തട്ടിപ്പിന്റെ മാസ്റ്റര്‍ ബ്രെയിന്‍, റാണയ്ക്ക് വിനയായത് ആ വോയ്‌സ് ക്ലിപ്പും നിക്ഷേപകരുടെ യോഗവും

നിക്ഷേപമോ അതിന്റെ റിട്ടേണോ കിട്ടാത്തതിനെ തുടര്‍ന്ന് പ്രവീണിനും സെയ്ഫ് ആന്‍ഡ് സ്‌ട്രോങ് സ്ഥാപനത്തിനുമെതിരേ മാസങ്ങള്‍ക്ക് മുമ്പേ ആക്ഷേപങ്ങള്‍ ഉയര്‍ന്നിരുന്നു. എന്നാല്‍, ഇത് താല്‍ക്കാലിക പ്രതിസന്ധിയാണെന്ന മറുപടികള്‍ നല്‍കിയ പ്രതീക്ഷയും വമ്പന്‍ സ്ഥാപനത്തിനെതിരേ പരാതി നല്‍കുന്നതിലുള്ള ആശങ്കയും ഉള്‍പ്പെടെയുള്ള കാരണങ്ങള്‍ നിക്ഷേപകരെ നിയമപരമായി മുന്നോട്ടുപോകുന്നതില്‍നിന്നും തടയുകയായിരുന്നു. നിക്ഷേപകരുടെ ഭാഗത്തുനിന്ന് സമ്മര്‍ദ്ദമേറിയതോടെ ഡിസംബര്‍ 27ന് തൃശൂരിലെ റാണാസ് റിസോര്‍ട്ടില്‍ പ്രവീണ്‍ നിക്ഷേപകരുടെ യോഗം വിളിച്ചു. ഈ യോഗമാണ് റാണയ്‌ക്കെതിരേ നിക്ഷേപകരുടെ കൂട്ടായ്മ ഉണ്ടാകാന്‍ കാരണമായത്.

ഇത്രയേറെ പേര്‍ക്ക് പണം കിട്ടാനുണ്ടെന്ന് നിക്ഷേപകര്‍ മനസ്സിലാക്കുന്നത് യോഗത്തിന് എത്തിയപ്പോഴാണ്. യോഗത്തില്‍വെച്ച് ഇവര്‍ പരസ്പരം നമ്പറുകള്‍ കൈമാറുകയും ഗ്രൂപ്പ് സൃഷ്ടിക്കുകയും ചെയ്തു. പണം ലഭിക്കില്ലെന്ന് ഉറപ്പായതോടെ ഇവര്‍ 'സെയ്ഫ് ആന്‍ഡ് സ്‌ട്രോങ് കസ്റ്റമര്‍ വെല്‍ഫെയര്‍ അസോസിയേഷന്‍' എന്ന പേരില്‍ സംഘടന രൂപീകരിക്കുകയും ചെയ്തു. ജനുവരി ഒമ്പതിന് രജിസ്റ്റര്‍ ചെയ്ത സംഘടനയില്‍ നിലവില്‍ നൂറിലേറെ നിക്ഷേപകര്‍ അംഗങ്ങളായുണ്ട്. കേസ് നല്‍കുന്നത് ഉള്‍പ്പെടെയുള്ള കാര്യങ്ങളില്‍ സംഘടന കാര്യമായ ഇടപെടലുകള്‍ നടത്തുന്നുണ്ട്. നിലവില്‍ അമ്പതിലേറെ അംഗങ്ങള്‍ റാണയ്‌ക്കെതിരേ കേസ് കൊടുത്തുകഴിഞ്ഞു.

'പ്രവീണ്‍ റാണയ്ക്ക് പറ്റിയ അബദ്ധമായിരുന്നു ഡിസംബര്‍ 27ലെ യോഗം,' സെയ്ഫ് ആന്‍ഡ് സ്‌ട്രോങ് കസ്റ്റമര്‍ വെല്‍ഫെയര്‍ അസോസിയേഷന്‍ പ്രസിഡന്റ് രാജന്‍ ജോസഫ് പറയുന്നു. 'പണം നഷ്ടമായവര്‍ക്ക് ഒന്നിച്ചുകാണാന്‍ അവസരമുണ്ടായത് ഈ യോഗത്തിലാണ്. അന്ന് ഇതുവരെയുള്ള കുടിശ്ശിക തീര്‍ക്കുകയോ നിക്ഷേപം തിരിച്ചുതരികയോ ചെയ്യണമെന്ന നിലപാടില്‍ ഞങ്ങള്‍ ഉറച്ചുനിന്നു. എന്നാല്‍, ബിസിനസില്‍ ചില നഷ്ടങ്ങളുണ്ടായെന്നും ഇപ്പോള്‍ പണം തരാന്‍ സാധിക്കില്ലെന്നുമായിരുന്നു റാണയുടെ മറുപടി. തീരുമാനമുണ്ടാകാതെ പോകാനാവില്ലെന്ന് പറഞ്ഞതോടെ ഒടുവില്‍ പോലീസ് മധ്യസ്ഥതയില്‍ എല്ലാവര്‍ക്കും പോസ്റ്റ് ഡേറ്റഡ് ചെക്ക് നല്‍കുമെന്ന ഉറപ്പില്‍ ഒത്തുതീര്‍പ്പില്‍ എത്തുകയായിരുന്നു'- രാജന്‍ ജോസഫ് വ്യക്തമാക്കി.

ജനുവരി പത്തിനു മുമ്പായി ചെക്ക് നല്‍കാമെന്നായിരുന്നു പ്രവീണ്‍ യോഗത്തില്‍ നല്‍കിയിരുന്ന ഉറപ്പ്. തങ്ങളുടെ പണം നേരായ വഴിക്ക് തിരിച്ചുകിട്ടുമെന്ന പ്രതീക്ഷ നിക്ഷേപകര്‍ക്ക് കുറവായിരുന്നെങ്കിലും പോലീസ് ഇടപെടലില്‍ നല്‍കിയ ഉറപ്പ് പാലിക്കപ്പെടുമെന്ന വിശ്വാസം ഉണ്ടായിരുന്നു. മാത്രമല്ല, പണം നേരിട്ട് നല്‍കിയവര്‍ക്ക് രസീത് മാത്രമാണ് നല്‍കിയിരുന്നത്. ചെക്ക് ലഭിക്കുന്നത് നിയമപരമായി ഗുണം ചെയ്യുമെന്നതും ചെക്ക് വാങ്ങുക എന്ന ഒത്തുതീര്‍പ്പിന് വഴങ്ങാന്‍ നിക്ഷേപകരെ പ്രേരിപ്പിച്ചു. എന്നാല്‍, അടുത്ത ദിവസം വന്ന റാണയുടെ വോയ്‌സ് ക്ലിപ്പ് അവസാന പ്രതീക്ഷകളും തല്ലിക്കെടുത്തുന്നതായിരുന്നു.

താനും സെയ്ഫ് ആന്റ് സ്‌ട്രോങ്ങിലെ സ്റ്റാഫ് ആണെന്നും അതിനാല്‍ മറ്റുള്ളവര്‍ രാജിവെച്ചതുപോലെ കമ്പനിയില്‍നിന്ന് രാജിവെക്കുയാണെന്നുമായിരുന്നു പ്രവീണ്‍ റാണ ശബ്ദരേഖയിലൂടെ നിക്ഷേപകരെ അറിയിച്ചത്. സെയ്ഫ് ആന്റ് സ്‌ട്രോങ് ഒരു പലിശക്കമ്പനിയല്ല. സ്റ്റാഫിനും നിക്ഷേപകര്‍ക്കും കമ്പനിയോട് ഉത്തരവാദിത്തമുണ്ട്. ഡിസംബര്‍ 27ലെ യോഗത്തിലുണ്ടായ അനുഭവം ബുദ്ധിമുട്ടുണ്ടാക്കി. അതിനാല്‍ താല്‍ക്കാലികമായി രാജിവെക്കുകയാണെന്നും തുടര്‍ ചര്‍ച്ചകള്‍ക്ക് ശേഷം നിക്ഷേപകര്‍ ആവശ്യപ്പെട്ടാല്‍ തിരിച്ചുവരാമെന്നും പ്രവീണ്‍ പറയുന്നു. നിക്ഷേപകരും ഉപഭോക്താക്കളും ചേര്‍ന്ന് കമ്പനിയെ നല്ല നിലയില്‍ മുന്നോട്ടുകൊണ്ടുപോകണമെന്നും ഇയാള്‍ ആഹ്വാനം ചെയ്യുന്നുണ്ട്. ജനുവരി 10ന് മുമ്പ് നിക്ഷേപകരെ വിളിക്കുമെന്നും ഇനിയും സെയ്ഫ് ആന്‍ഡ് സ്‌ട്രോങ് ശക്തമാക്കി താന്‍ തിരിച്ചുവരുമെന്നും ആത്മവിശ്വാസം പ്രകടിപ്പിച്ചാണ് റാണ ശബ്ദ സന്ദേശം അവസാനിപ്പിക്കുന്നത്.

സെയ്ഫ് ആന്റ് സ്‌ട്രോങ് നിക്ഷേപത്തട്ടിപ്പ് കേസിലെ 'ദൈവത്തിന്റെ കൈ' ആയിരുന്നു ഇതെന്ന് സ്ഥാപനത്തിനെതിരേ ആദ്യപരാതി നല്‍കിയ ഗുരുവായൂര്‍ സ്വദേശി ജെറി മിഡില്‍ടണ്‍ പറയുന്നു. വോയ്‌സ് ക്ലിപ്പ് വന്നതോടെ പണം ലഭിക്കില്ലെന്ന കാര്യം ഉറപ്പായി. ഇതാണ് നിയമപരമായി നീങ്ങാനുള്ള തീരുമാനത്തിലേക്ക് എത്തിച്ചത്. ജനുവരി പത്ത് വരെ നിക്ഷേപകര്‍ ചെക്കിനായി കാത്തിരിക്കുകയായിരുന്നു. ഇതിനിടെ കൂടുതലൊന്നും പറയാതെ റാണ വിദേശത്തേക്ക് മുങ്ങിയിരുന്നെങ്കില്‍ ഒന്നും ചെയ്യാനാവുമായിരുന്നില്ലെന്നും ജെറി മാതൃഭൂമി ഡോട്ട് കോമിനോട് പറഞ്ഞു.