03 May 2021, 05:56 PM IST

1 min read

Read later

ജി.സുകുമാരൻ നായർ, മുഖ്യമന്ത്രി പിണറായി വിജയൻ |ഫോട്ടോ:മാതൃഭൂമി

തിരുവനന്തപുരം : ജനങ്ങള്‍ അവരുടെ ജീവിതാനുഭവത്തെ അടിസ്ഥാനപ്പെടുത്തിയാണ് വോട്ട് ചെയ്തതെന്നു പിണറായി വിജയന്‍. അതിനാലാണ് എന്‍എസ്എസ് ജനറല്‍ സെക്രട്ടറി സുകുമാരന്‍ നായരുടെ പരാമര്‍ശം കൊണ്ട് എല്‍ഡിഎഫിനൊപ്പം നില്‍ക്കുകയെന്ന ജനങ്ങളുടെ തീരുമാനത്തെ അട്ടിമറിക്കാന്‍ കഴിയാതിരുന്നതെന്നും അദ്ദേഹം പറഞ്ഞു. വാര്‍ത്താ സമ്മേളനത്തില്‍ മാധ്യമപ്രവര്‍ത്തകരുടെ ചോദ്യത്തിന് മറുപടി പറയുകയായിരുന്നു മുഖ്യമന്ത്രി.

"അയ്യപ്പനും സകല ദൈവഗണങ്ങളും സര്‍ക്കാരിനൊപ്പമുണ്ടെന്നാണ് തിരഞ്ഞെടുപ്പ് ഫലം വരുമ്പോള്‍ മനസ്സിലാക്കാന്‍ കഴിയുന്നത്. എന്‍എസ്എസ് സെക്രട്ടറി സുകുമാരന്‍നായര്‍ക്കുള്ള മറുപടി കൂടിയല്ലേ തിരഞ്ഞെടുപ്പ് ഫലമെന്ന് താങ്കള്‍ക്ക് തോന്നുന്നുണ്ടോ" എന്നായിരുന്നു മാധ്യമപ്രവര്‍ത്തകന്റെ ചോദ്യം. അതിന് മുഖ്യമന്ത്രി പറഞ്ഞ മറുപടി ഇതാണ്.

"ഇതെല്ലാം വ്യക്തമല്ലേ. നന്നേ കാലത്തെ വോട്ട് ചെയ്ത് എല്‍ഡിഎഫിന്റെ തുടര്‍ഭരണം പാടില്ല എന്ന് വിരലുയര്‍ത്തി പറയുമ്പോള്‍ നിങ്ങളുടെ വോട്ട് എല്‍ഡിഎഫിനെതിരായാണ് എന്ന സന്ദേശമാണ് സുകുമാരന്‍ നായര്‍ ഉദ്ദേശിച്ചത്. എന്നാല്‍ ജനങ്ങള്‍ അവരുടെ ജീവിതാനുഭവത്തെ അടിസ്ഥാനപ്പെടുത്തിയാണ് വോട്ട് ചെയ്തത്. അതാണ് കേരളത്തിലെ എല്ലാ പ്രദേശത്തും എല്ലാ ജനവിഭാഗങ്ങളിലും കാണാന്‍ കഴിയുന്നത്. കേരളത്തിലെ എല്ലായിടത്തും ഒരേപോലെ എല്‍ഡിഎഫിനെ അനുകൂലിക്കുന്ന വികാരമാണ് ദൃശ്യമായത്. അതിനെ അട്ടിമറിക്കാന്‍ അത്തരമൊരു (ശബരിമല) പരാമര്‍ശം കൊണ്ടു മാത്രം കഴിയുമായിരുന്നില്ല". പിണറായി വിജയൻ പറഞ്ഞു.

content highlights: Pinarayi Vijayan gives reply to NSS secretary Sukumaran nair