അന്ന് കോടിയേരി പറഞ്ഞു, കെ.വി തോമസ് വഴിയാധാരമാകില്ല; ഒടുവില്‍ ഡല്‍ഹിയിലേക്ക് സി.പി.എം ടിക്കറ്റ്

സാങ്കേതികമായി കെ.വി തോമസ് കോണ്‍ഗ്രസില്‍ നിന്ന് പുറത്താക്കപ്പെട്ടുവെങ്കിലും താനിപ്പോഴും കോണ്‍ഗ്രസുകാരന്‍ തന്നെയാണെന്നും തന്നെ ആര്‍ക്കും പുറത്താക്കാന്‍ കഴിയില്ലെന്നുമായിരുന്നു അപ്പോഴും കെ.വി തോമസിന്റെ വാദം. അതുകൊണ്ടുതന്നെ കോണ്‍ഗ്രസിന്റേയും ഇടതുപക്ഷത്തിന്റേയും നടുക്കായിരുന്നു ഇതുവരെ സ്ഥാനം. ഇതിനിടെയാണ് സര്‍ക്കാരിന്റെ പ്രത്യേക പ്രതിനിധിയെന്ന നിയമനം കെ.വി തോമസിനെ തേടിയെത്തുന്നത്. ലോക്‌സഭാ തിരഞ്ഞെടുപ്പില്‍ ആറ്റിങ്ങല്‍ മണ്ഡലത്തില്‍ നിന്ന് അടൂര്‍പ്രകാശിനോട് പരാജയപ്പെട്ട സി.പി.എം നേതാവ് എ.സമ്പത്തിനെയായിരുന്നു കഴിഞ്ഞ തവണ സര്‍ക്കാര്‍ കേരളത്തിന്റെ പ്രത്യേക പ്രതിനിധിയായി ഡല്‍ഹിയില്‍ പുനരധിവസിപ്പിച്ചത്. ഇത് വലിയ വിമര്‍ശനങ്ങള്‍ക്കും ഇടയാക്കിയിരുന്നു.

സമ്പത്ത് ഡല്‍ഹിയില്‍ പ്രവര്‍ത്തിച്ച രണ്ട് വര്‍ഷം മാത്രം സര്‍ക്കാരിന് ചെലവാക്കിയത് 7.26 കോടി രൂപയായിരുന്നു. ശമ്പളം, യാത്രാബത്ത, പേഴ്സണല്‍ സ്റ്റാഫ് തുടങ്ങിയ ഇനങ്ങളിലാണ് രണ്ടുകൊല്ലത്തേക്ക് ഇത്രയും തുക ഖജനാവില്‍നിന്ന് ചെലവാക്കിയത്. ധനമന്ത്രി കെ. ബാലഗോപാല്‍ തന്നെയാണ് നിയമസഭയില്‍ വെച്ച ബജറ്റ് രേഖകളില്‍ ഇക്കാര്യം വ്യക്തമാക്കിയത്.
ലോക്സഭാ തിരഞ്ഞെടുപ്പില്‍ തോറ്റ നേതാവിന്റെ പുനരധിവാസത്തിനു വേണ്ടി ഇത്രയും വലിയ തുക ചെലവഴിച്ച ചരിത്രം സംസ്ഥാനത്തു തന്നെ ആദ്യമായിട്ടായിരുന്നു. 2019-20 സാമ്പത്തിക വര്‍ഷം 3.85 കോടി രൂപ ചെലവാക്കിയപ്പോള്‍ 2020-21 വര്‍ഷത്തില്‍ 3.41 കോടിരൂപയാണ് ചെലവാക്കിയത്.

സമ്പത്തിന്റെ ശമ്പളം, യാത്രാബത്ത, ഓഫീസ് ചെലവ്, വാഹനം, മെഡിക്കല്‍ റീ ഇംബേഴ്സ്മെന്റ് എന്നിവയ്ക്കു പുറമേ ദിവസ വേതനക്കാര്‍ ഉള്‍പ്പെടെയുള്ള പേഴ്സണല്‍ സ്റ്റാഫിന്റെ വേതനം, യാത്രാബത്ത എന്നിവയെല്ലാം ചേര്‍ത്താണ് പൊതുഖജനാവില്‍നിന്ന് 7.26 കോടിരൂപ ചെലവിട്ടത്. വലിയ സാമ്പത്തിക പ്രതിസന്ധിയില്‍ സംസ്ഥാനം നട്ടംതിരിയുന്നതിനിടെ ഇത്രയും തുക ചെലവഴിച്ചതായിരുന്നു വലിയ വിമര്‍ശനത്തിന് ഇടയാക്കിയത്.

ഇത്രയും പണം ചെലവാക്കിയതുകൊണ്ട് സംസ്ഥാനത്തിന് പ്രത്യേകിച്ച് എന്തെങ്കിലും നേട്ടമുണ്ടായോ എന്ന ചോദ്യമാണ് പ്രതിപക്ഷമടക്കം ഉന്നയിച്ചിരുന്നത്. കേന്ദ്രസര്‍ക്കാരുമായുള്ള ഏകോപനമായിരുന്നു കാബിനറ്റ് റാങ്കിലുണ്ടായിരുന്ന സമ്പത്തിന്റെ മുഖ്യചുമതല. ഇതിന് ഡല്‍ഹിയില്‍ ഐ.എ.എസ്. ഉദ്യോഗസ്ഥന്മാരുടെ നേതൃത്വത്തില്‍ വിപുലമായ സംവിധാനം ഉള്ളപ്പോഴായിരുന്നു സമ്പത്തിന്റെ നിയമനം. ഇതേ ചുമതലയിലേക്ക് ഇപ്പോള്‍ കെ.വി തോമസിനേയും നിയമിക്കുമ്പോള്‍ വീണ്ടും പാഴ്ചിലവിനുള്ള അവസരം സി.പി.എം ഒരുക്കുകയാണെന്നും പ്രതിപക്ഷം ആരോപിക്കുന്നു. വലിയ സാമ്പത്തിക പ്രതിസന്ധിയിലൂടെ സര്‍ക്കാര്‍ കടന്നുപോകുമ്പോഴാണ് ഇത്തരമൊരു പ്രത്യുപകാര പുനരധിവാസമെന്നതും ശ്രദ്ധേയമാണ്.

'കോണ്‍ഗ്രസുകാര്‍ അപമാനിച്ചു, തിരുത തോമയെന്ന് വിളിച്ചു'

തന്നെ 'തിരുത തോമ'യെന്ന് വിളിച്ചൂവന്നും കോണ്‍ഗ്രസുകാര്‍ അപമാനിച്ചുവെന്നുമായിരുന്നു കെ.വി തോമസിന്റെ പ്രധാന പരാതി. ഒപ്പം മത്സരിക്കാന്‍ സീറ്റുകൊടുത്തില്ലെന്നും രാഹുല്‍ഗാന്ധി മുഖം കൊടുക്കുന്നില്ലെന്നുമെല്ലാമുള്ള ആക്ഷേപവും കെ.വി തോമസിനുണ്ടായിരുന്നു. ഇക്കാരണങ്ങളെല്ലാം പറഞ്ഞാണ് കോണ്‍ഗ്രസ് വിലക്ക് ലംഘിച്ച് സി.പി.എം പാര്‍ട്ടി കോണ്‍ഗ്രസിനോട് അനുബന്ധിച്ച് നടന്ന സെമിനാറില്‍ പങ്കെടുക്കുകയും ഇടതിന്റെ ഇഷ്ടക്കാരനാകുകയും ചെയ്തത്. ഒപ്പം, സില്‍വര്‍ലൈന്‍ അടക്കമുള്ളവയെ വലിയ രീതിയില്‍ പിന്തുണയ്ക്കുകയും തൃക്കാക്കര ഉപതിരഞ്ഞെടുപ്പില്‍ ഇടതിനുവേണ്ടി ഇറങ്ങുകയും ചെയ്തിരുന്നു. വികസനത്തിനുവേണ്ടി പാര്‍ട്ടി മറന്ന് യോജിക്കണമെന്നായിരുന്നു കെ.വി തോമസിന്റെ വാദം.

തൃക്കാക്കര ഉപ തിരഞ്ഞെടുപ്പിന് ശേഷം പാര്‍ട്ടിവിരുദ്ധ പ്രവര്‍ത്തനം നടത്തിയെന്നാരോപിച്ചായിരുന്നു തോമസിനെതിരേ കോണ്‍ഗ്രസ് നടപടിയെടുത്തത്. ഉപതിരഞ്ഞെടുപ്പില്‍ ഉമാതോമസ് വിജയിച്ചുവെങ്കിലും ശേഷം ഇപ്പോഴാണ് കെ.വി തോമസിന്റെ പേര് വീണ്ടും ഉയര്‍ന്നുകേള്‍ക്കുന്നത്. ഇതിനിടെ, കെ.വി തോമസ് കഴിഞ്ഞമാസം ഡല്‍ഹിയിലെത്തി ശശി തരൂരുമായും കൂടിക്കാഴ്ച നടത്തിയിരുന്നു.