01 June 2023, 09:30 PM IST

1 min read

Read later

ബ്രിജ് ഭൂഷൺ സിങ്. Photo: ANI

ന്യൂഡൽഹി: സമരംചെയ്യുന്ന ഗുസ്തി താരങ്ങളുടെ ആവശ്യങ്ങളും ഭാഷയും നിരന്തരം മാറിക്കൊണ്ടിരിക്കുകയാണെന്ന് ലൈംഗികാതിക്രമ പരാതി നേരിടുന്ന ദേശീയ റെസ്‌ലിങ് ഫെഡറേഷന്‍ മുൻ പ്രസിഡന്റും ബി.ജെ.പി. എം.പിയുമായ ബ്രിജ് ഭൂഷണ്‍ സിങ്.

'ലൈംഗികാതിക്രമ പരാതിയിൽ ഡൽഹി പോലീസിന്റെ അന്വേഷണം പുരോഗമിച്ചു കൊണ്ടിരിക്കുകയാണ്. അവർ അത് പൂർത്തീകരിക്കട്ടെ. കൈകൂപ്പി ഞാൻ ആവശ്യപ്പെടുകയാണ്, എന്നോട് അനാവശ്യമായ ചോദ്യങ്ങളൊന്നും ചോദിക്കരുത്', ബ്രിജ് ഭൂഷൺ മാധ്യമങ്ങളോട് പറഞ്ഞു. അതേസമയം, ഗുസ്തി താരങ്ങൾ ഉന്നയിക്കുന്ന ആരോപണങ്ങൾ ഡൽഹി പോലീസിന്റെ അന്വേഷണത്തിൽ തെളിഞ്ഞാൽ തൂങ്ങിമരിക്കാൻ തയ്യാറാണെന്നും അദ്ദേഹം വാർത്താ സമ്മേളനത്തിൽ ആവർത്തിച്ചു.

'ജന്ദർ മന്തറിൽ വെച്ച് ജനുവരി 18-ന് ഗുസ്തി താരങ്ങൾ നടത്തിയ പ്രതിഷേധത്തിൽ ചില ആവശ്യങ്ങൾ അവർ മുന്നോട്ട് വെച്ചിരുന്നു. കുറച്ചു ദിവസങ്ങൾക്ക് ശേഷം അവരുടെ ആവശ്യങ്ങൾ മാറി. എന്താണ് ഞാൻ അവരോട് ചെയ്തത്? എവിടെവെച്ചാണ് ചെയ്തത് എന്ന കാര്യം വനിതാ ഗുസ്തി താരങ്ങളോട് ഞാൻ ചോദിക്കുകയാണ്', ബ്രിജ് ഭൂഷണ്‍ പറഞ്ഞു.

അതേസമയം, ബ്രിജ് ഭൂഷണെതിരെ മതിയായ തെളിവുകളില്ലെന്ന് ചൂണ്ടിക്കാട്ടി ഡൽഹി പോലീസ് റിപ്പോർട്ട് സമർപ്പിക്കാൻ ഒരുങ്ങുന്നു എന്ന വാർത്ത എ.എൻ.ഐ. അടക്കമുള്ള വാർത്താ ഏജൻസികൾ കഴിഞ്ഞ ദിവസം പുറത്തുവിട്ടിരുന്നു. പോലീസ് വൃത്തങ്ങളെ ഉദ്ധരിച്ചു കൊണ്ടുള്ള റിപ്പോർട്ടായിരുന്നു പുറത്തുവന്നത്. പതിനഞ്ച് ദിവസത്തിനുള്ളിൽ അന്തിമ റിപ്പോർട്ട് സമർപ്പിക്കുമെന്നും റിപ്പോർട്ടിൽ പറഞ്ഞിരുന്നു. എന്നാൽ ഈ വാർത്ത തെറ്റാണെന്ന് ഡൽഹി പോലീസിന്റെ ഔദ്യോഗിക ട്വിറ്റർ ഹാൻഡിലിൽ നിന്ന് ട്വീറ്റ് ചെയ്തെങ്കിലും മിനിറ്റുകൾക്കുള്ളിൽ തന്നെ ഈ ട്വീറ്റ് പിൻവലിച്ചിരുന്നു.