തിരുവനന്തപുരം: സംസ്ഥാനത്ത് പ്രളയക്കെടുതിയില്‍പ്പെട്ട്  ദുരിതം അനുഭവിക്കുന്നവര്‍ക്ക് സ്വകാര്യ ആശുപത്രികളില്‍ ഉള്‍പ്പടെ സൗജന്യ ചികിത്സ ഉറപ്പാക്കാന്‍ ഐ.എം.എ. ഇതിനായി ഒരു മാസം നീളുന്ന സൗജന്യ മെഡിക്കല്‍ ക്യാമ്പ് തുടരുവാന്‍  മുഖ്യമന്ത്രിയുടെ നേതൃത്വത്തില്‍ നടന്ന ഐ.എം.എ വിദഗ്ദരുടെ യോഗത്തില്‍  തീരുമാനിച്ചു. ഇത് കൂടാതെ സര്‍ക്കാര്‍ സംവിധാനത്തില്‍ നടക്കുന്ന മെഡിക്കല്‍ ക്യാമ്പുകളില്‍ ഐ.എം.എ കൂടുതല്‍ ഡോക്ടര്‍മാരുടെ സേവനം ഉറപ്പാക്കുന്നതോടൊപ്പം, സൗജന്യമായി മരുന്നുകളും നല്‍കും.  കൂടാതെ മാനസിക സംഘര്‍ഷമനുഭവിക്കുന്നവര്‍ക്കായി മാനസികാരോഗ്യ വിദഗ്ദരുടെ സഹായത്തോടു കൂടിയുള്ള ചികിത്സയും ഐ.എം.എ ഉറപ്പുവരുത്തും.


വെള്ളപൊക്കത്തില്‍ നശിച്ച ആശുപത്രികളുടെ പുനര്‍നിര്‍മ്മാണത്തിന് ഐ.എം.എ.ദേശീയ ഘടകത്തിന്റെ സഹായത്തോടെ പുനര്‍നിര്‍മാക്കാനുള്ള സന്നദ്ധതയും ഐ.എം.എ.സംസ്ഥാന നേതൃത്വം മുഖ്യമന്ത്രിയെ അറിയിച്ചു. 

മെഡിക്കല്‍ ക്യാമ്പുകളില്‍ ഉണ്ടാകുന്ന ആശുപത്രി മാലിന്യങ്ങള്‍ ഐ.എം.എയുടെ ഇമേജ് പദ്ധതി വഴി ശാസ്ത്രീയമായി സംസ്‌കരിക്കാമെന്നും മുഖ്യമന്ത്രിയെ അറിയിച്ചു.