ചെന്നൈ: സേലം-ചെന്നൈ അതിവേഗ പാതയ്‌ക്കെതിരെയുള്ള കര്‍ഷകരുടെ സമരത്തില്‍ പങ്കെടുക്കാനെത്തിയ സാമൂഹിക പ്രവര്‍ത്തകന്‍ യോഗേന്ദ്ര യാദവിനെ അറസ്റ്റ് ചെയ്തു. തമിഴ്‌നാട് തിരുവണ്ണാമലൈയില്‍ വെച്ചാണ് അദ്ദേഹത്തെ അറസ്റ്റ് ചെയ്തത്. സമരത്തില്‍ പങ്കെടുക്കുന്ന കര്‍ഷകരുമായി കൂടിക്കാഴ്ച നടത്താനെത്തിയപ്പോഴായിരുന്നു അറസ്റ്റ്. തന്നെ പോലീസ് കൈയേറ്റം ചെയ്തതായും ഫോണ്‍ പിടിച്ചെടുത്തെന്നും യോഗേന്ദ്ര യാദവ് പറഞ്ഞു.
സമരക്കാര്‍ ക്ഷണിച്ചതിനെ തുടര്‍ന്നാണ് താന്‍ അവിടേക്ക് പോയത്. അവിടെ എന്താണ് നടക്കുന്നതെന്ന് അറിയുന്നതിനും കാര്യങ്ങള്‍ പഠിക്കുന്നതിനുമാണ് പോയതെന്നും അദ്ദേഹം പറഞ്ഞു.
സേലം-ചെന്നൈ എട്ടുവരി അതിവേഗ പാതയ്‌ക്കെതിരെ പ്രദേശവാസികളും കര്‍ഷകരും ദിവസങ്ങളായി സമരം ചെയ്ത് വരികയാണ്. കമല്‍ ഹാസന്‍ അടക്കമുള്ള രാഷ്ട്രീയ നേതാക്കള്‍ സമരക്കാര്‍ക്ക് പിന്തുണ അര്‍പ്പിച്ച് രംഗത്തെത്തിയിരുന്നു.
