24 February 2023, 06:16 PM IST

1 min read

Read later

നരേന്ദ്ര മോദി | Photo: PTI

ഷില്ലോങ്: കോണ്‍ഗ്രസ് പ്രവര്‍ത്തകര്‍ തനിക്കെതിരേ ഉയര്‍ത്തിയ വിവാദ മുദ്രവാക്യത്തിനെതിരേ പ്രതികരിച്ച് പ്രധാനമന്ത്രി നരേന്ദ്ര മോദി. 'മോദീ, തേരി കബര്‍ ഖുദേഗി' (മോദീ നിങ്ങളുടെ ശവക്കുഴി തോണ്ടും) എന്ന് കോണ്‍ഗ്രസ് പറയുമ്പോള്‍ 'മോദീ, തേരി കമല്‍ ഖിലേഗാ' (മോദീ നിങ്ങളുടെ താമര വിരിയും) എന്നാണ് രാജ്യവും ജനങ്ങളും പറയുന്നതെന്ന് അദ്ദേഹം പറഞ്ഞു. മേഘാലയയുടെ തലസ്ഥാനമായ ഷില്ലോങ്ങില്‍ തിരഞ്ഞെടുപ്പു റാലിയില്‍ സംസാരിക്കുകയായിരുന്നു മോദി. ഫെബ്രുവരി 27-നാണ് മേഘാലയയില്‍ തിരഞ്ഞെടുപ്പ്.

നിന്ദ്യമായി ചിന്തിക്കുകയും നിന്ദ്യമായ ഭാഷ ഉപയോഗിക്കുകയും ചെയ്യുന്നവര്‍ക്ക് രാജ്യം തക്കമറുപടി നല്‍കുമെന്നും മോദി പറഞ്ഞു. രാജ്യത്താല്‍ തിരസ്‌കരിക്കപ്പെട്ട, രാജ്യം ഇനി അംഗീകരിക്കാന്‍ തയ്യാറല്ലാത്തവര്‍ ഇപ്പോള്‍ 'മോദീ, നിങ്ങളുടെ ശവക്കുഴി തോണ്ടു'മെന്ന് മുദ്രാവാക്യം മുഴക്കുകയാണ്. എന്നാല്‍ രാജ്യം പറയുന്നു, 'മോദീ നിങ്ങളുടെ താമര വിരിയു'മെന്ന്, പ്രധാനമന്ത്രി പറഞ്ഞു.

കഴിഞ്ഞ ദിവസം മുതിര്‍ന്ന നേതാവ് പവന്‍ ഖേരയെ ഡല്‍ഹി വിമാനത്താവളത്തില്‍ തടഞ്ഞതിന് പിന്നാലെയാണ് കോണ്‍ഗ്രസ് പ്രവര്‍ത്തകര്‍ വിവാദ മുദ്രാവാക്യം ഉയര്‍ത്തിയത്‌. സംഭവത്തിന്റെ വീഡിയോ സാമൂഹികമാധ്യമങ്ങളില്‍ വ്യാപകമായി പ്രചരിക്കപ്പെടുകയും ചെയ്തിരുന്നു. പ്രധാനമന്ത്രിയെ അപമാനിച്ചെന്നാരോപിച്ച് ഡല്‍ഹി വിമാനത്താവളത്തില്‍വെച്ച് അസം പോലീസ് ഖേരയെ അറസ്റ്റ് ചെയ്തിരുന്നു. പിന്നീട് അദ്ദേഹത്തിന് സുപ്രീം കോടതി ഇടക്കാല ജാമ്യം അനുവദിക്കുകയും ചെയ്തിരുന്നു.