വിദേശത്തുനിന്ന് കാർ വാങ്ങിക്കൊണ്ടുവരാനുള്ള വ്യവസ്ഥകൾ സൗദി പുതുക്കി, Riyadh

ജാഫറലി പാലക്കോട്

20 May 2022, 03:03 PM IST

റിയാദ്: വിദേശത്തുനിന്ന് കാർ വാങ്ങുന്നതിനുള്ള വ്യവസ്ഥകളും അത് രാജ്യത്തേക്ക് കൊണ്ടുവരുന്നതിനുള്ള നിബന്ധനകളും സൗദി സകാത്ത്, ടാക്‌സ്, കസ്റ്റംസ് അതോറിറ്റി (സാറ്റ്ക) പുതുക്കി. വിദേശത്തുനിന്ന് കാർ വാങ്ങാൻ ആഗ്രഹിക്കുന്നവർ ചില നിബന്ധനകൾ ശ്രദ്ധിക്കണമെന്ന് സാറ്റ്ക അറിയിച്ചു. 2017-ന് മുമ്പ് നിർമ്മിച്ച കാറുകൾ സൗദി അറേബ്യയിലേക്ക് കൊണ്ടുവരാൻ അനുവദിക്കില്ല.

കൂടാതെ, വാങ്ങുന്ന വാഹനം സൗദി അറേബ്യ നിഷ്‌കർഷിക്കുന്ന മാനദണ്ഡങ്ങൾ അനുസരിച്ചുള്ളതായിരിക്കണം. ഇന്ധനക്ഷമത നിലവാരത്തിന് അനുസൃതമായിരിക്കണം. വാഹനത്തിന്റെ മൂല്യത്തിന്റെ 5% നിരക്കിൽ കസ്റ്റംസ് തീരുവ ചുമത്തും. കസ്റ്റംസ് തീരുവയ്‌ക്കൊപ്പം വാഹനത്തിന്റെ മൊത്തം മൂല്യത്തിൽ 15% മൂല്യവർധിത നികുതിയും ഈടാക്കുമെന്ന് സാറ്റ്ക കൂട്ടിച്ചേർത്തു.

ബഹ്‌റൈനിൽനിന്ന് കാർ വാങ്ങി സൗദിയിലേക്ക് കൊണ്ടുവരാനുള്ള സാധ്യതയെക്കുറിച്ചുള്ള ചോദ്യത്തിനുള്ള മറുപടിയിലാണ് അതോറിറ്റി ഇക്കാര്യം വെളിപ്പെടുത്തിയത്. സൗദി സ്റ്റാൻഡേർഡ്‌സ്, മെട്രോളജി ആൻഡ് ക്വാളിറ്റി ഓർഗനൈസേഷനുമായി (സാസോ) ആശയവിനിമയം നടത്തി കാറിന്റെ സവിശേഷതകൾ സ്ഥിരീകരിക്കാനും പറ്റും.