22 September 2020, 05:00 PM IST

1 min read

Read later

മണാലി-ലേ ഹൈവേയിലൂടെ സൈനിക സാമഗ്രികളുമായി ലഡാക്കിലേക്ക് നീങ്ങുന്ന ഇന്ത്യൻ സൈനിക സംഘം |Photo:PTI

ന്യൂഡല്‍ഹി: 2017-ലെ ഡോക്‌ലാം സംഘര്‍ഷത്തിന് പിന്നാലെ ഇന്ത്യയുമായുള്ള അതിര്‍ത്തിയില്‍ ചൈന വ്യോമത്താവളങ്ങളും വ്യോമപ്രതിരോധ യൂണിറ്റുകളുമടക്കം 13 ഓളം പുതിയ സൈനിക കേന്ദ്രങ്ങള്‍ നിര്‍മിച്ചുവെന്ന് റിപ്പോര്‍ട്ട്. ലഡാക്കിലെ സംഘര്‍ഷത്തിന് ശേഷം നാല് ഹെലിപോര്‍ട്ടുകളുടെ പ്രവര്‍ത്തനവും തുടങ്ങി.

പ്രമുഖ സുരക്ഷ-രഹസ്യാന്വേഷണ കണ്‍സള്‍ട്ടന്‍സിയായ സ്ട്രാറ്റ്‌ഫോര്‍ ചൊവ്വാഴ്ച പുറത്തുവിട്ട റിപ്പോര്‍ട്ടിലാണ് ഇക്കാര്യം പറയുന്നത്. മൂന്ന് വ്യോമത്താവളങ്ങൾ, അഞ്ച് സ്ഥിരം വ്യോമപ്രതിരോധ യൂണിറ്റുകള്‍, അഞ്ച് ഹെലിപോര്‍ട്ടുകള്‍ എന്നിവയാണ് ചൈന മൂന്ന് വര്‍ഷത്തിനുള്ളില്‍ പുതുതായി നിര്‍മിച്ചിട്ടുള്ളത്.

നിലവില്‍ തുടരുന്ന ലഡാക്ക് പ്രതിസന്ധിക്ക് ശേഷമാണ് ഇതില്‍ നാല് ഹെലിപോര്‍ട്ടുകളുടെ നിര്‍മാണം തുടങ്ങിയതെന്ന് സൈനിക അനലിസ്റ്റും സ്ട്രാറ്റ്‌ഫോര്‍ റിപ്പോര്‍ട്ടിന്റെ ലേഖകനുമായ സിം ടാക്ക് പറയുന്നു.

'2017-ലെ ഡോക്‌ലാം പ്രതിസന്ധി ചൈനയുടെ തന്ത്രപരമായ ലക്ഷ്യങ്ങളെ ഒന്നടങ്കം മാറ്റിമറിച്ചതായി തോന്നുന്നു. ഇതിന് ശേഷം മൂന്ന് വര്‍ഷം കൊണ്ട് അവര്‍ വ്യോമത്താവളങ്ങള്‍, പ്രതിരോധ സംവിധാനങ്ങള്‍, ഹെലിപോര്‍ട്ടുകള്‍ എന്നിവയുടെ എണ്ണം ഇരട്ടയാക്കി' റിപ്പോര്‍ട്ടില്‍ പറയുന്നു.

ഇപ്പോഴും നിലനില്‍ക്കുന്ന ലഡാക്ക് പ്രതിസന്ധി മെയ് മാസത്തിലാണ് ആരംഭിച്ചത്. ഇതിന് ശേഷം ചൈന അതിര്‍ത്തിയില്‍ കൂടുതല്‍ സൈനികരേയും പ്രത്യേക സൈനിക യൂണിറ്റുകളേയും വിന്യസിച്ചതായി നേരത്തെ തന്നെ നിരവധി റിപ്പോര്‍ട്ടുകളുണ്ടായിരുന്നു. അതിര്‍ത്തി മേഖലയില്‍ നിയന്ത്രണം ഉറപ്പിക്കുന്നതിനുള്ള ചൈനയുടെ വലിയ ശ്രമങ്ങളുടെ ഭാഗമാണ് ഇപ്പോഴത്തെ പിരിമുറക്കങ്ങളെന്നും സിം ടാക്ക് പറയുന്നു.

ചൈനയുടെ സൈനിക അടിസ്ഥാന സൗകര്യനവീകരണം പൂര്‍ത്തിയായിട്ടില്ല. അതിന്റെ നിര്‍മാണ പ്രവര്‍ത്തനങ്ങളാണ് നടക്കുന്നത്. അതിനാല്‍ ഇന്ന് ഇന്ത്യയുടെ അതിര്‍ത്തിയില്‍ കാണുന്ന ചൈനീസ് സൈനിക പ്രവര്‍ത്തനം ഒരു ദീര്‍ഘകാല ഉദ്ദേശ്യത്തിന്റെ ആരംഭം മാത്രമാണെന്നും റിപ്പോര്‍ട്ട് ചൂണ്ടിക്കാട്ടുന്നു.