27 May 2023, 12:05 PM IST

1 min read

Read later

പി.എ മുഹമ്മദ് റിയാസ്‌ മാധ്യമങ്ങളോട് സംസാരിക്കുന്നു

കാസര്‍കോട്: വായ്പാ പരിധി വെട്ടി കുറച്ച കേന്ദ്രസര്‍ക്കാര്‍ ഉത്തരവ് കേരളത്തിലെ ജനങ്ങളെ കഴുത്ത് ഞെരിച്ചു കൊല്ലുന്നതിന് തുല്യമാണെന്ന് പൊതുമരാമത്ത് മന്ത്രി പി.എ.മുഹമ്മദ് റിയാസ്. കേന്ദ്രസര്‍ക്കാരിന്റെ പ്രതികാര മനോഭാവമാണ് അത് കാണിക്കുന്നതെന്നും അദ്ദേഹം പറഞ്ഞു. കാസര്‍കോട് മാധ്യമ പ്രവര്‍ത്തകരോട് സംസാരിക്കുകയായിരുന്നു മന്ത്രി.

8000 കോടി രൂപയാണ് ഒറ്റയടിക്ക് വെട്ടിക്കുറച്ചത്. 32000 കോടിയാണ് ആവശ്യപ്പെട്ടതെങ്കിലും കിട്ടിയില്ല. കഴിഞ്ഞ തവണ കിട്ടിയ 23000 കോടിയില്‍ നിന്ന് 8000 കുറയ്ക്കുമ്പോള്‍ 15,000 കോടിയായി കുറഞ്ഞതായും അദ്ദേഹം വ്യക്തമാക്കി.

സവര്‍ക്കറുടെ ജന്മദിനത്തിനാണ് പാര്‍ലമെന്റ് ഉദ്ഘാടനം വച്ചിരിക്കുന്നതെന്ന് റിയാസ് പറഞ്ഞു. സവര്‍ക്കറെ പോലെ രാജ്യത്തിന്റെ സ്വാതന്ത്ര്യസമര പോരാട്ടത്തെ ഒറ്റുകൊടുത്ത വ്യക്തിയുടെ ജന്മദിനത്തിലാണോ ഇന്ത്യയുടെ ജനാധിപത്യത്തിന്റെ എല്ലാമായ പാര്‍ലമെന്റിന്റെ ഉദ്ഘാടനം നടത്തേണ്ടതെന്നും അദ്ദേഹം ചോദിച്ചു. അത് രാജ്യത്തിന്റെ സ്വാതന്ത്ര്യസമര പോരാട്ടത്തില്‍ പങ്കെടുത്ത് ജീവന്‍ ത്യജിച്ച വ്യക്തികളെ അപമാനിക്കുന്നതിന് തുല്യമാണെന്നും മന്ത്രി ചൂണ്ടിക്കാട്ടി.

പാര്‍ലമെന്റ് മന്ദിരത്തിന്റെ ഉദ്ഘാടനം എല്ലാവിധത്തിലും വിവാദമായിരിക്കുന്നത് ദൗര്‍ഭാഗ്യകരമാണ്. ഭരണഘടനയില്‍ പറയുന്നത് പാര്‍ലമെന്റ് എന്ന് പറഞ്ഞാല്‍ രാജ്യസഭയും ലോക്സഭയും പ്രസിഡന്റും അടങ്ങുന്നതാണെന്നാണ്. എന്നാല്‍ ഇവിടെ പ്രസിഡന്റിനെ ഒഴിവാക്കുന്നു. പിന്നാക്ക വിഭാഗത്തില്‍ നിന്നൊരു പ്രസിഡന്റ് എന്ന രീതിയില്‍ പ്രകടനപരമായ ഒരു തീരുമാനമെടുത്തത് കൊണ്ട് കാര്യമില്ലെന്നും അദ്ദേഹം കൂട്ടിച്ചേർത്തു.