ന്യൂഡല്‍ഹി : ഇന്ത്യയില്‍ കോവിഡ് സ്ഥിരീകരിച്ചവരുടെ എണ്ണം 19 ലക്ഷം കടന്നു. 19,08,255 പേർക്കാണ് ഇതുവരെ രാജ്യത്ത് കോവിഡ് ബാധിച്ചത്. കഴിഞ്ഞ 24 മണിക്കൂറിനിടെ 52,509 പുതിയ കേസുകളാണ് സ്ഥിരീകരിച്ചത്. ഒറ്റദിവസം കൊണ്ട് 857 മരണങ്ങളും രേഖപ്പെടുത്തി. നിലവില്‍ 5,86,244 രോഗികളാണ് ചികിത്സയിലുള്ളത്. 12,82,215 പേര്‍ ഇതിനോടകം രോഗമുക്തരായി.
മഹാരാഷ്ട്ര, ന്യൂഡല്‍ഹി, തമിഴ്നാട്, കര്‍ണാടക, ആന്ധ്രപ്രദേശ് എന്നീ സംസ്ഥാനങ്ങളിലാണ് നിലവിൽ ഏറ്റവും കൂടുതല്‍ കോവിഡ് കേസുകളുള്ളത്.
മഹാരാഷ്ട്രയില്‍ ചൊവ്വാഴ്ച 7,760 പേര്‍ക്കു കൂടി കോവിഡ്-19 സ്ഥിരീകരിക്കുകയും 300 പേര്‍ മരിക്കുകയും ചെയ്തു. മുംബൈയില്‍ മാത്രം ചൊവ്വാഴ്ച 709 പേര്‍ക്കാണ് കോവിഡ് സ്ഥിരീകരിച്ചത്. 873 പേര്‍ രോഗമുക്തി നേടുകയും 56 പേര്‍ മരിക്കുകയും ചെയ്തു. മഹാരാഷ്ട്രയിലെ കോവിഡ് ബാധിതരുടെ എണ്ണം 4,57,956 ആയി.
തമിഴ്നാട്ടില് 5,063 പേര്‍ക്കു കൂടി ചൊവ്വാഴ്ച കോവിഡ് സ്ഥിരീകരിച്ചു. 6,501 പേര്‍ രോഗമുക്തരാവുകയും 108 പേര്‍ മരിക്കുകയും ചെയ്തു. സംസ്ഥാനത്തെ ആകെ കോവിഡ് ബാധിതരുടെ എണ്ണം 2,68,285 ആയി.
രാജ്യത്തെ കോവിഡ് മരണ നിരക്ക് 2.10 ശതമാനമായി കുറഞ്ഞതായും ലോക്ഡൗണ്‍ പ്രഖ്യാപിച്ചതിന് ശേഷം ആദ്യമായിട്ടാണ് മരണനിരക്ക് ഏറ്റവും താഴ്ന്ന നിലയിലെത്തുന്നതെന്നും കേന്ദ്ര ആരോഗ്യ മന്ത്രാലയം കഴിഞ്ഞ ദിവസം അറിയിച്ചിരുന്നു.
കോവിഡ് മരണങ്ങളില്‍ 50 ശതമാനവും 60 വയസോ അതിന് മുകളിലുള്ളവര്‍ക്കിടയിലോ ആണ്. 37 ശതമാനം മരണങ്ങള്‍ 45 നും 60 നും ഇടയില്‍ പ്രായമുള്ളവരിലാണ് സംഭവിച്ചിട്ടുള്ളത്. 11 ശതമാനം മരണങ്ങള്‍ 26 മുതല്‍ 44 വയസ് വരെയുള്ളവരിലാണ്. 18 മുതല്‍ 25 വയസ് പ്രായമുള്ളവര്‍ ഒരു ശതമാനം മാത്രമേ കോവിഡ് ബാധിച്ച് മരിച്ചിട്ടുള്ളൂ.
68 ശതമാനവും പുരുഷന്‍മാരാണ് മരിച്ചത്. 32 ശതമാനം സ്ത്രീകളും മരിച്ചു. പലസംസ്ഥാനങ്ങളും പരിശോധന ശേഷി വര്‍ദ്ധിപ്പിച്ചിട്ടുണ്ട്. രാജ്യത്ത് ഇതുവരെ രണ്ടുകോടിയിലധികം ടെസ്റ്റുകള്‍ നടത്തിയിട്ടുണ്ട്.
content highlights: India Covid cases and deathtoll
