ഹജജ് കരാറുകള്‍ ഒപ്പിടുവാന്‍ കാത്തിരിക്കണമെന്ന് സൗദി ഹജജ് മന്ത്രി, Hajj bookings

02 April 2020, 12:08 AM IST

മക്ക: ലോകത്തുള്ള എല്ലാ മുസ്ലിംകളോടും ഈ വര്‍ഷത്തെ ഹജജ് കരാര്‍ ഒപ്പിടുന്നതിന് ക്ഷമയോടെ കാത്തിരുക്കുവാന്‍ ഹജജ് ഉംറ മന്ത്രാലയം ആവശ്യപ്പെട്ടിട്ടുണ്ടെന്ന് സൗദി ഹജജ് ഉംറ മന്ത്രി ഡോക്ടര്‍ മുഹമ്മദ് സ്വാലിഹ് ബെന്‍തിന്‍.

ഈ വര്‍ഷത്തെ ഹജജ് കര്‍മ്മത്തിന് സൗദി അറേബ്യ എല്ലാ നിലക്കും സന്നദ്ധമാണ്, തീര്‍ഥാടകര്‍ക്ക് തീര്‍ത്ഥാടകര്‍ക്ക് ആവശ്യമായ എല്ലാ സൗകര്യങ്ങളും ഒരുക്കും, അതേസമയം ലോകം സമാനതകളില്ലാത്ത വിപത്തുകളിലൂടെയാണ് കടന്നുപോകുന്നതെന്നും വ്യക്തമാക്കി. വിശുദ്ധ കഅബാലയത്തിനു മുന്നില്‍ വെച്ച് ഒരു സ്വകാര്യ ചാനലിന് നല്‍കിയ അഭിമുഖത്തിലാണ് മന്ത്രിയുടെ പ്രതികരണം.

സാഹചര്യം അനുകൂലമായി തെളിഞ്ഞുവന്നാല്‍ വിദേശ രാജ്യങ്ങളില്‍ നിന്നുള്ള തീര്‍ത്ഥാടകരുടെ വിഷയത്തില്‍ ഗുണപരമായ തീരുമാനം കൈക്കൊള്ളും, നിലവില്‍ നാട്ടിലേക്ക് പോകുവാന്‍ കഴിയാതെ പ്രയാസപ്പെടുന്ന 1200 വിദേശ ഉംറ തീര്‍ത്ഥാടകരെ സൗദി അറേബ്യ സംരക്ഷിക്കുന്നുണ്ട്. പണമടച്ചു ഉംറക്ക് വരാന്‍ കഴിയാത്ത എല്ലാവരുടെയും പണം തിരിച്ചുകൊടുത്തിട്ടുണ്ടെന്നും അദ്ദേഹം പറഞ്ഞു.