ഹൈദരാബാദ്: തെലങ്കാന നിയമസഭാ കൗണ്‍സില്‍ തിരഞ്ഞെടുപ്പില്‍ മുന്‍ പ്രധാനമന്ത്രി നരസിംഹ റാവുവിന്റെ മകള്‍ സുരഭി വാണി ദേവി ടി.ആര്‍.എസ് പാര്‍ട്ടി ടിക്കറ്റില്‍ മത്സരിക്കും.
മഹാബുബ്‌നഗര്‍-രംഗറെഡ്ഡി-ഹൈദരാബാദ് ഗ്രാജ്യുവേറ്റ്‌സ് മണ്ഡലത്തില്‍ നിന്നാണ് സുരഭി വാണി മത്സരിക്കുകയെന്ന് പാര്‍ട്ടിയുമായി അടുത്ത വൃത്തങ്ങള്‍ പ്രതികരിച്ചു. തിങ്കളാഴ്ച അവര്‍ നാമനിര്‍ദേശ പത്രിക സമര്‍പ്പിക്കും. മാര്‍ച്ച് 14നാണ് നിയമസഭാ കൗണ്‍സിലിലേക്കുള്ള തിരഞ്ഞെടുപ്പ് നടക്കുക.
മുന്‍ പ്രധാനമന്ത്രി നരസിംഹ റാവുവിന്റെ 100-ാം ജന്മവാര്‍ഷികം വിപുലമായി കൊണ്ടാടുമെന്ന് നേരത്തെ ടിആര്‍എസ് സര്‍ക്കാര്‍ പ്രഖ്യാപിച്ചിരുന്നു. ഒരു വര്‍ഷം നീണ്ടു നില്‍ക്കുന്ന പരിപാടികളുടെ ഒരുക്കങ്ങള്‍ കഴിഞ്ഞ ജൂണ്‍ മുതല്‍ ആരംഭിച്ചിട്ടുണ്ട്. നരസിംഹ റാവുവിന് ഭാരത് രത്‌ന നല്‍കി ആദരിക്കാനും അദ്ദേഹത്തിന്റെ പ്രതിമ പാര്‍ലമെന്റില്‍ സ്ഥാപിക്കാനും കേന്ദ്ര സര്‍ക്കാരിനോട് ആവശ്യപ്പെടാനുള്ള പ്രമേയവും തെലങ്കാന നിയമസഭ പാസാക്കിയിട്ടുണ്ട്
