കശ്മീര്‍: കശ്മീരിലെ രജൗരിയില്‍ പാക് വെടിവെപ്പില്‍ ഇന്ത്യന്‍ സൈനികന്‍ കൊല്ലപ്പെട്ടു. 6 രജ്പുത് റെജിമെന്റിലെ സൈനികന്‍ സുദേശ് കുമാറാണ് കൊല്ലപ്പെട്ടത്.

നിയന്ത്രണരേഖ കടന്നുള്ള ഇന്ത്യയുടെ മിന്നലാക്രമണത്തിന് ശേഷം പാകിസ്താന്‍ തുടര്‍ച്ചയായി വെടിനിര്‍ത്തല്‍ കരാര്‍ ലംഘിച്ചിരുന്നു. പ്രകോപനമില്ലാതെയാണ് രജൗരിയില്‍ പാക് വെടിവെപ്പ് ഉണ്ടായതെന്ന് പ്രതിരോധ മന്ത്രാലയം അറിയിച്ചു.

സപ്തംബര്‍ അവസാനമാണ് ഇന്ത്യ പാക് ഭീകരകേന്ദ്രങ്ങളില്‍ മിന്നലാക്രമണം നടത്തിയത്. തുടര്‍ന്ന് ഒക്‌ടോബര്‍ 3, 4, 5 തീയതികളില്‍ പാകിസ്താന്‍ വലിയ രീതിയില്‍ കരാര്‍ ലംഘനം നടത്തിയിരുന്നു. 

ഇതിനുശേഷം അതിര്‍ത്തിയില്‍ സുരക്ഷ വര്‍ധിപ്പിച്ചതായും അര്‍ഹമായ മറുപടി നല്‍കുമെന്നും സൈന്യം അറിയിച്ചിരുന്നു.

കഴിഞ്ഞ വര്‍ഷം പാകിസ്താന്‍ നടത്തിയ 405 വെടിനിര്‍ത്തല്‍ കരാര്‍ ലംഘനങ്ങളില്‍ 16 സാധാരണക്കാര്‍ കൊല്ലപ്പെടുകയും 71 പേര്‍ക്ക് പരിക്കേല്‍ക്കുകയും ചെയ്തിട്ടുണ്ട്.