ന്യൂഡല്‍ഹി: കപില്‍ സിബലിന്റെ വീട് ആക്രമിക്കപ്പെട്ട സംഭവത്തില്‍ പ്രതികരിച്ച്  കോണ്‍ഗ്രസ് നേതാവ് ശശി തരൂര്‍. സംഭവം നാണക്കേടുണ്ടാക്കുന്നതാണെന്ന് തരൂര്‍ ട്വിറ്ററില്‍ പ്രതികരിച്ചു. 

കപില്‍ സിബല്‍ ഒരു യഥാര്‍ഥ കോണ്‍ഗ്രസുകാരനാണ്. ഇന്ത്യന്‍ നാഷണല്‍ കോണ്‍ഗ്രസിനുവേണ്ടി നിരവധി കേസുകള്‍ കോടതികളില്‍ വാദിച്ചയാളാണ് സിബല്‍. ജനാധിപത്യ പാര്‍ട്ടിയെന്ന നിലയ്ക്ക് അദ്ദേഹം പറയുന്നത് എന്താണെന്ന് നാം കേള്‍ക്കണം. വിയോജിക്കണമെങ്കില്‍ ആവാം, പക്ഷെ അത് ഈ രീതിയിലാവരുത്. ബിജെപിക്കെതിരേ നിലകൊള്ളാന്‍ സ്വയം ശക്തിപ്പെടുക എന്ന ലക്ഷ്യത്തിനാവണം നമ്മുടെ മുന്‍ഗണന എന്നും തരൂര്‍ ട്വിറ്ററില്‍ കുറിച്ചു.

കോണ്‍ഗ്രസ് നേതാവ് മനീഷ് തിവാരിയും കപില്‍ സിബലിനെ പിന്തുണച്ച് രംഗത്തെത്തിയിരുന്നു. കോടതികളിലും പുറത്തും കോണ്‍ഗ്രസിന് വേണ്ടി പോരാടുന്നത് കപില്‍ സിബലാണ്. സിബലിന്റെ വീട്ടില്‍ നടന്നത് ഗുണ്ടായിസമാണെന്നും മനീഷ് തിവാരി ട്വിറ്ററില്‍ കുറിച്ചു. 

പഞ്ചാബ് കോണ്‍ഗ്രസിലെ പ്രശ്നങ്ങളുടെ പശ്ചാത്തലത്തില്‍ പാര്‍ട്ടി ഉന്നത നേതൃത്വത്തെ കപില്‍ സിബല്‍ രൂക്ഷമായ ഭാഷയില്‍ വിമര്‍ശിച്ചിരുന്നു. പ്രസിഡന്റ് ഇല്ലാതെ പാര്‍ട്ടി മുന്നോട്ടു പോകുന്നത് തുടരുകയാണെന്നും ആരാണ് തീരുമാനങ്ങള്‍ എടുക്കുന്നതെന്ന് ആര്‍ക്കും അറിയില്ലെന്നും സിബല്‍ പറഞ്ഞു. 

ആരെയും പേരെടുത്തു പറഞ്ഞായിരുന്നില്ല, സിബലിന്റെ വിമര്‍ശനം. എന്നിരുന്നാലും പഞ്ചാബ് വിഷയത്തില്‍ തീരുമാനം കൈക്കൊണ്ട കോണ്‍ഗ്രസ് മുന്‍ അധ്യക്ഷന്‍ രാഹുല്‍ ഗാന്ധിയെയും താത്കാലിക അധ്യക്ഷ സോണിയാ ഗാന്ധിയെയും ഉന്നംവെച്ചായിരുന്നു അദ്ദേഹത്തിന്റെ പരാമര്‍ശങ്ങള്‍. തങ്ങള്‍ ഗ്രൂപ്പ് 23 ആണെന്നും അല്ലാതെ 'ജി ഹുസൂര്‍-23' (ശരി അങ്ങുന്നേ) അല്ലെന്നും അദ്ദേഹം പറഞ്ഞു. കോണ്‍ഗ്രസില്‍ സമഗ്ര പരിഷ്‌കാരം ആവശ്യപ്പെട്ട് സോണിയാ ഗാന്ധിക്ക് കത്തെഴുതിയ മുതിര്‍ന്ന 23 നേതാക്കളുടെ കൂട്ടായ്മയാണ് ജി-23 അഥവാ ഗ്രൂപ്പ് 23. കഴിഞ്ഞ കൊല്ലമാണ് ജി 23 കത്തെഴുതിയത്.

പ്രസ്താവന പുറത്തുവന്നതിനു പിന്നാലയാണ് കപില്‍ സിബലിന്റെ വസതിക്ക് മുന്നില്‍ കോണ്‍ഗ്രസ് പ്രവര്‍ത്തക പ്രതിഷേധിച്ചത്. വേഗം സുഖം പ്രാപിക്കൂ എന്നെഴുതിയ പ്ലക്കാര്‍ഡുമായിട്ടാണ് കോണ്‍ഗ്രസ് പ്രവര്‍ത്തകര്‍ കപില്‍ സിബലിന്റെ ഡല്‍ഹിയിലെ വസതിയിലേക്ക് മാര്‍ച്ച് ചെയ്തത്. വീടിന്റെ മുന്നിലെത്തിയ പ്രതിഷേധം അദ്ദേഹത്തിന്റെ വസതിയിലേക്ക് തക്കാളികള്‍ എറിഞ്ഞ് പ്രതിഷേധിക്കുകയും ചെയ്തു.