പ്രതീകാത്മകചിത്രം | Photo: Mathrubhumi
ചണ്ഡീഗഢ്: കുപ്പിവെള്ളത്തിന് അധികത്തുക ഈടാക്കിയ കാറ്ററിങ് കോണ്‍ട്രാക്ടര്‍ക്കെതിരെ കടുത്ത നടപടിയുമായി റെയില്‍വേ. വിപണിവിലയേക്കാള്‍ അഞ്ച് രൂപ കൂടുതല്‍ ഈടാക്കിയതിനാണ് നടപടി. അംബാല റെയില്‍വേ ഡിവിഷനാണ് നടപടി സ്വീകരിച്ചത്. സംഭവത്തെക്കുറിച്ച് ട്രെയിന്‍ യാത്രക്കാരന് ട്വിറ്ററിലൂടെ പരാതിയറിച്ചതിന് തൊട്ടടുത്ത ദിവസം തന്നെ റെയില്‍വേ നടപടി സ്വീകരിച്ചു.
ചണ്ഡിഗഢില്‍ നിന്ന് ഷാജഹാന്‍പുരിലേക്ക് ലഖ്‌നൗ സൂപ്പര്‍ഫാസ്റ്റ് എക്‌സ്പ്രസില്‍ യാത്ര ചെയ്യുന്നതിനിടെയാണ് ശിവറാം ഭട്ട് എന്ന യാത്രക്കാരന് വെള്ളത്തിനായി അധികത്തുക നല്‍കേണ്ടി വന്നത്. കുപ്പിയുടെ മുകളില്‍ 15 രൂപ എന്ന് രേഖപ്പെടുത്തിയിരുന്നെങ്കിലും 20 രൂപയാണ് വില്‍പനക്കാരന്‍ ഈടാക്കിയത്. സംഭവത്തിന്റെ വീഡിയോ സഹിതമാണ് ട്രെയിന്‍യാത്രക്കിടെ നടന്ന കൊള്ളയെ കുറിച്ച് ഭട്ട് ട്വീറ്റ് ചെയ്തത്. യാത്രക്കാര്‍ എത്രമാത്രം പരാതിപ്പെട്ടാലും ഇത്തരം കൊള്ളകള്‍ക്കെതിരെയുള്ള കടുത്ത നടപടി റെയില്‍വേ മന്ത്രാലയത്തിന്റെ ഭാഗത്ത് നിന്നുണ്ടാകാനിടയില്ലെന്നും ഭട്ട് ട്വീറ്റില്‍ സൂചിപ്പിച്ചു.
12232 നമ്പര്‍ ട്രെയിനില്‍ പാന്‍ട്രിയോ മാനേജരോ ഇല്ലെന്ന് വില്‍പനക്കാരന്‍ ആവര്‍ത്തിച്ചതായും അങ്ങനെയാണെങ്കില്‍ ആര്‍ക്ക് വേണമെങ്കിലും ട്രെയിനില്‍ തോന്നിയവിലയ്ക്ക് റെയില്‍നീര്‍ വില്‍ക്കാനാവുമോ എന്ന് മറ്റൊരു ട്വീറ്റില്‍ ഭട്ട് ചോദ്യമുന്നയിച്ചു.
വില്‍പനക്കാരനെ അറസ്റ്റ് ചെയ്തതായും വില്‍പനക്കായി അനുവദിച്ച ലൈസന്‍സ് റദ്ദാക്കുന്നതുള്‍പ്പെടെയുള്ള നിയമനടപടികള്‍ സ്വീകരിച്ചതായും നോര്‍തേണ്‍ റെയില്‍വേ പ്രതികരിച്ചു. ട്രെയിനുകളിലെ അനധികൃത വില്‍പനയും അധികവില ഈടാക്കലും നിയന്ത്രിക്കാന്‍ ടിക്കറ്റ് പരിശോധകര്‍ക്കും സി.എം.ഐമാര്‍ക്കും നിര്‍ദേശം നല്‍കിയതായും അംബാല റെയില്‍വേ ഡിവിഷണല്‍ മാനേജര്‍ ട്വിറ്ററിലൂടെ അറിയിച്ചു. ബന്ധപ്പെട്ട വകുപ്പും (കമേഴ്ഷ്യല്‍ ഡിപാര്‍ട്‌മെന്റ്) ആര്‍.പി.എഫും ചേര്‍ന്ന് ഇത്തരം പ്രവര്‍ത്തനങ്ങള്‍ നിരീക്ഷിക്കാനും തടയാനുമുള്ള നടപടി സ്വീകരിച്ചതായും ട്വീറ്റില്‍ പറയുന്നു.
Content Highlights: Indian Railways, Initiates Action Against Contractor, Overcharging A Passenger For Water Bottle
Also Watch
RELATED STORIES
%20(1).jpg?$p=bff467a&f=1x1&w=100&q=0.8)
.jpg?$p=f1b1304&f=1x1&w=100&q=0.8)
IN CASE YOU MISSED IT
.jpg?$p=5ab4c51&f=1x1&w=100&q=0.8)
.jpg?$p=afe3202&f=1x1&w=100&q=0.8)
.jpg?$p=b70fc45&q=0.8&f=16x11&w=104)
വാര്‍ത്തകളോടു പ്രതികരിക്കുന്നവര്‍ അശ്ലീലവും അസഭ്യവും നിയമവിരുദ്ധവും അപകീര്‍ത്തികരവും സ്പര്‍ധ വളര്‍ത്തുന്നതുമായ പരാമര്‍ശങ്ങള്‍ ഒഴിവാക്കുക. വ്യക്തിപരമായ അധിക്ഷേപങ്ങള്‍ പാടില്ല. ഇത്തരം അഭിപ്രായങ്ങള്‍ സൈബര്‍ നിയമപ്രകാരം ശിക്ഷാര്‍ഹമാണ്. വായനക്കാരുടെ അഭിപ്രായങ്ങള്‍ വായനക്കാരുടേതു മാത്രമാണ്, മാതൃഭൂമിയുടേതല്ല. ദയവായി മലയാളത്തിലോ ഇംഗ്ലീഷിലോ മാത്രം അഭിപ്രായം എഴുതുക. മംഗ്ലീഷ് ഒഴിവാക്കുക..