മക്കളേ,
ഈശ്വരന്‍ കരുണാമയനാണെന്ന് ശാസ്ത്രങ്ങള്‍ പറയുന്നു. അങ്ങനെയാണെങ്കില്‍ നമ്മുടെ തെറ്റുകള്‍ ഈശ്വരന്‍ ക്ഷമിക്കേണ്ടതല്ലേ എന്ന് ചിലര്‍ ചോദിക്കാറുണ്ട്.
തെറ്റും ശരിയും തിരിച്ചറിയാനുള്ള വിവേകബുദ്ധി ഈശ്വരന്‍ നമുക്കു നല്‍കിയിട്ടുണ്ട്. എന്നാല്‍ ഉള്ളില്‍നിന്നും ഉയരുന്ന വിവേകത്തിന്റെ ശബ്ദം ഗൗനിക്കാന്‍ നമ്മള്‍ പലപ്പോഴും കൂട്ടാക്കാറില്ല. അവിവേകവും അഹങ്കാരവും മൂലം ചെയ്യുന്ന കര്‍മത്തിന്റെ ഫലം നമ്മള്‍ അനുഭവിക്കുകതന്നെ വേണം.
അറിവില്ലായ്മകൊണ്ടോ, മനഃപൂര്‍വമല്ലാതെയോ
ചെയ്തുപോയ തെറ്റുകള്‍ ഭഗവാന്‍ ക്ഷമിക്കും. എന്നാല്‍ അറിഞ്ഞുകൊണ്ടു തെറ്റുചെയ്താല്‍, ഒരുപരിധി കഴിഞ്ഞാല്‍ ഈശ്വരന്‍ ക്ഷമിക്കില്ല. കൊച്ചുകുട്ടി 'ഇച്ഛാ, ഇമ്മാ' എന്നു വിളിക്കും. അച്ഛനുമമ്മയ്ക്കുമറിയാം, അതു തങ്ങളെ വിളിക്കുകയാണെന്ന്. അതു കേട്ട് അവര്‍ ചിരിക്കും.
എന്നാല്‍ കുട്ടി കുറച്ചുകൂടി വലുതായിക്കഴിഞ്ഞശേഷം
ഇതുപോലെ വിളിച്ചാല്‍ അവര്‍ ചിരിക്കില്ല; ശാസിക്കുകയോ ശിക്ഷിക്കുയോ ചെയ്ത് അവനെ തിരുത്താന്‍ ശ്രമിക്കും.
നമ്മുടെ ചെറിയ തെറ്റിനുകൂടി ഭഗവാന്‍ ശിക്ഷ നല്‍കിയെന്നിരിക്കും. നമ്മോടുള്ള അമിതമായ കാരുണ്യംകൊണ്ട് നമ്മെ രക്ഷിക്കാന്‍വേണ്ടിയാണത്. അന്ധകാരത്തില്‍ വഴികാട്ടുന്ന ദീപം പോലെയാണ് ആ ശിക്ഷ.
ഒരു കുട്ടി അടുത്തുള്ള പറമ്പിലേക്കു കടക്കാന്‍ കമ്പിവേലി ചാടുക പതിവായിരുന്നു. ഇതുകണ്ട് അവന്റെ
അമ്മ ഉപദേശിച്ചു, ''മോനേ, കാലു തെറ്റിയാല്‍ കമ്പിയില്‍ തട്ടും, ദേഹം മുറിയും. അതുകൊണ്ടു മോന്‍ അതുവഴി പോകരുത്. ശരിയായ വഴിയില്‍ക്കൂടിയേ പോകാവൂ!''
''എനിക്കിതുവരെ ഒന്നും സംഭവിച്ചിട്ടില്ലല്ലോ'', എന്നുപറഞ്ഞുകൊണ്ടു കുട്ടി പഴയ രീതി തുടര്‍ന്നു. അങ്ങനെയിരിക്കെ ഒരു ദിവസം വേലി ചാടാന്‍ ശ്രമിക്കുമ്പോള്‍ അവന്‍ കാല്‍ വഴുതി വീണു. മുള്ളുകമ്പിയില്‍ തട്ടി കാലുമുറിഞ്ഞു, കരഞ്ഞുകൊണ്ട് അമ്മയുടെ അടുക്കല്‍ച്ചെന്നു.
അമ്മ സ്‌നേഹപൂര്‍വം തലോടി ആശ്വസിപ്പിച്ച് മരുന്നു
വെച്ചുകൊടുത്തു. മേലാല്‍ അതു വഴി പോകരുതെന്ന്
ഒന്നുകൂടി ഓര്‍മിപ്പിച്ചു. എന്നാല്‍ മുറിവു ഭേദമായിക്കഴിഞ്ഞപ്പോള്‍ കുട്ടി വീണ്ടും കമ്പിവേലി ചാടി. അപ്പോഴും കാലു തെറ്റി. മുള്ളുകമ്പിയില്‍ തട്ടി ദേഹം മുറിഞ്ഞു. കുട്ടി കരഞ്ഞുകൊണ്ട് അമ്മയുടെ അടുത്തുചെന്നു. മരുന്നു വെച്ചുകൊടുക്കുന്നതിനു മുമ്പായി അമ്മ രണ്ടടി കൂടി നല്‍കി. അടിച്ചത് കുട്ടിയോടുള്ള ദേഷ്യംകൊണ്ടല്ല, സ്‌നേഹംകൊണ്ടാണ്. ഇനിയും അവന്‍ ആ തെറ്റ് ആവര്‍ത്തിക്കാതിരിക്കാനാണ്. അതുപോലെ ഈശ്വരന്‍ നമുക്കു നല്‍കുന്ന ശിക്ഷ, നമ്മളോട് അവിടുത്തേക്കുള്ള കാരുണ്യമാണ്.
ചില സാഹചര്യങ്ങളില്‍ തെറ്റേത് ശരിയേത് എന്ന് തിരിച്ചറിയാന്‍ നമുക്ക് പ്രയാസമായിരിക്കും. അത്തരം സാഹചര്യങ്ങളില്‍ ഗുരുവിനെ അല്ലെങ്കില്‍ അറിവുള്ളവരെ സമീപിച്ച് ഉപദേശം തേടണം. അങ്ങനെ ജീവിതത്തിന്റെ ലക്ഷ്യമെന്തെന്നും എങ്ങനെ ജീവിതം നയിക്കണമെന്നും മനസ്സിലാക്കിയാല്‍ ശരിയായ മാര്‍ഗത്തില്‍ മുന്നോട്ടുപോകാം.
