ലഖ്നൗ: കോണ്‍ഗ്രസ് ഉപാധ്യക്ഷനും അമേഠി എംപിയുമായ  രാഹുല്‍ ഗാന്ധിയെ മണ്ഡലത്തില്‍ കാണാനില്ലെന്ന്  അറിയിച്ച് പോസ്റ്ററുകള്‍. രാഹുലിന്റെ ചിത്രമടങ്ങിയ പോസ്റ്ററുകളാണ് തിങ്കളാഴ്ചയോടെ മണ്ഡലത്തിലെ പല സ്ഥലങ്ങളും പ്രത്യക്ഷപ്പെട്ടത്.  

'രാഹുല്‍ഗാന്ധിയെ സ്വന്തം മണ്ഡലമായ അമേഠിയില്‍ നിന്നും കാണാതായിരിക്കുന്നു. എംപി വാഗ്ദാനം ചെയ്ത വികസന പ്രവര്‍ത്തനങ്ങള്‍ ഇതുവരെ നടന്നില്ലെന്നും ഞങ്ങള്‍ ചതിക്കപ്പെട്ടതായും പരിഹാസരായതായും പോസ്റ്ററില്‍ സൂചിപ്പിക്കുന്നു. രാഹുല്‍ ഗാന്ധിയെ കണ്ടെത്തി തരുന്നവര്‍ക്ക് തക്കതായ പ്രതിഫലം നല്‍കുമെന്നും പോസ്റ്ററില്‍ നല്‍കിയിട്ടുണ്ട്. 'എന്ന് അമേഠിയിലെ ജനങ്ങള്‍' എന്നാണ് പോസ്റ്ററില്‍ ചുവടെ കുറിച്ചിരിക്കുന്നത്.

ലോക്സഭ തെരഞ്ഞെടുപ്പില്‍ അമേഠിയില്‍ രാഹുലിന്റെ മുഖ്യ എതിരാളി സ്മൃതി ഇറാനി ആയിരുന്നു. കാലങ്ങളായി അമേഠി രാഹുലിന്റെ മണ്ഡലമായതിനാല്‍ തന്നെ സീറ്റ് നഷ്ടപ്പെടില്ലെന്ന് കോണ്‍ഗ്രസിന് ഉറപ്പുണ്ട്. എന്നാല്‍ സ്മൃതി ഇറാനിയുടെ ജനകീയ ഇടപെടലുകള്‍ രാഹുലിന്റെ ജനപ്രിയതയ്ക്ക് മങ്ങലേല്‍പ്പിച്ചിട്ടുണ്ടെന്നാണ് ഇത്തരം പ്രതിഷേധങ്ങള്‍ സൂചിപ്പിക്കുന്നത്. 

ലഖ്നൗവിലെ കര്‍ഷക പ്രക്ഷോഭങ്ങള്‍ ശക്തമായപ്പോള്‍ കര്‍ഷകരുമായി കൂടിക്കാഴ്ച നടത്തിയതൊഴിച്ചാല്‍ മണ്ഡലത്തിലേക്ക് രാഹുല്‍ എത്തിയിട്ട് ഒരു വര്‍ഷത്തിലേറെ ആയെന്നാണ് ജനങ്ങളുടെ ആരോപണം.