധിച്ചു ബോധ്യപ്പെട്ട ശേഷം മാത്രം ഇടപാടുകൾ നടത്തുക. പരാതികൾ ഉണ്ടെങ്കിൽ ഇവിടെ രേഖപ്പെടുത്താവുന്നതാണ്. (feedback@mpp.co.in)