കോഴിക്കോട്: ബന്ധുനിയമന വിവാദത്തില്‍ മന്ത്രി കെ.ടി ജലീല്‍ സി.പി.എം പിന്തുണ ഉറപ്പിക്കുമ്പോഴും ഓരോ ദിവസവും കൂടുതല്‍ തെളിവുകള്‍ പുറത്ത് വിട്ടുകൊണ്ട് രംഗത്തെത്തുകയാണ് യൂത്ത്ലീഗ് സംസ്ഥാന ജനറല്‍ സെക്രട്ടറി പി.കെ ഫിറോസ്. ആരോപണം വന്നതോടെ മന്ത്രിബന്ധു കെ.ടി അദീബ് ന്യൂനപക്ഷ ധനകാര്യ വികസന കോര്‍പറേഷന്‍ ജനറല്‍മാനേജര്‍ തസ്തികയില്‍ നിന്ന് രാജിവെച്ചെങ്കിലും നിയമനം മന്ത്രിയുടെ അറിവോടെ തന്നെയായിരുന്നുവെന്നതിന് കൂടുതല്‍ തെളിവുകള്‍ പി.കെ ഫിറോസ് വ്യാഴാഴ്ച കോഴിക്കോട് വാര്‍ത്താസമ്മേളനത്തില്‍ പുറത്ത് വിട്ടു. ഇതില്‍ ഏറ്റവും പ്രധാനപ്പെട്ടതാണ് അദീബിന്റെ ശമ്പളക്കണക്ക്.

സൗത്ത് ഇന്ത്യന്‍ ബാങ്കില്‍ ഒരു ലക്ഷം രൂപയിലേറെ ശമ്പളം ലഭിച്ചിരുന്ന കെ.ടി അദീബ് വെറും 85664 രൂപയ്ക്കാണ് ഡെപ്യൂട്ടേഷനില്‍ ന്യൂനപക്ഷ ധനാകാര്യ കോര്‍പ്പറേഷനില്‍ ജോലി ചെയ്യുന്നത് എന്നായിരുന്നു ഇത് സംബന്ധിച്ച് മന്ത്രിയും കോര്‍പ്പറേഷന്‍ അധികൃതരും ആദ്യം മുതല്‍ പറഞ്ഞിരുന്നത്. മറ്റ് അലവന്‍സുകളൊന്നും അനുവദിക്കുന്നില്ലെന്നും പറഞ്ഞിരുന്നു.

എന്നാല്‍, അത് തെറ്റാണെന്നും തനിക്ക് പെട്രോള്‍ അലവന്‍സ് ഉള്‍പ്പെടെ മുമ്പ് സൗത്ത് ഇന്ത്യന്‍ ബാങ്കില്‍ അനുവദിച്ചിരുന്ന അലവന്‍സുകളെല്ലാം അനുവദിച്ച് തരണമെന്നും ചൂണ്ടിക്കാട്ടി അദീബ് കോര്‍പ്പറേഷന് നല്‍കിയ കത്ത് ഇന്ന് യൂത്ത് ലീഗ് പുറത്ത് വിട്ടു. ഇതോടെ കുറഞ്ഞ വേതനത്തിന്‌ ജോലി ചെയ്യാന്‍ അദീബ് സമ്മതിക്കുകയായിരുന്നുവെന്ന മന്ത്രിയുടെ വാദമാണ് പൊളിഞ്ഞത്.

മാസത്തില്‍ 100 ലിറ്റര്‍ പെട്രോള്‍ അടിക്കാനുള്ള തുക, വിനോദത്തിനുള്ള അലവന്‍സ്, വര്‍ഷത്തില്‍ വാഹനം നന്നാക്കാനുള്ള തുക തുടങ്ങി വിചിത്രമായ വിവിധ ആവശ്യങ്ങളാണ് അദീബ് കോര്‍പ്പറേഷനോട് ആവശ്യപ്പെട്ടത്. യൂത്ത്ലീഗ് വിഷയം ഉയര്‍ത്തിക്കൊണ്ട് വന്നില്ലെങ്കില്‍ ഇതൊക്കെ അനുവദിച്ച് കൊടുക്കാനും സര്‍ക്കാര്‍ മടിക്കില്ലായിരുന്നുവെന്ന് പി.കെ ഫിറോസ് ചൂണ്ടിക്കാട്ടുന്നു. സ്വകാര്യ ബാങ്കില്‍ നിന്നും ഡെപ്യൂട്ടേഷനില്‍ പൊതുമേഖലാ സ്ഥാപനത്തിലേക്ക് ബന്ധുവിനെ നിയമിക്കണമെന്ന തീരുമാനം ധനകാര്യ വകുപ്പിന്റെ അനുമതിക്ക് ബന്ധപ്പെട്ടവര്‍ വിട്ടെങ്കിലും വകുപ്പില്‍ നിന്നും മറുപടി ലഭിക്കാതായതോടെ മന്ത്രി  സ്വന്തം ഇഷ്ടപ്രാകരം അംഗീകാരം നല്‍കിയെന്ന ഗൗരവമേറിയ പുതിയ ആരോപണവും യൂത്ത്ലീഗ് ഉന്നയിക്കുന്നുണ്ട്.

വിവരാവകാശ നിയമപ്രകാരം നിയമന രേഖ ആവശ്യപ്പെട്ടപ്പോള്‍ അത് നല്‍കാന്‍ തയ്യാറാവുന്നില്ല പകരം അത് കോര്‍പറേഷന്റെ കീഴിലാണുള്ളതെന്ന മറുപടിയാണ് തങ്ങള്‍ക്ക് ലഭിക്കുന്നതെന്നും ഫിറോസ് ചൂണ്ടിക്കാട്ടുന്നു. ഇത് വിവരാവകാശ നിയമത്തിന്റെ ലംഘനം കൂടിയാവുമെന്നിരിക്കെ ബന്ധു നിയമനവുമായി ബന്ധപ്പെട്ട് മന്ത്രി കൂടുതല്‍ പ്രതിസന്ധിയിലേക്കാണ് പോവുന്നത്.

24-ാം തീയതി മുതലാണ് കാസര്‍കോഡ് മുതല്‍ തിരുവനന്തപുരം വരെയുള്ള യൂത്ത്ലീഗിന്റെ ഒരുമാസം നീണ്ട് നില്‍ക്കുന്ന യുവജനയാത്ര  നടക്കുന്നത്. ഇതില്‍ ഏറ്റവും പ്രധാനമായി യൂത്ത്ലീഗ് ഉയര്‍ത്തിക്കാട്ടുന്നതും കെ.ടി ജലീലിന്റെ ബന്ധുനിയമന വിവാദം തന്നെയായിരിക്കും.

സി.പി.എം നേതൃത്വത്തിന്റെ ശക്തമായ പിന്തുണ വിഷയത്തില്‍ കെ.ടി ജലീലിന് ലഭിക്കുന്നുണ്ടെങ്കിലും യൂത്ത്ലീഗ് ഉന്നയിക്കുന്ന ആരോപണങ്ങള്‍ക്ക് കൃത്യമായ മറുപടി പറയാന്‍ ഇതുവരെ നേതൃത്വത്തിന് സാധിച്ചിട്ടില്ല. സംസ്ഥാനത്തിന്റെ വിവിധ ഭാഗങ്ങളില്‍ കഴിഞ്ഞ ദിവസങ്ങളിലെല്ലാം മുഖ്യമന്ത്രിയെത്തിയിരുന്നുവെങ്കിലും ബന്ധു നിയമന വിവാദത്തില്‍ കൃത്യമായ മൗനം പാലിക്കാനാണ് ശ്രമിച്ചത്. ഇക്കാര്യവും യാത്രയ്ക്കുടനീളം ഉന്നയിക്കാനാണ് യൂത്ത്ലീഗിന്റെ ശ്രമം. മാത്രമല്ല വരും ദിവസങ്ങളില്‍ യു.ഡി.എഫ് സമരം ഏറ്റെടുക്കുമെന്നും അറിയിച്ചുണ്ട്. ഇതോടെ സമരം ശക്തമാകുമെന്ന മുന്നറിയിപ്പ് തന്നെയാണ് യൂത്ത്ലീഗ് നല്‍കുന്നത്. 

Content Highlights: K T Jaleel,  nepotism, P K Firoz