തിരുവനന്തപുരം: സംസ്ഥാന നിയമസഭാ തിരഞ്ഞെടുപ്പ് അടുത്തിരിക്കെ ബിജെപിയുടെ ഏക സിറ്റിങ് സീറ്റായ നേമത്ത് ഒ. രാജഗോപാലിന് പകരക്കാരനായി മുന്‍ സംസ്ഥാന അധ്യക്ഷന്‍ കുമ്മനം രാജശേഖരന്‍ മത്സരിച്ചേക്കുമെന്ന് സൂചന. ഇതിന്റെ ഭാഗമായി കുമ്മനത്തിന് വേണ്ടി നേമത്ത് വീട് വാടകയ്ക്ക് എടുത്തു. മണ്ഡലത്തില്‍ ശ്രദ്ധ കേന്ദ്രീകരിക്കാനാണ് പാര്‍ട്ടി നേതൃത്വം കുമ്മനത്തിന് നല്‍കിയിരിക്കുന്ന നിര്‍ദ്ദേശമെന്നാണ് വിവരങ്ങള്‍.
കുമ്മനത്തിനെ നിയമസഭയിലെത്തിക്കാനുള്ള നീക്കങ്ങള്‍ ആര്‍.എസ്.എസ്സാണ് സജീവമായി നടത്തുന്നത്‌. നിലവിലെ എംഎല്‍എ ആയ ഒ. രാജഗോപാലിന് 91 വയസായതിനാല്‍ പ്രായാധിക്യം പരിഗണിച്ച് പുതിയ ആളെ മത്സരിപ്പിക്കണമെന്നാണ് പാര്‍ട്ടി നേതൃത്വം കരുതുന്നത്. ഈ സ്ഥാനത്തേക്കാണ് 68 കാരനായ കുമ്മനത്തിനെ ആര്‍എസ്എസ് നേതൃത്വം നിര്‍ദ്ദേശിച്ചിരിക്കുന്നത്.
മത്സരിക്കാനുള്ള വിമുഖത മുമ്പ് ഒ. രാജഗോപാല്‍ അറിയിച്ചിരുന്നതിനാല്‍ നേമത്ത് പുതിയ ആളെ മത്സരിപ്പിക്കുമെന്നത് ഏറക്കുറെ ഉറപ്പായിരുന്നു. 2016-ലെ നിയമസഭാ തിരഞ്ഞെടുപ്പില്‍ 8671 വോട്ടിന്റെ ഭൂരിപക്ഷത്തിലൂടെയാണ് രാജഗോപാല്‍ നിയമസഭയിലെക്കെത്തിയത്. ബിജെപിയുടെ സംസ്ഥാന ചരിത്രത്തിലെ ആദ്യത്തെ എംഎല്‍എ ആണ് ഒ. രാജഗോപാല്‍. സിപിഎമ്മിലെ വി. ശിവന്‍കുട്ടിയെ ആണ് രാജഗോപാല്‍ പരാജയപ്പെടുത്തിയത്.
അതേസമയം കുമ്മനം നേമത്ത് മത്സരിക്കുമോയെന്ന കാര്യത്തില്‍ പാര്‍ട്ടി നേതൃത്വം മനസ് തുറന്നിട്ടില്ല. സംസ്ഥാനത്ത് 10 സീറ്റുകളില്‍ ബിജെപിക്ക് വിജയ സാധ്യതയുണ്ടെന്നാണ് നേതൃത്വത്തിന്റെ വിലയിരുത്തല്‍. ഇത്തരത്തില്‍ സാധ്യതയുള്ള 40 സീറ്റുകളുടെ പട്ടിക സംസ്ഥാന നേതൃത്വം തയ്യാറാക്കിയിരുന്നു. സംസ്ഥാന അധ്യക്ഷന്‍ കെ. സുരേന്ദ്രന്‍ മത്സര രംഗത്ത് ഉണ്ടാകണമെന്ന് ആര്‍എസ്എസ് നിര്‍ദ്ദേശിച്ചിട്ടുണ്ടെന്നാണ് അറിയുന്നത്.
അതേസമയം കഴിഞ്ഞതവണ കുമ്മനം മത്സരിച്ച വട്ടിയൂര്‍ക്കാവില്‍ ഇത്തവണ മുന്‍ സംസ്ഥാന അധ്യക്ഷന്‍ പി.കെ കൃഷ്ണദാസ് മത്സരിച്ചേക്കുമെന്നാണ് കരുതുന്നത്. തിരുവനന്തപുരത്ത് തന്നെ ബിജെപി ഏറെ പ്രതീക്ഷ കൊടുക്കുന്ന മണ്ഡലമാണ് വട്ടിയൂര്‍കാവ്. ഇവിടെ കഴിഞ്ഞ തവണ ശക്തമായ മത്സരമാണ് ബിജെപി നടത്തിയത്. കുമ്മനം ഇവിടെ രണ്ടാം സ്ഥാനത്ത് എത്തിയിരുന്നു.
കോണ്‍ഗ്രസിലെ കെ. മുരളീധരനോടാണ്‌ കുമ്മനം പരാജയപ്പെട്ടത്. 51322 വോട്ട് മുരളീധരന്‍ നേടിയപ്പോള്‍ 43700 കുമ്മനവും മൂന്നാം സ്ഥാനത്തെത്തിയ സിപിഎം സ്ഥാനാര്‍ഥി ടി.എന്‍ സീമ 40441 വോട്ടും നേടിയിരുന്നു. വട്ടിയൂര്‍കാവിലെ ഈ വോട്ട് വിഹിതം വര്‍ധിപ്പിക്കാനാകുമെന്നാണ് ബിജെപി കരുതുന്നത്.
