ഉപതിരഞ്ഞെടുപ്പ്: ബംഗാളില്‍ മമതയുടെ തേരോട്ടം, ഹിമാചലില്‍ കോണ്‍ഗ്രസ്, അസമില്‍ ബിജെപി


ഹിമാചലിലെ കോൺഗ്രസ് വിജയം ആഘോഷിക്കുന്ന പ്രവർത്തകർ |ഫോട്ടോ:ANI

ന്യൂഡല്‍ഹി: രാജ്യത്തെ 13 സംസ്ഥാനങ്ങളിലെ 29 നിയമസഭാ മണ്ഡലങ്ങളിലേക്കും കേന്ദ്ര ഭരണപ്രദേശമായ ദാദ്ര ആന്‍ഡ് നഗര്‍ ഹവേലിയടക്കമുള്ള മൂന്ന് ലോക്‌സഭാ മണ്ഡലങ്ങളിലേക്കും നടന്ന ഉപതിരഞ്ഞെടുപ്പിന്റെ വോട്ടെണ്ണല്‍ അവസാനിച്ചു.

അസമില്‍ അഞ്ച്, പശ്ചിമ ബംഗാളില്‍ നാല്, മധ്യപ്രദേശ്, ഹിമാചല്‍ പ്രദേശ്, മേഘാലയ എന്നിവിടങ്ങളില്‍ മൂന്ന് വീതം, ബിഹാര്‍, കര്‍ണാടക, രാജസ്ഥാന്‍ എന്നിവിടങ്ങളില്‍ രണ്ട് വീതം, ആന്ധ്രപ്രദേശ്, ഹരിയാണ, മഹാരാഷ്ട്ര, മിസോറാം, തെലങ്കാന എന്നിവിടങ്ങളില്‍ ഓരോ വീതം നിയമസഭാ മണ്ഡലങ്ങളിലേക്കാണ് ഉപതിരഞ്ഞെടുപ്പ് നടന്നത്. ഇതില്‍ ഏഴ് സീറ്റുകള്‍ ബിജെപിയുടേയും ഒമ്പത് സീറ്റുകള്‍ കോണ്‍ഗ്രസിന്റേയും സിറ്റിങ് സീറ്റുകളാണ്. ബാക്കി മറ്റു പ്രാദേശിക പാര്‍ട്ടികളുടേതും.

കേന്ദ്ര ഭരണപ്രദേശമായ ദാദ്രനഗര്‍ ഹവേലി, ഹിമാചലിലെ മണ്ഡി, മധ്യപ്രദേശിലെ ഖന്ദ്വ എന്നീ ലോക്‌സഭാ മണ്ഡലങ്ങളിലേക്കും ഉപതിരഞ്ഞെടുപ്പ് നടന്നു.

അസം

അസമില്‍ ഉപതിരഞ്ഞെടുപ്പ് നടന്ന അഞ്ച് സീറ്റുകളിലും ബിജെപി സഖ്യം ജയിച്ചു. ഇതില്‍ ബിജെപി വിജയിച്ച മൂന്ന് സീറ്റുകളും കോണ്‍ഗ്രസിന്റെ സിറ്റിങ് സീറ്റുകളാണ്. ഏപ്രിലില്‍ നടന്ന നിയമസഭാ തിരഞ്ഞെടുപ്പിന് ശേഷം കോണ്‍ഗ്രസില്‍ നിന്ന് രാജിവെച്ച് ബിജെപി ടിക്കറ്റില്‍ മത്സരിച്ചവരാണ് വിജയിച്ചത്. മരിയാനിയില്‍ രൂപജ്യോതി കുര്‍മി (മരിയാനി), സുശാന്ത ബോര്‍ഗോഹൈന്‍ (തൗറ), ഫണിധര്‍ താലൂക്ദാര്‍ (ഭാബാനിപൂര്‍) എന്നിവരാണ് ജയിച്ചത്. മറ്റു രണ്ടു സീറ്റുകളില്‍ ബിജെപി സഖ്യകക്ഷിയായ യുപിപിഎലും വിജയിച്ചു.

പശ്ചിമ ബംഗാള്‍

പശ്ചിമ ബംഗാളില്‍ ഉപതിരഞ്ഞെടുപ്പ് നടന്ന സീറ്റുകളെല്ലാം മമതാ ബാനര്‍ജിയുടെ തൃണമൂല്‍ കോണ്‍ഗ്രസ് തൂത്തുവാരി. നാല് നിയമസഭാ മണ്ഡലങ്ങളിലും തൃണമൂല്‍ വ്യക്തമായ ഭൂരിപക്ഷം നേടി. കേന്ദ്ര ആഭ്യന്തര സഹ മന്ത്രി നിസിത് പ്രമാണിക് മാസങ്ങള്‍ക്ക് മുമ്പ് 57 വോട്ടിന് വിജയിച്ച ദിന്‍ഹത മണ്ഡലത്തില്‍ തൃണമൂലിന്റെ ഭൂരിപക്ഷം ഒന്നര ലക്ഷം കവിഞ്ഞു. ലോക്‌സഭാ അംഗത്വം നിലനിര്‍ത്തുന്നതിന് വേണ്ടി നിയമസഭാ അംഗത്വം നിസിത് രാജിവെച്ചതിനെ തുടര്‍ന്നാണ് ഇവിടെ ഉപതിരഞ്ഞെടുപ്പ് നടന്നത്.

ബിജെപിയുടെ മറ്റൊരു സിറ്റിങ് സീറ്റായ ശാന്തിപുറിലും തൃണമൂല്‍ മികച്ച ഭൂരിപക്ഷം നേടി. 63892 വോട്ടുകളുടെ ലീഡുണ്ട് നിലവില്‍ തൃണമൂലിന് ഇവിടെ. ഗോസബ മണ്ഡലത്തില്‍ 143051 ആണ് തൃണമൂലിന്റെ ഭൂരിപക്ഷം . ഖര്‍ദഹയില്‍ 93832 വോട്ടിന്റെ ലീഡ് നേടി.

ഹിമാചല്‍ പ്രദേശ്

ഹിമാചല്‍ പ്രദേശില്‍ ഉപതിരഞ്ഞെടുപ്പ് നടന്ന മൂന്ന് നിയമസഭാ സീറ്റുകളും ഒരു ലോക്‌സഭാ സീറ്റും കോണ്‍ഗ്രസ് തൂത്തുവാരി. ബിജെപിയുടെ സിറ്റിങ് സീറ്റായ മാണ്ഡി ലോക്‌സഭാ മണ്ഡലത്തില്‍ മുന്‍ മുഖ്യമന്ത്രി വീര്‍ഭദ്ര സിങിന്റെ ഭാര്യ പ്രതിഭാ സിങ് മികച്ച ഭൂരിപക്ഷത്തില്‍ ജയിച്ചു. 2019-ല്‍ ബിജെപിക്ക് ഇവിടെ നാല് ലക്ഷത്തിന് മുകളില്‍ ഭൂരിപക്ഷം നേടാനായിരുന്നു. മൂന്ന് നിയമസഭാ മണ്ഡലങ്ങളിലും കോണ്‍ഗ്രസ് സ്ഥാനാര്‍ഥികള്‍ ജയിച്ചു.

ഫത്തേപുരില്‍ ഭവാനി സിങ് പതാനിയ 5789 വോട്ടുകള്‍ക്കും അര്‍കിയില്‍ സഞ്ജയ് 3219 വോട്ടുകള്‍ക്കും ജുബ്ബല്‍ കോതായിയില്‍ രോഹിത് ഠാക്കൂര്‍ 6293 വോട്ടുകള്‍ക്കുമാണ് ജയിച്ചത്. ജുബ്ബല്‍ ബിജെപിയുടെ സിറ്റിങ് സീറ്റാണ്.

മധ്യപ്രദേശ്

മധ്യപ്രദേശില്‍ ഉപതിരഞ്ഞെടുപ്പ് നടന്ന മൂന്ന് നിയമസഭാ മണ്ഡലങ്ങളില്‍ രണ്ടെത്തില്‍ ബിജെപിയും ഒരിടത്തും കോണ്‍ഗ്രസുമാണ് ജയിച്ചത്‌. പൃഥിപുറിലും ജോബാറ്റിലുമാണ് ബിജെപി ജയിച്ചത്‌. രണ്ടും കോണ്‍ഗ്രസിന്റെ സിറ്റിങ് സീറ്റുകളാണ്. അതേ സമയം ബിജെപിയുടെ സിറ്റിങ് സീറ്റായ റായ്‌ഗോണില്‍ കോണ്‍ഗ്രസിനാണ് വിജയം. ഉപതിരഞ്ഞെടുപ്പ് നടന്ന ഖന്ദ്വ ലോക്‌സഭാ സീറ്റില്‍ ബിജെപിയാണ് ജയിച്ചത്‌.

മേഘാലയ

മേഘലയയിലെ ഉപതിരഞ്ഞെടുപ്പ് നടന്ന മൂന്ന് മണ്ഡലങ്ങളില്‍ എന്‍പിപി രണ്ട് സീറ്റുകളിലും യുഡിപി ഒരു സീറ്റിലും വിജയിച്ചു.

ബിഹാര്‍
ബിഹാറില്‍ ഭരണകക്ഷിയായ ജെഡിയുവിന്റെ രണ്ട് സിറ്റിങ് സീറ്റുകളിലാണ് ഉപതിരഞ്ഞെടുപ്പ് നടന്നത്. കനത്ത പോരാട്ടത്തിനൊടുവില്‍ രണ്ട് സീറ്റുകളും ജെഡിയു നിലനിര്‍ത്തി.

കര്‍ണാടക

കര്‍ണാടകയില്‍ രണ്ട് സീറ്റുകളിലാണ് ഉപതിരഞ്ഞെടുപ്പ് നടന്നത്. ജെഡിഎസിന്റെ സിറ്റിങ് സീറ്റായിരുന്ന സിന്ദ്ഗിയില്‍ ബിജെപി 31185 വോട്ടിന്റെ ഭൂരിപക്ഷത്തിന് ജയിച്ചപ്പോള്‍ ഹംഗലില്‍ കോണ്‍ഗ്രസ് 7319 വോട്ടിന് ജയിച്ചു.ബിജെപിയുടെ സിറ്റിങ് സീറ്റാണ് കോണ്‍ഗ്രസ് പിടിച്ചെടുത്തത്.

രാജസ്ഥാന്‍

രാജസ്ഥാനില്‍ തിരഞ്ഞെടുപ്പ് നട്‌ന രണ്ട് സീറ്റിലും കോണ്‍ഗ്രസിന് ജയിക്കാനായി. ബിജെപിയുടെ സിറ്റിങ് സീറ്റായ ധരിവാദില്‍ 18655 വോട്ടിന്റെ ഭൂരിപക്ഷത്തിനാണ് കോണ്‍ഗ്രസ് സ്ഥാനാര്‍ഥി ജയിച്ചത്.വല്ലഭ് നഗറിലും കോണ്‍ഗ്രസ് മികച്ച ഭൂരിപക്ഷം നേടി. ഇവിടെ ബിജെപി നാലാം സ്ഥാനത്തായി.

മഹാരാഷ്ട്രയിലെ ദെഗ്ലൂര്‍ നിയമസഭാ ഉപതിരഞ്ഞെടുപ്പില്‍ കോണ്‍ഗ്രസിന്റെ ജിതേഷ് റാവുസാഹിബ് അന്തുപൂര്‍കര്‍ 27763 വോട്ടുകള്‍ക്ക് ജയിച്ചു. ആന്ധ്രപ്രദേശിലെ ബദ്‌വേല്‍ മണ്ഡലത്തില്‍ വൈഎസ്ആര്‍ കോണ്‍ഗ്രസ് വന്‍ ഭൂരിപക്ഷത്തിന് വിജയിച്ചു. ഹരിയാണയില്‍ ഇന്ത്യന്‍ നാഷണല്‍ ലോക്ദള്‍ നേതാവ് അഭയ് ചൗട്ടല എല്ലനാബാദ് മണ്ഡലത്തില്‍ നിന്ന് വിജയിച്ചു.

തെലങ്കാനയില്‍ ടിആര്‍എസില്‍ നിന്ന് രാജിവെച്ച് ബിജെപിയിലെത്തിയ മുന്‍ മന്ത്രി എടാല രാജേന്ദര്‍ മുന്നിലാണ്. മിസോറാമില്‍ മിസോ നാഷണല്‍ ഫ്രണ്ട് സ്ഥാനാര്‍ഥി ജയിച്ചു. ദാദ്ര ആന്‍ഡ് നഗര്‍ ഹവേലി ലോക്‌സഭാ സീറ്റില്‍ ശിവസേന സ്ഥാനാര്‍ഥി 50677 വോട്ടുകള്‍ ജയിച്ചു.

Add Comment
Related Topics

Get daily updates from Mathrubhumi.com

Youtube
Telegram

വാര്‍ത്തകളോടു പ്രതികരിക്കുന്നവര്‍ അശ്ലീലവും അസഭ്യവും നിയമവിരുദ്ധവും അപകീര്‍ത്തികരവും സ്പര്‍ധ വളര്‍ത്തുന്നതുമായ പരാമര്‍ശങ്ങള്‍ ഒഴിവാക്കുക. വ്യക്തിപരമായ അധിക്ഷേപങ്ങള്‍ പാടില്ല. ഇത്തരം അഭിപ്രായങ്ങള്‍ സൈബര്‍ നിയമപ്രകാരം ശിക്ഷാര്‍ഹമാണ്. വായനക്കാരുടെ അഭിപ്രായങ്ങള്‍ വായനക്കാരുടേതു മാത്രമാണ്, മാതൃഭൂമിയുടേതല്ല. ദയവായി മലയാളത്തിലോ ഇംഗ്ലീഷിലോ മാത്രം അഭിപ്രായം എഴുതുക. മംഗ്ലീഷ് ഒഴിവാക്കുക..



 

IN CASE YOU MISSED IT
Thalassery Overbury's Foley

1 min

തലശ്ശേരി പാര്‍ക്കിലെ കമിതാക്കളുടെ ഒളിക്യാമറ ദൃശ്യം പോണ്‍ സൈറ്റുകളില്‍; അപ്‌ലോഡ് ചെയ്തവരെ തേടി പോലീസ്

Jul 4, 2022


nedumbassery airport

1 min

ബാഗില്‍ എന്താണെന്ന വിമാന ജീവനക്കാരിയുടെ ചോദ്യം ഇഷ്ടപ്പെട്ടില്ല, ബോംബെന്ന് മറുപടി; അറസ്റ്റിലായി

Jul 3, 2022


pinarayi and saji cheriyan

1 min

അപ്രതീക്ഷിത വിവാദം; മന്ത്രി സജി ചെറിയാനെ മുഖ്യമന്ത്രി വിളിപ്പിച്ചു, തിരക്കിട്ട ചര്‍ച്ചകള്‍

Jul 5, 2022

Most Commented