13 May 2023, 08:21 PM IST

1 min read

Read later

മുല്ലപ്പള്ളി രാമചന്ദ്രൻ| ഫയൽ ഫോട്ടോ: കെ.ബി സതീഷ്‌കുമാർ

വടകര: കര്‍ണ്ണാടക നിയമസഭാ തിരഞ്ഞെടുപ്പില്‍ ഇന്ത്യന്‍ നാഷണല്‍ കോണ്‍ഗ്രസ് നേടിയ ഐതിഹാസിക വിജയം 2024-ലെ ലോക്‌സഭാ തിരഞ്ഞെടുപ്പിന്റെ കൃത്യമായ സൂചനയാണെന്ന് മുന്‍ കെ.പി.സി.സി. പ്രസിഡന്റ് മുല്ലപ്പള്ളി രാമചന്ദ്രന്‍. കോണ്‍ഗ്രസിന്റെ ആശയാദര്‍ശങ്ങളില്‍ അടിയുറച്ച്, ജനങ്ങളിലേക്കിറങ്ങി , ഒറ്റക്കെട്ടായി നീങ്ങിയാല്‍ അത്ഭുതങ്ങള്‍ സൃഷ്ടിക്കാന്‍ കഴിയും. ഡി.കെ.ശിവകുമാറും സിദ്ധരാമയ്യയും ജി. പരമേശ്വരയും ബി.ജെ.പി.യെ പരാജയപ്പെടുത്താന്‍ ഒരു മനസ്സായി ഒന്നിച്ചു പ്രവര്‍ത്തിച്ചുവെന്നതാണ് ഈ വിജയത്തിന്റെ പ്രത്യേകതയെന്നും അദ്ദേഹം അവകാശപ്പെട്ടു.

ഇന്ത്യയിലെ മുഴുവന്‍ പാര്‍ട്ടി പ്രവര്‍ത്തകരും പിന്തുടരേണ്ട മാതൃകയാണിത്. നരേന്ദ്രമോദിയുടെ ഫാസിസ്റ്റ് ഭരണകൂടം ജനവിരുദ്ധ നയങ്ങളുമായും ഹിന്ദു രാഷ്ട്ര അജണ്ടയുമായും മുന്നോട്ടു പോകുന്നു. സംഘപരിവാറിന്റെ സര്‍വ്വാധിപത്യത്തെ ചെറുക്കുന്നതില്‍ തീര്‍ത്തും പരാജയപ്പെട്ട സി.പി.എം. നരേന്ദ്രമോദിയുമായി ബാന്ധവത്തിലാണ്. ഈ ഒളിച്ചു കളി ജനം തിരിച്ചറിഞ്ഞു തുടങ്ങിയിരിക്കുന്നു. മോദിയുടെ ചങ്ങാത്ത മുതലാളിത്ത ഭരണത്തേയും പിണറായിയുടെ അഴിമതി ഭരണകൂടത്തെ നിലം പരിശാക്കാന്‍ വിവേകശാലികളെല്ലാം കാത്തിരിക്കുന്നുവെന്നും മുല്ലപ്പള്ളി പറഞ്ഞു.

മതേതര- ജനാധിപത്യ വിശ്വാസികളുടെ മനസ്സ് കോണ്‍ഗ്രസിനോടൊപ്പമാണ്. കോണ്‍ഗ്രസ് ദുര്‍ബ്ബലമായാല്‍ ഇന്ത്യ തകരുമെന്ന കൃത്യമായ ചുവരെഴുത്താണ് കര്‍ണാടകയിലെ വിധിയെഴുത്ത്. 2024 കോണ്‍ഗ്രസിന്റെ ഐതിഹാസികമായ തിരിച്ചുവരവിന്റെ വര്‍ഷമാണ്. 2019 പോലെ കേരളത്തില്‍ ട്വന്റി-20 എന്നത് തന്നെയാണ് കോണ്‍ഗ്രസിന്റെ ലക്ഷ്യം. എല്ലാം മറന്ന് രാജ്യമാണ് പ്രധാനം എന്നതാകട്ടെ കോണ്‍ഗ്രസ്സുകാരെ നയിക്കുന്ന വികാരം. മതേതരത്വവും ജനാധിപത്യവും ബഹുസ്വരതയും മഹാപൈതൃകത്തിന്റെ അടയാളങ്ങള്‍ തന്നെയാണെന്നും മുല്ലപ്പള്ളി അഭിപ്രായപ്പെട്ടു.