08 May 2023, 09:56 PM IST

1 min read

Read later

സോണിയാ ഗാന്ധി| File Photo: PTI

ന്യൂഡല്‍ഹി: സോണിയ ഗാന്ധിയുടെ ' Sovereignty' പരാമര്‍ശത്തില്‍ കോണ്‍ഗ്രസിനോട് വിശദീകരണം തേടി തിരഞ്ഞെടുപ്പ് കമ്മിഷന്‍. ബി.ജെ.പി. നല്‍കിയ പരാതിക്ക് പിന്നാലെ കോണ്‍ഗ്രസ് അധ്യക്ഷന്‍ മല്ലികാര്‍ജുന്‍ ഖാര്‍ഗെയോടാണ് കമ്മിഷന്‍ വിശദീകരണം തേടിയത്. സോഷ്യല്‍ മീഡിയ പോസ്റ്റിനെക്കുറിച്ച് വ്യക്തമാക്കാനും തിരുത്തല്‍ നടപടികള്‍ കൈക്കൊള്ളാനും ആവശ്യപ്പെടുന്നുവെന്ന് തിരഞ്ഞെടുപ്പ് കമ്മിഷന്‍ കോണ്‍ഗ്രസിന് നല്‍കിയ കത്തില്‍ പറയുന്നു.

'കര്‍ണാടകത്തിന്റെ സല്‍പ്പേരിനും പരമാധികാരത്തിനും അഖണ്ഡതയ്ക്കും കളങ്കം വരുത്താന്‍ കോണ്‍ഗ്രസ് ആരേയും അനുവദിക്കില്ല' എന്ന സോണിയ ഗാന്ധിയുടെ പ്രസ്താവന കോണ്‍ഗ്രസ് തങ്ങളുടെ ഔദ്യോഗിക ട്വിറ്റര്‍ അക്കൗണ്ടിലൂടെ പങ്കുവെച്ചിരുന്നു. ഇതിനെതിരേ രൂക്ഷവിമര്‍ശവുമായി ബി.ജെ.പി. രംഗത്തെത്തിയിരുന്നു. ജനപ്രാതിനിധ്യ നിയമത്തിലെ സെക്ഷന്‍ 29 എ (5) പ്രകാരം രാഷ്ട്രീയ പാര്‍ട്ടികള്‍ നടത്തിയ പ്രതിജ്ഞയുടെ ലംഘനമാണ് കോണ്‍ഗ്രസിന്റെ ട്വീറ്റ്. ഇത് ലംഘിക്കപ്പെട്ടു. കോണ്‍ഗ്രസിന്റെ രജിസ്‌ട്രേഷന്‍ റദ്ദാക്കണമെന്നും ചട്ടം ലംഘിച്ച സോണിയ ഗാന്ധിക്കെതിരേ നടപടി സ്വീകരിക്കണമെന്നും ആവശ്യപ്പെട്ടാണ് ബി.ജെ.പി തിരഞ്ഞെടുപ്പ് കമ്മിഷന് പരാതി നല്‍കി.

സോണിയ ഗാന്ധിയുടെ പ്രസ്താവനയ്‌ക്കെതിരേ പ്രധാനമന്ത്രി നരേന്ദ്രമോദിയും പരോക്ഷവിമര്‍ശവുമായി രംഗത്തെത്തിയിരുന്നു. കര്‍ണാടകത്തിന്റെ പരമാധികാരം എന്നതുകൊണ്ട് അവര്‍ എന്താണ് ഉദ്ദേശിക്കുന്നതെന്ന് ചോദിച്ച പ്രധാനമന്ത്രി, കര്‍ണാടകത്തെ ഇന്ത്യയില്‍ നിന്ന് വേര്‍പ്പെടുത്തുന്നതിനെ സോണിയ ഗാന്ധി പരസ്യമായി പിന്തുണയ്ക്കുകയാണെന്നും ഇന്ത്യയുടെ താല്‍പര്യങ്ങള്‍ക്കെതിരേയാണ് കോണ്‍ഗ്രസ് പ്രവര്‍ത്തിക്കുന്നതെന്നും കുറ്റപ്പെടുത്തിയിരുന്നു.