Image posted on facebook by @Kerala University of Fisheries and Ocean Studies - KUFOS
കൊച്ചി: കേരള ഫിഷറീസ് സര്‍വ്വകലാശാല വൈസ് ചാന്‍സലര്‍ നിയമനം റദ്ദാക്കിയ ഹൈക്കോടതി വിധിക്ക് എതിരായ ഹര്‍ജിയില്‍ സത്യവാങ്മൂലം ഫയല്‍ ചെയ്യാന്‍ കൂടുതല്‍ സമയം വേണമെന്ന് കേരളവും ഗവര്‍ണറും. മുന്‍ വിസി റിജി ജോണിന്റെ ഹര്‍ജിയില്‍ മറുപടി നല്‍കാന്‍ രണ്ട് ആഴ്ചത്തെ സമയം അനുവദിക്കണമെന്ന് ആവശ്യപ്പെട്ട് സംസ്ഥാന സര്‍ക്കാരിന്റെയും ഗവര്‍ണറുടെയും അഭിഭാഷകര്‍ സുപ്രീം കോടതിയില്‍ കത്ത് നല്‍കി. അതേസമയം ഈ ആവശ്യം അംഗീകരിക്കരുത് എന്ന് ആവശ്യപ്പെട്ട് റിജി ജോണിന്റെ അഭിഭാഷകയും സുപ്രീം കോടതി രജിസ്ട്രാര്‍ക്ക് കത്ത് നല്‍കി.
നിയമനം റദ്ദാക്കിയ ഹൈക്കോടതി വിധിക്കെതിരെ മുന്‍ വിസി റിജി ജോണ്‍ നല്‍കിയ ഹര്‍ജി നാളെ ചീഫ് ജസ്റ്റിസ് ഡി വൈ ചന്ദ്രചൂഡ്, ജസ്റ്റിസ് പി എസ് നരസിംഹ എന്നിവരടങ്ങിയ ബെഞ്ച് പരിഗണിക്കാന്‍ ഇരിക്കെയാണ് സംസ്ഥാന സര്‍ക്കാറിന്റെയും, ചാന്‍സലര്‍ കൂടിയായ ഗവര്‍ണറുടെയും അഭിഭാഷകര്‍ സുപ്രീം കോടതിയില്‍ കത്ത് നല്‍കിയത്. മറുപടി സത്യവാങ്മൂലം ഫയല്‍ ചെയ്യാന്‍ രണ്ട് ആഴ്ചത്തെ സമയം കൂടി അനുവദിക്കണമെന്ന് ആവശ്യപ്പെട്ടാണ് സംസ്ഥാന സര്‍ക്കാരിന് വേണ്ടി സ്റ്റാന്റിംഗ് കോണ്‍സല്‍ നിഷേ രാജന്‍ ഷൊങ്കര്‍ കത്ത് നല്‍കിയത്.
റിജി ജോണിന്റെ ഹര്‍ജിയില്‍ സുപ്രീം കോടതി പുറപ്പെടുവിച്ച നോട്ടീസ് അഞ്ചാം തീയതി മാത്രമാണ് ലഭിച്ചത് എന്നാണ് ചാന്‍സലര്‍ ആയ ഗവര്‍ണറുടെ അഭിഭാഷകന്‍ സുപ്രീം കോടതിക്ക് കൈമാറിയ കത്തില്‍ വ്യക്തമാക്കിയിരിക്കുന്നത്. അതിനാല്‍ മറുപടി നല്‍കുന്നതിന് രണ്ട് ആഴ്ചത്തെ സമയം കൂടി അനുവദിക്കണമെന്നാണ് ചാന്‍സലറുടെ അഭിഭാഷകന്‍ വെങ്കിട്ട സുബ്രമണ്യം സുപ്രീം കോടതി രജിസ്ട്രാര്‍ക്ക് നല്‍കിയ കത്തില്‍ ആവശ്യപ്പെട്ടിരിക്കുന്നത്.
എന്നാല്‍ ഹര്‍ജികള്‍ പരിഗണിക്കുന്നത് മാറ്റി വയ്ക്കരുത് എന്ന് ആവശ്യപ്പെട്ട് റിജി ജോണിന്റെ അഭിഭാഷക ആനീ മാത്യുവും കത്ത് നല്‍കിയിട്ടുണ്ട്. ഈ മൂന്ന് കത്തുകളും ചീഫ് ജസ്റ്റിസ് ഡി വൈ ചന്ദ്രചൂഡ് അധ്യക്ഷനായ ബെഞ്ച് നാളെ പരിഗണിക്കും. ഇതിനിടെ കേരള ഫിഷറീസ് സര്‍വ്വകലാശാലയ്ക്ക് വേണ്ടി അഭിഭാഷകന്‍ പി വി ദിനേശ് സുപ്രീം കോടതിയില്‍ വക്കാലത്ത് ഫയല്‍ ചെയ്തു. ഹൈക്കോടതി വിധിക്ക് എതിരെ സംസ്ഥാന സര്‍ക്കാരും ഹര്‍ജി ഫയല്‍ ചെയ്യും
കേരള ഫിഷറീസ് സര്‍വ്വകലാശാല വൈസ് ചാന്‍സലര്‍ നിയമനം റദ്ദാക്കിയ ഹൈക്കോടതി വിധിക്ക് എതിരെ സംസ്ഥാന സര്‍ക്കാര്‍ സുപ്രീം കോടതിയില്‍ ഹര്‍ജി ഫയല്‍ ചെയ്യും. ഹര്‍ജി ഫയല്‍ ചെയ്യണമെന്ന നിയമ ഉപദേശം മുന്‍ അറ്റോര്‍ണി ജനറല്‍ കെ കെ വേണുഗോപാലില്‍ നിന്ന് ലഭിച്ചതായി സംസ്ഥാന സര്‍ക്കാറിന്റെ ഉന്നത വൃത്തങ്ങള്‍ മാതൃഭൂമി ന്യൂസിനോട് പറഞ്ഞു. ഈ സാഹചര്യത്തില്‍ കൂടിയാണ് റിജി ജോണിന്റെ ഹര്‍ജി പരിഗണിക്കുന്നത് നീട്ടി വയ്ക്കാന്‍ സംസ്ഥാന സര്‍ക്കാര്‍ സുപ്രീം കോടതിയെ സമീപിച്ചത് എന്നാണ് സൂചന.
Content Highlights: kerala university of fisheries and ocean studies, kufos vc issue, kerala , governor
Also Watch
RELATED STORIES
.jpg?$p=8312ca4&f=1x1&w=100&q=0.8)
IN CASE YOU MISSED IT
.jpg?$p=79c0b37&f=1x1&w=100&q=0.8)
_(1).jpg?$p=a676861&q=0.8&f=16x11&w=104)
.jpg?$p=21469c6&q=0.8&f=16x11&w=104)
.jpg?$p=18cf145&q=0.8&f=16x11&w=104)
വാര്‍ത്തകളോടു പ്രതികരിക്കുന്നവര്‍ അശ്ലീലവും അസഭ്യവും നിയമവിരുദ്ധവും അപകീര്‍ത്തികരവും സ്പര്‍ധ വളര്‍ത്തുന്നതുമായ പരാമര്‍ശങ്ങള്‍ ഒഴിവാക്കുക. വ്യക്തിപരമായ അധിക്ഷേപങ്ങള്‍ പാടില്ല. ഇത്തരം അഭിപ്രായങ്ങള്‍ സൈബര്‍ നിയമപ്രകാരം ശിക്ഷാര്‍ഹമാണ്. വായനക്കാരുടെ അഭിപ്രായങ്ങള്‍ വായനക്കാരുടേതു മാത്രമാണ്, മാതൃഭൂമിയുടേതല്ല. ദയവായി മലയാളത്തിലോ ഇംഗ്ലീഷിലോ മാത്രം അഭിപ്രായം എഴുതുക. മംഗ്ലീഷ് ഒഴിവാക്കുക..