തിരുവനന്തപുരം: കോവിഡ് -19 നെ പ്രതിരോധിക്കാൻ മാസ്ക് ധരിക്കേണ്ടതിന്റെ ആവശ്യകതയെക്കുറിച്ച് പൊതുജനങ്ങളെ ബോധവൽക്കരിക്കാൻ കേരള പോലീസ് #BaskInTheMask എന്ന ക്യാംപയിൻ ആരംഭിച്ചു. ഈ ക്യാംപയിന്റെ ഭാഗമായി വ്യത്യസ്ത തരത്തിലുള്ള ബോധവൽക്കരണ പ്രവർത്തനങ്ങളാണ് ലക്ഷ്യമിടുന്നത്. വരും ദിവസങ്ങളിൽ സിനിമ താരങ്ങളെയും മറ്റ് പ്രമുഖരെയും അണിനിരത്തിയുള്ള വിവിധ സംരംഭങ്ങൾ ഈ കാംപയിനിന്റെ ഭാഗമാകും. തെരുവ് നാടകങ്ങൾ, ഡിജിറ്റൽ ബോധവൽക്കരണം, മാസ്കിലെ പുതിയ ഫാഷൻ പ്രവണതകൾ തുടങ്ങിയ ബോധവൽക്കരണ പരിപാടികളിൽ സമൂഹത്തിലെ എല്ലാവിഭാഗങ്ങളുടെയും സഹകരണം കേരള പോലീസ് അഭ്യർത്ഥിച്ചിട്ടുണ്ട്.
മാസ്കിലെ പുതിയ ഫാഷൻ പ്രവണതകൾ കണ്ടെത്തുന്നതിന്റെ ഭാഗമായി മാസ്ക് ഇനങ്ങളിൽ ഏറ്റവും മികച്ചവയ്ക്ക് പാരിതോഷികങ്ങൾ ഏർപ്പെടുത്തിയിട്ടുണ്ട്. മികച്ച ഫാമിലി മാസ്കുകൾ തയ്യാറാക്കുന്നവർക്ക് 5000 രൂപയുടെയും സവിശേഷവും ആകർഷകമായ മാസ്കുകൾ തയ്യാറാക്കുന്നവർക്ക് 3000 രൂപയുടെയും കാഷ് അവാർഡുകൾ ഏർപ്പെടുത്തിയിട്ടുണ്ട്. 
കേരള പോലീസിന്റെ ഔദ്യോഗിക ഫെയ്സ്ബുക്ക് പേജിൽ പ്രഖ്യാപിച്ച ഫാമിലി ഫോട്ടോ ചലഞ്ചിന് മികച്ച പ്രതികരണമാണ് ലഭിച്ചു കൊണ്ടിരിക്കുന്നതെന്ന് ഔദ്യോഗികവക്താവ് അറിയിച്ചു.
മൽസരത്തിനായുള്ള മാസ്കിന്റെ മോഡലുകൾ kpsmc.pol@kerala.gov.in.ഇമെയിൽ വഴിയായോ 9497900440 വാട്സാപ്പ് നമ്പറിലോ അയക്കാവുന്നതാണ്.
