01 June 2023, 06:11 PM IST

1 min read

Read later

പ്രതീകാത്മക ചിത്രം | Mathrubhumi archives

കൊച്ചി: കൊച്ചി കോർപ്പറേഷൻ പരിധിയിലെ മാലിന്യം വ്യാഴാഴ്ച ബ്രഹ്മപുരത്തേക്ക് എത്തിക്കില്ലെന്ന കോർപ്പറേഷൻ വാഗ്ദാനം നടപ്പായില്ല. വ്യാഴാഴ്ച രാവിലെ കൊച്ചിയിൽ നിന്നുള്ള മാലിന്യം ബ്രഹ്മപുരത്ത് എത്തിച്ചു. എന്നാൽ, ഇത് ആശയവിനിമയത്തിലെ പിഴവാണെന്നാണ് കോർപ്പറേഷന്റെ വിശദീകരണം. സ്വകാര്യ ഏജൻസികൾ മാലിന്യം ശേഖരിക്കുന്നത് ആരംഭിച്ചെങ്കിലും ഫലപ്രദമല്ലെന്ന് ആക്ഷേപമുണ്ട്.

കൊച്ചിയിലെ വീടുകളിൽ നിന്ന് മാലിന്യം ശേഖരിക്കാൻ മൂന്ന് സ്വകാര്യ കമ്പനികളെ ചുമതലപ്പെടുത്താൻ കോർപ്പറേഷൻ കഴിഞ്ഞ ദിവസം തീരുമാനിച്ചിരുന്നു. 21 പോയിന്റുകളിൽ നിന്നായി മാലിന്യം ശേഖരിക്കുമെന്നും ഇത് ബ്രഹ്മപുരത്തേക്ക് കൊണ്ടുപോകില്ലെന്നുമാണ് കോർപ്പറേഷൻ അറിയിച്ചിരുന്നത്. എന്നാൽ വ്യാഴാഴ്ച രാവിലെ വീണ്ടും കൊച്ചിയിൽ നിന്നുള്ള മാലിന്യം ബ്രഹ്മപുരത്തേക്ക് കൊണ്ടുപോകുകയായിരുന്നു. എന്നാൽ ഇത് ആശയവിനിമയത്തിലെ പിഴവാണെന്നാണ് വിശദീകരണം.

അതേസമയം, സ്വകാര്യ ഏജൻസികൾ മാലിന്യം ശേഖരിക്കുന്നത് ആരംഭിച്ചെങ്കിലും ഫലപ്രദമല്ലെന്ന ആക്ഷേപമുണ്ട്. ചെറിയ വാഹനങ്ങളിൽ ശേഖരിച്ച മാലിന്യവുമായി തൊഴിലാളികൾ മണിക്കൂറുകളോളം റോഡരികിൽ കാത്തുനിൽക്കുന്ന സാഹചര്യമുണ്ടായി. മൂന്ന് ഏജൻസികളെയാണ് മാലിന്യ ശേഖരണത്തിനായി നിയോഗിച്ചിരുന്നത്. ഇതിൽ നിന്ന് ഒരു ഏജൻസി പിന്മാറിയിട്ടുണ്ട്. ഈ മാലിന്യങ്ങൾ എവിടേക്കാണ് കൊണ്ടുപോകുന്നതെന്ന കാര്യത്തിൽ ഇതുവരേയും വ്യക്തത വന്നിട്ടില്ല.