30 May 2023, 01:22 PM IST

1 min read

Read later

മനീഷ് സിസോദിയ | Photo: PTI

ന്യൂഡല്‍ഹി: മദ്യനയക്കേസില്‍ അറസ്റ്റിലായ ഡല്‍ഹി മുന്‍ ഉപമുഖ്യമന്ത്രി മനീഷ് സിസോദിയയുടെ ജാമ്യാപേക്ഷ തള്ളി ഡല്‍ഹി ഹൈക്കോടതി. സിസോദിയ്‌ക്കെതിരായുള്ള ആരോപണങ്ങള്‍ ഗുരുതരമാണെന്ന് ചൂണ്ടിക്കാട്ടിയായിരുന്നു ജസ്റ്റിസ് ദിനേഷ് കുമാര്‍ ശര്‍മ അധ്യക്ഷനായ സിംഗിള്‍ ബെഞ്ച് ജാമ്യം നിഷേധിച്ചത്. ഹൈക്കോടതിയുടെ ഉത്തരവിനെതിരെ സിസോദിയ സുപ്രീം കോടതിയെ സമീപിച്ചേക്കുമെന്നാണ് വിവരം.

സിസോദിയ സ്വാധീനശേഷിയുള്ള വ്യക്തിയാണെന്നും ജാമ്യം നല്‍കിയാല്‍ സാക്ഷികളെ സ്വാധീനിക്കാനുള്ള സാധ്യത തള്ളിക്കളയാനാകില്ലെന്നുമായിരുന്നു കോടതിയുടെ നിരീക്ഷണം. സിസോദിയയ്ക്ക് ജാമ്യം നല്‍കുന്നത് കേസിനെ ബാധിക്കുമെന്ന് ജാമ്യാപേക്ഷയെ എതിര്‍ത്തു കൊണ്ട് സി.ബി.ഐയും വ്യക്തമാക്കിയിരുന്നു.

സിസോദിയയ്ക്ക് കേസിനെ സ്വാധീനിച്ചേക്കാന്‍ കഴിയുന്ന മുതിര്‍ന്ന ഉദ്യോഗ്‌സഥരുള്‍പ്പടെയുള്ളവരുമായി അടുത്ത ബന്ധമാണെന്ന് സി.ബി.ഐ. വ്യക്തമാക്കി. കൂടാതെ സിസോദിയ്‌ക്കെതിരെയുള്ള നടപടി രാഷ്ട്രീയ പകപോക്കലാണെന്നുള്‍പ്പടെയുള്ള വ്യാജപ്രചരണങ്ങള്‍ അദ്ദേഹത്തിന്റെ സഹപ്രവര്‍ത്തകര്‍ നടത്തുന്നുവെന്നും ഇത് അന്വേഷണത്തെ ബാധിച്ചേക്കാമെന്നും സി.ബി.ഐ. ആരോപിച്ചു.

എന്നാല്‍ കേസില്‍ സിസോദിയ്‌ക്കെതിരെ വ്യക്തമായ തെളിവുകള്‍ ഹാജരാക്കുന്നതില്‍ സി.ബി.ഐ. പരാജയപ്പെട്ടുവെന്നായിരുന്നു സിസോദിയ്ക്ക് വേണ്ടി ഹാജരായ മുതിര്‍ന്ന അഭിഭാഷകന്‍ ദയന്‍ കൃഷ്ണയുടെ വാദം. സിസോദിയ ഒഴികെ മദ്യനയക്കേസില്‍ കുറ്റാരോപിതരയാവരെ സി.ബി.ഐ. ജാമ്യം നല്‍കി വിട്ടയച്ചു എന്നും ദയന്‍ കൃഷ്ണ വ്യക്തമാക്കി. സിസോദിയ തന്റെ ഔദ്യോഗിക പദവിയില്‍ നിന്ന് രാജി വെച്ചതിനാല്‍ സാക്ഷികളെ സ്വാധീനിക്കാന്‍ അദ്ദേഹത്തിനു കഴിയില്ലെന്നും ജാമ്യാപേക്ഷയില്‍ ചൂണ്ടിക്കാട്ടി.

മദ്യവില്‍പന പൂര്‍ണമായും സ്വകാര്യവത്കരിക്കുന്ന ഡല്‍ഹി മദ്യനയവുമായി ബന്ധപ്പെട്ട് ക്രമക്കേടുകള്‍ നടത്തി എന്നാരോപിച്ചായിരുന്നു കഴിഞ്ഞ ഫെബ്രുവരിയില്‍ മനീഷ് സിസോദിയ അറസ്റ്റിലാകുന്നത്.