തിരുവനന്തപുരം: മെഡിക്കല്‍ കോളേജില്‍ ആത്മഹത്യയ്ക്ക് ശ്രമിച്ച കോവിഡ് രോഗി മരിച്ചു. കഴക്കൂട്ടം സ്വദേശിയായ ബിജി (38 )യാണ് മരിച്ചത്. കോവിഡ് മുക്തി നേടി ആശുപത്രി വിടാനിരിക്കെയായിരുന്നു ആത്മഹത്യ.  

ആത്മഹത്യാ ശ്രമത്തെത്തുടർന്ന് ഗുരുതരാവസ്ഥയില്‍ തീവ്ര പരിചരണ വിഭാഗത്തില്‍ പ്രവേശിപ്പിച്ചിരിക്കുകയായിരുന്ന ഇയാളുടെ മരണം വൈകുന്നേരം 6 45 ഓടു കൂടിയാണ് സ്ഥിരീകരിച്ചത്. 

ഞായറാഴ്ച ഉച്ചയോടെയാണ് ഇയാള്‍ ആശുപത്രിയിലെ ശൗചാലയത്തില്‍ ആത്മഹത്യക്ക് ശ്രമിച്ചത്. ശൗചാലയത്തില്‍ പോയി ഏറേ നേരം കഴിഞ്ഞിട്ടും കാണാത്തതിനെ തുടര്‍ന്ന് ജീവനക്കാര്‍ അനേഷിച്ചപ്പോഴാണ് ആത്മഹത്യ ശ്രമം അറിഞ്ഞത്. കൗണ്‍സിലിംഗിന് ശേഷം ആശുപത്രി വിടുന്നതിനുള്ള നടപടികള്‍ സ്വീകരിക്കവേ ആയിരുന്നു ആത്മഹത്യാ ശ്രമം. 

അതേസമയം കുറച്ച് ദിവസങ്ങള്‍ക്ക് മുന്‍പ് ഇയാളുടെ സഹോദരന്‍ കോവിഡ് ബാധിച്ച് മരിച്ചിരുന്നു. തുടര്‍ന്ന് മാനസിക വിഷമത്തിലായിരുന്നു ബിജി എന്നാണ് ആശുപത്രി അധികൃതര്‍ വ്യക്തമാക്കുന്നത്. 

(ശ്രദ്ധിക്കുക: ആത്മഹത്യ ഒന്നിനും പരിഹാരമല്ല, മാനസികാരോഗ്യ വിദഗ്ധരുടെ സഹായം തേടുക, അതിജീവിക്കാന്‍ ശ്രമിക്കുക. Toll free helpline number: 1056)

Content Highlights: Covid patient died after suicide attempt in Thiruvananthapuram medical college