തിരുവനന്തപുരം: ബിജെപി സംസ്ഥാന കമ്മറ്റി ഓഫീസ് ആക്രമണ കേസ് പിന്‍വലിക്കാന്‍ സര്‍ക്കാര്‍ സിജെഎം കോടതിയില്‍ അപേക്ഷ നല്‍കി. കേസില്‍ സിപിഎം കൗണ്‍സിലര്‍ ഐ.പി. ബിനു അടക്കം നാല് പ്രതികളാണുള്ളത്. സര്‍ക്കാരിന്റെ അപേക്ഷ ഫയലില്‍ സ്വീകരിച്ച കോടതി ഒന്നാം സാക്ഷിക്ക് സമന്‍സ് അയച്ചിട്ടുണ്ട്. കേസ് പിന്‍വലിക്കുന്നതുമായി ബന്ധപ്പെട്ട് ഏതെങ്കിലും തരത്തിലുള്ള എതിര്‍പ്പുണ്ടെങ്കില്‍ അറിയിക്കാനാണ് കോടതി നോട്ടീസ് നല്‍കിയിരിക്കുന്നത്. 

നോട്ടീസ് ലഭിച്ചതിന് പിന്നാലെ ബിജെപി ഈ ഹര്‍ജിക്കെതിരെ തടസ്സഹര്‍ജിയും നല്‍കിയിട്ടുണ്ട്. അടുത്ത വര്‍ഷം ജനുവരി ഒന്നിന് കേസ് വീണ്ടും കോടതി പരിഗണിക്കും. 2017 ജൂലായ് 28-നാണ് ബിജെപി സംസ്ഥാന കമ്മറ്റി ഓഫീസ് ആക്രമിക്കപ്പെട്ടത്. രാത്രിയിലായിരുന്നു ആക്രമണം. 

കേസില്‍ സിപിഎം കൗണ്‍സിലറായിരുന്ന ഐ.പി.ബിനു അടക്കം നാല് പേരാണ് പ്രതികള്‍. ഓഫീസ് ആക്രമിക്കുന്നതിന്റെ സിസിടിവി ദൃശ്യങ്ങള്‍ അടക്കം പുറത്തുവരികയും ഇത് വലിയ രാഷ്ട്രീയ വിവാദങ്ങള്‍ക്ക് വഴിവെക്കുകയും ചെയ്തിരുന്നു.

Content highlights: government to withdraw case on bjp state committee office attack