ബെംഗളൂരു: മുഖ്യമന്ത്രിസ്ഥാനത്ത് നിന്ന് രാജിവെക്കുമെന്ന അഭ്യൂഹം ശക്തമാകുന്നതിനിടെ അച്ചടക്കം പാലിക്കണമെന്നും പ്രതിഷേധത്തില്‍ പങ്കാളികളാവരുതെന്നും ആവശ്യപ്പെട്ട് യെദ്യൂരപ്പയുടെ ട്വീറ്റ്. കഴിഞ്ഞയാഴ്ച പ്രധാനമന്ത്രിയുമായുള്ള കൂടിക്കാഴ്ചയ്ക്കു  ശേഷം യെദ്യൂരപ്പയെ മുഖ്യമന്ത്രി സ്ഥാനത്ത് നിന്ന് യെദ്യൂരപ്പയെ നീക്കിയേക്കുമെന്ന തരത്തില്‍ വലിയ രീതിയിലുള്ള വാര്‍ത്തകള്‍ പ്രചരിച്ചിരുന്നു. ഇതിനു മറുപടിയായി താന്‍ ബിജെപിയുടെ വിശ്വസ്ത പ്രവര്‍ത്തകനാണെന്നാണ് യെദ്യൂരപ്പ ട്വീറ്റ് ചെയ്തത്.

. 'ബിജെപിയുടെ വിശ്വസ്ത പ്രവര്‍ത്തകനാകാന്‍ കഴിഞ്ഞതില്‍ ഞാന്‍ ഭാഗ്യവാനാണ്. ഉയര്‍ന്ന നിലവാരം പുലര്‍ത്തുന്ന ധാര്‍മ്മികതയോടും പെരുമാറ്റത്തോടും കൂടി പാര്‍ട്ടിയെ സേവിക്കുകയെന്നത് വലിയ അംഗീകാരമായാണ് ഞാന്‍ കാണുന്നത്. പാര്‍ട്ടിയുടെ ധാര്‍മ്മികതയ്ക്ക് അനുസൃതമായി പ്രവര്‍ത്തിക്കണമെന്നു എല്ലാവരോടും ഞാന്‍ ആവശ്യപ്പെടുകയാണ്. പാര്‍ട്ടിയെ നാണം കെടുത്തുന്ന തരത്തിലുള്ള പ്രതിഷേധങ്ങളിലോ അച്ചടക്കമില്ലായ്മയിലോ ഭാഗഭാക്കാകരുതെന്ന് ഞാന്‍ അഭ്യര്‍ഥിക്കുകയാണ്", എന്നാണ് യെദ്യൂരപ്പ ട്വീറ്റ് ചെയ്തത്. 

ട്വീറ്റ് പാർട്ടിക്കുള്ള സന്ദേശമായാണ് രാഷ്ട്രീയ വൃത്തങ്ങൾ കാണുന്നത്.

കര്‍ണാടകത്തില്‍ ബി.ജെ.പി. മന്ത്രിസഭയുടെ രണ്ടാം വാര്‍ഷികദിനമായ 26-ന് നടത്താന്‍ നിശ്ചയിച്ചിരുന്ന പാര്‍ട്ടി നിയമസഭാകക്ഷിയോഗം കഴിഞ്ഞ ദിവസം റദ്ദാക്കിയിരുന്നു.

കഴിഞ്ഞ ശനിയാഴ്ച പ്രധാനമന്ത്രി നരേന്ദ്രമോദി, ആഭ്യന്തരമന്ത്രി അമിത്ഷാ, പ്രതിരോധമന്ത്രി രാജ്നാഥ് സിങ്, ബി.ജെ.പി. ദേശീയ അധ്യക്ഷന്‍ ജെ.പി. നഡ്ഡ എന്നിവരുമായി കൂടിക്കാഴ്ച നടത്തിയശേഷം ബെംഗളൂരുവിലെത്തിയ മുഖ്യമന്ത്രി യെദ്യൂരപ്പ വിളിച്ച യോഗമാണ് റദ്ദാക്കിയത്. കാരണം വ്യക്തമാക്കിയിട്ടില്ല.

യെദ്യൂരപ്പ രാജിവെക്കുമെന്ന അഭ്യൂഹം ശക്തമാകുന്നതിനിടെയായിരുന്നു യോഗം വിളിച്ചത്. ദേശീയ നേതൃത്വത്തിന്റെ നിര്‍ദേശത്തെത്തുടര്‍ന്നാണ് യോഗം റദ്ദാക്കിയതെന്നാണ് വിവരം. പകരം പാര്‍ട്ടി എം.എല്‍എ.മാര്‍ക്കും എം.എല്‍.സി.മാര്‍ക്കും 25-ന് യെദ്യൂരപ്പ ഹോട്ടലില്‍ അത്താഴവിരുന്ന് നടത്താന്‍ തീരുമാനിച്ചിരുന്നെങ്കിലും ബുധനാഴ്ച വൈകീട്ടോടെ ഇതിനുള്ള നീക്കവും ഉപേക്ഷിച്ചു.

യെദ്യൂരപ്പയെ അനുകൂലിക്കുന്ന എം.എല്‍.എ.മാരുടെ പിന്തുണ തെളിയിച്ച് പാര്‍ട്ടിനേതൃത്വത്തിനുമുമ്പില്‍ ശക്തികാണിക്കാനാണ് നിയമസഭാകക്ഷിയോഗം വിളിച്ചതെന്ന് വിലയിരുത്തലുണ്ടായിരുന്നു. ഇതൊഴിവാക്കാന്‍ നേതൃത്വം ഇടപെട്ടതാകുമെന്നാണ് കരുതുന്നത്.

മുഖ്യമന്ത്രിസ്ഥാനത്തുനിന്ന് മാറാന്‍, ബി.വൈ. രാഘവേന്ദ്ര എം.പി.ക്കും ബി.വൈ. വിജയേന്ദ്രയ്ക്കും മികച്ച സ്ഥാനം നല്‍കണമെന്ന ഉപാധി യെദ്യൂരപ്പ നേതൃത്വത്തിനുമുമ്പില്‍ വെച്ചിട്ടുണ്ട്. ഇത് നേടിയെടുക്കുന്നതിനാണ് അദ്ദേഹം എം.എല്‍.എ.മാരുടെയും സാമുദായികനേതാക്കളുടെയും പിന്തുണ നേതൃത്വത്തെ ബോധ്യപ്പെടുത്തുന്നതെന്നാണ് വിവരം. നേതൃമാറ്റം ഉടന്‍ നടത്താനാണ് ഉന്നതനേതൃത്വത്തിന്റെ നീക്കമെന്നും വിവരമുണ്ട്. ഇതിനിടെ യെദ്യൂരപ്പയെ മാറ്റുന്നതിനെതിരെ ലിംഗായത്ത് സമുദായം രംഗത്തുവരുകയുണ്ടായി.

അതേസമയം കര്‍ണാടകത്തില്‍ നേതൃമാറ്റമുണ്ടാകുമെന്ന അഭ്യൂഹം മുന്‍ കേന്ദ്രമന്ത്രി ഡി.വി. സദാനന്ദഗൗഡ തള്ളി. ബി.എസ്. യെദ്യൂരപ്പയുടെ നേതൃത്വത്തിലുള്ള സര്‍ക്കാരിന്റെ പ്രവര്‍ത്തനത്തില്‍ ബി.ജെ.പി. കേന്ദ്രനേതൃത്വത്തിന് തികഞ്ഞ മതിപ്പാണുള്ളതെന്നും നേതൃമാറ്റത്തിന്റെ ഒരു സാധ്യതയും താന്‍ കാണുന്നില്ലെന്നും എം.പി.യും ബി.ജെ.പി.യുടെ മുന്‍ കേന്ദ്രമന്ത്രിയും മുന്‍ മുഖ്യമന്ത്രിയുമായ അദ്ദേഹം പറഞ്ഞു.

content highlights: BS Yediyurappa's tweet Amid Exit Rumours