കൊച്ചി: ഇൻഫർമേഷൻ പബ്ലിക് റിലേഷൻസ് വകുപ്പ് സംഘടിപ്പിച്ച ഓൺലൈൻ വീഡിയോ മത്സരം മിഴിവ് ശ്രദ്ധേയമായി. കെ.ടി.ബാബുരാജ് സംവിധാനം ചെയ്ത 'അതേ കഥയുടെ പുനരാഖ്യാനം' എന്ന വീഡിയോ ഒന്നാം സ്ഥാനം നേടി. രു ലക്ഷം രൂപയും പ്രശംസാപത്രവും ഫലകവുമാണ് സമ്മാനം.

നിങ്ങൾ കണ്ട വികസന കാഴ്ച എന്ന വിഷയത്തെ അടിസ്ഥാനമാക്കിയാണ് മത്സരം സംഘടിപ്പിച്ചത്.

സൂരജ് രാജന്റെ ചിരി രണ്ടാം സമ്മാനത്തിനും സരിൻ രാമകൃഷ്ണന്റെ കിറ്റ് മൂന്നാം സമ്മാനത്തിനും അർഹമായി. രണ്ടും മൂന്നും സമ്മാനങ്ങൾ യഥാക്രമം 50,000 രൂപയും 25,000 രൂപയും പ്രശംസാപത്രവും ഫലകവുമാണ് സമ്മാനം.

അരുൺ മോഹൻ, അശ്വതി പി, ബിനു സെബാസ്റ്റ്യൻ, ഷമീർ പതിയാശ്ശേരി, ശ്രീജിത് കണ്ടോത്ത് എന്നിവരെ പ്രോത്സാഹന സമ്മാനത്തിനായി തിരഞ്ഞെടുത്തു . ഇവർക്ക് 5,000 രൂപ വീതമാണ് സമ്മാനം.

പ്രശസ്ത ഛായാഗ്രാഹകനും സംവിധായകനുമായ വിപിൻ മോഹൻ ചെയർമാനും വിധു വിൻസെന്റ്, സജീവ് പാഴൂർ, സജിൻ ബാബു, രാജലക്ഷ്മി എന്നിവർ അംഗങ്ങളുമായ ജൂറിയാണ് അവാർഡ് നിർണ്ണയിച്ചത്.

മുന്നൂറിലധികം പേരാണ് ഓൺലൈൻ വീഡിയോ മത്സരത്തിൽ പങ്കെടുത്തത്.

സമ്മാനവിതരണ ചടങ്ങിൽ ഡെപ്യൂട്ടി ഡയറക്ടർമാരായ ഡോ.സി വേണുഗോപാൽ, റ്റി.സി ചന്ദ്രഹാസൻ, ചീഫ് ന്യൂസ് എഡിറ്റർ കിരൺ റാം, എറണാകുളം ജില്ലാ ഇൻഫർമേഷൻ ഓഫീസർ ഇൻ ചാർജ് കെ കെ ജയകുമാർ തുടങ്ങിയവർ പങ്കെടുത്തു.

Content Highlights:Mizhiv online video competition by information and public relations department