തിരുവനന്തപുരം: ആള്‍ക്കൂട്ടം ആക്രമിച്ച കേസില്‍ 18 ദിവസമായിട്ടും കുറ്റക്കാരെ അറസ്റ്റു ചെയ്യാത്തതിനെത്തുടര്‍ന്ന് സുപ്രീം കോടതിയെ സമീപിക്കുമെന്ന് സാമൂഹികപ്രവര്‍ത്തകന്‍ സ്വാമി അഗ്നിവേശ്. തിരുവനന്തപുരത്ത് കഴിഞ്ഞ ദിവസം രാജീവ്ഗാന്ധി ഇന്‍സ്റ്റിട്യൂട്ട് ഓഫ് ഡെവലപ്മെന്റ് സ്റ്റഡീസിന്റെ നേതൃത്വത്തില്‍ സംഘടിപ്പിച്ച പരിപാടിയില്‍ സംസാരിക്കവേയാണ് സ്വാമി അഗ്നിവേശ് ഇക്കാര്യം അറിയിച്ചത്.
തന്നെ ആക്രമിച്ചവരെ ഇതുവരെ തിരിച്ചറിയുകയോ പിടികൂടുകയോ ചെയ്തിട്ടില്ല. പോലീസിന്റെ അന്വേഷണം നീതിയുക്തമല്ല. കരുതികൂട്ടിയുള്ള ചെയ്തികളാണ് ഇതെല്ലാം. പ്രധാനമന്ത്രിയും അദ്ദേഹത്തിന്റെ മന്ത്രിമാരും എന്ത് കൊണ്ടാണ് മൗനംപാലിക്കുന്നതെന്നും അദ്ദേഹം ചോദിച്ചു.
2019-ല്‍ ബിജെപി വീണ്ടും അധികാരത്തില്‍ വരികയാണെങ്കില്‍ ജനാധിപത്യവും ഭരണഘടയും മറക്കേണ്ടി വരുമെന്നും സ്വാമി അഗ്നിവേശ് കൂട്ടിച്ചേര്‍ത്തു. ജൂലായ് 17-ന് ജാര്‍ഖണ്ഡിലെ പക്കുരിലാണ് അദ്ദേഹത്തിനു നേരെ യുവമോര്‍ച പ്രവര്‍ത്തകര്‍ ആക്രമണം നടത്തിയത്.
